பிரிட்டனின் பொருளாதாரப் பெருங்குழப்பம்

             

   அந்த நாள் பேரரசு, பிரிட்டனில் இன்று பொருளாதாரப் பெருங்குழப்பம்

--ஸ்ரீனிவாஸ் கந்தேவாலே

            கிரேட் பிரிட்டன், தற்போது பெரும் பொருளாதாரக் குழப்பத்தில் நீந்துகிறது. கடந்த இரண்டு ஆண்டுகளில், உலகின் அனைத்து நாடுகளுமே கோவிட் பெருந்தொற்றின் மோசமான பொருளாதாரத் தாக்கத்தின் இன்னல்களை 2020 –21, பின்னர் மீண்டும் 2021 –22ல் அனுபவித்தன, அவை இப்போது மெல்ல மீட்சியடைந்து வருகின்றன. பிரிட்டனும் ஐரோப்பாவும் மேலும் ரஷ்யா –உக்ரைன் போரின் காரணமாகக் கோதுமை தானியம் வரத்து, பெட்ரோல் கச்சா எண்ணை மற்றும் எரிவாயு வழங்கல் வரத்துக் குறைந்ததன் தாக்கத்தாலும் துன்பப்பட்டு வருகின்றன. இதன் விளைவு பிரிட்டனில் அதிகரித்த பணவீக்கம் (சுமார் 10%). இது கடந்த 40 ஆண்டுகளில் உச்சபட்சமாக இருக்கலாம். இதன் காரணமாக மேலும்

வணிகத் தொழில் மத்தியில் ஸ்திரத்தன்மையின்மை ஏற்பட்டது. வெறும் 45 நாட்களுக்குள் நாட்டின் ஆளும் கன்சர்வேடிவ் கட்சியின் இரண்டு பிரதமர்கள் மாறிவிட்டார்கள், தற்போது  மூன்றாவது பிரதமராக ரிஷி சுனக் (இந்தியப் பூர்வீகத்தைச் சேர்ந்தவர்) அக்டோபர் 24ல் ஆளும் கட்சி நாடாளுமன்றத் தலைவராகத் தேர்ந்தெடுக்கப்பட்டுள்ளார். பொருளாதாரத்தில் கடும் ஏற்ற இறக்கம், தடுமாற்றம் மற்றும் அதன் அரசியல் பின்விளைவுகள் அடுத்தடுத்த விரைவான காட்சி மாற்றம் என உலகை ஆச்சரியத்திலும் அதிர்ச்சியிலும் ஆழ்த்தியுள்ளன.

            பிரிட்டிஷ் பொருளாதாரம் சந்திக்கும் முக்கியப் பொருளாதாரச் சவால்களில் வரலாற்று ரீதியான உயர் பணவீக்கம் முக்கியமானது; தொடரும் பணவீக்கம், முலாம் பூசப்பட்ட அரசுப் பத்திரங்களின் மதிப்பைக் குறைத்துவிட்டதால் (முன்பு அரசுப் பத்திரங்களின் முனைகள் தங்கமுலாம் பூசப்பட்டதால் அப்பத்திரங்களுக்கு இந்த அடைமொழி) அவற்றின் விலைகளும் வீழ்ச்சி அடைந்தன. இப்பத்திரங்கள் ஊழியர்களின் பென்ஷன் நிதியத்தின் முக்கிய ஆஸ்தியாக (முதலீடு) இருந்தது. இந்த நிதியம் (ஃபண்டு) ஒரு பக்கம், சந்தையில் மறைமுக நிதியின் முக்கிய ஊற்றாகவும், மறுபுறம் ஊழியர்களின் (அந்தச்) சேமிப்புக்கு நிலைத்த வருவாயாகவும் இருந்தது. பணவீக்கம், சாதாரண மனிதருக்குக் கிடைந்த இந்த வருவாய் ஆதார ஊற்றையும் மற்றும் பிரிட்டிஷ் முதலீட்டுச் சந்தையின் பென்ஷன் நிதியத்தின் பங்கையும் கீழே தள்ளிவிட்டது.

            ரஷ்யாவிலிருந்து எரிவாயு வழங்கல் மற்றும் கச்சா எண்ணெய் வரத்துக் கடுமையாக குறைந்ததால் -- நீண்ட கடும் மழை காலத்தைச் சந்திக்கும் நிலையில் – எரிசக்தி நெருக்கடி ஏற்பட்டது. (ஐரோப்பாவும் பிரிட்டனும் எரிசக்திக்கு ரஷ்யாவையே பெரிதும் சார்ந்துள்ளன.) எரிபொருளுக்கு ரேஷன் முறையை அமல்படுத்துவது பரிசீலனையில் உள்ளது; மேலும் எரிபொருட்கள் விலை கடுமையாக உயர்ந்ததால் வாழ்க்கை செலவு நெருக்கடி உண்டாகிறது.  சர்வதேச நாணய நிதியத்தின் (ஐஎம்ஃஎப்) ‘உலகப் பொருளாதாரக் கண்ணோட்டம்’ ஆய்வறிக்கை அதன் துணைத் தலைப்பாக ‘வாழ்க்கை செலவு நெருக்கடியை எதிர்கொள்ள’ என்பதை இணைத்துள்ளது.

            பிரிட்டனின் பொருளாதாரம் இந்தியாவைவிட மேம்பட்ட மட்டத்தில் இயங்கினாலும், அது புதிய பொருளாதார நெருக்கடியை எதிர்கொள்கிறது. அமெரிக்காவில் ‘சப்-பிரைம் கடன் வழங்கல் நெருக்கடி’யின் விளைவாக ஏற்பட்ட 2008 பொருளாதார மாபெரும் பின்னடைவின் தாக்கத்திலிருந்து மெல்ல மீண்டாலும், பிரிட்டன் தற்போது கரோனா பெருந்தொற்றின் பின்விளைவுகள், ரஷ்ய உக்ரைன் போரின் நேரடி பாதிப்பு மற்றும் அவற்றுடன் பொதுமக்கள் திரளின் வருவாய் குறைவு, வாங்கும் சக்தியில் வீழ்ச்சி மற்றும் வாழ்வாதாரச் சிக்கல்கள், மற்றும் (கடன்களின் மீது) வட்டி விகித அதிகரிப்பால் வேலைவாய்ப்பை உண்டாக்குவதில் ஏற்படும் பாதிப்புப் போன்ற  அவ்வவ்போது முதலாளித்துவப் பொருளாதாரத்தில் ஏற்படும் பின்விளைவுகளைச் சந்திக்கிறது. [அமெரிக்காவில் 2008 பொருளாதாரப் பெரும்பின்னடைவு என்பது வகைதொகை இல்லாமல் எளிய வட்டிக்குக் கடன் கொடுத்ததால் கட்டுமானத் தொழில் அபரிமிதமாகக் கொழிக்க, மக்கள் தேவைக்கும் அதிகமாக வீடுகளையும், அரசுப் பத்திரங்களையும் கடனுக்கு வாங்கிக் குவித்தனர். இது ஒரு நிலையில் தேக்கத்தை ஏற்படுத்த, மக்கள் வீடுகளை விற்க முடியாமல், வாங்கிய கடனையும் திரும்பச் செலுத்தாததால், ‘வளர்ச்சி போன்று வீங்கிய நீர்க்குமிழி உடைந்தது’ (பப்பிள் பர்ஸ்ட்), கடன் கொடுத்த வங்கிகள் திவால் ஆயின. ஒரு நிலையில் வங்கிகளில் கடன் கொடுக்க கரன்சி இல்லை, மதிப்பிழந்த செக்குரிட்டி பத்திரங்கள் மட்டுமே இருந்தன. இதையே ‘சப்-பிரைம் கடன் வழங்கல் நெருக்கடி’ என அழைக்கிறார்கள். இந்த 2008 பொருளாதாரப் பின்னடைவால் பலர் வேலை இழந்தனர், தங்கள் சேமிப்புகளையும் வீடுகளையும் இழந்தனர்.]

‘கன்சர்வேடிவ்’ கொள்கைகள்

            பிரிட்டனின் கன்சர்வேடிவ் கட்சி, அதன் குறை கால அரசுகள் மூலம், அதனது பணக்காரர்களுக்கு ஆதரவான, தொழிலாளர் விரோதமான கொள்கைகளை அமல்படுத்த முயன்றது; அம்முயற்சி தொழிலாளர் வர்க்கத்தின் மீதும், மூலதனச் சந்தையின் மீதும்கூட தாக்குதல்களை ஏவியது. பொருளாதார மீட்பை ஊக்குவிக்க அரசு பொதுமக்களுக்கு எந்த நிவாரண உதவிகளையும் அளிப்பதைத் தவிர்த்தது; ஆனால், அதிபணக்காரர்களுக்கு வரிகளைக் குறைத்துச் சலுகைகள் வழங்கியது; இதனால் ஏற்படும் வருவாய் இழப்பைப் பொதுமக்களிடமிருந்து கடன் வாங்கி ஈடுகட்டும் யோசனையை முன் வைத்தது.

கூடுதல் கடன்களைத் திரும்பச் செலுத்தும் சக்தி அரசுக்கு இல்லை என்ற புரிதல் காரணமாகச் சந்தையும் பொது மக்களும் திடீரெனவும் கூர்மையாகவும் எதிர்வினையாற்றினர். முந்தைய பிரதமரும் நிதியமைச்சரும் நோக்கமின்றி ‘நம்பிக்கையில் செய்த தவறு’க்காகப் பதவி விலக வேண்டிய நிர்பந்தம். பெரும் தொழில்களின் முக்கிய தொழிற்சங்கங்கள் சில ஏற்கனவே வேலைநிறுத்தத்தில் இறங்கிவிட்டன, மற்றவை வேலைநிறுத்த அறிவிப்புக் கொடுத்திருந்தன. ஒட்டுமொத்தத்தில் நிலைமை மக்கள் விரோதமாக ஆகியிருந்தது. (படம் நன்றி க்ரானிகல் லைவ்)

            புதிதாகத் தேர்ந்தெடுக்கப்பட்ட பிரதமர் ரிஷி சுனக், நீண்ட காலம் முன்பே இந்திய வம்சாவளியைச் சேர்ந்தவராக இருக்க, அவரது இப்போதைய இந்தியத் திருமண உறவு இந்தியாவில் புதிதாகக் கொண்டாடப்படுகிறது. ஆயினும் ஒரு பிரிட்டிஷ்காரராகப் பிறந்து, பிரிட்டிஷ் கல்வி கற்று இங்கிலாந்தின் தற்போதைய மன்னரைவிட செல்வந்தராக உள்ள ரிஷி சுனக் ஒரு பிரிட்டிஷ் குடிமகன்; கன்சர்வேடிவ் கட்சி உறுப்பினர், கன்சர்வேடிவ் பொருளாதாரக் கொள்கை பார்வையைக் கொண்டிருக்கிறார். கட்சியின் பார்வைக்குள் நின்று தேசியப் பிரச்சனைக்குத் தீர்வு காணும் அறிவுறுத்தலுடன் கட்சியால் அவர் தேர்ந்தெடுக்கப்- பட்டுள்ளார்.

            புதிய பிரதமரிடமிருந்து நமது எதிர்பார்ப்புகளை மேற்கண்ட அனைத்து அம்சங்களும் குறைத்து விட்டன என்பதே உண்மை. 2022 மற்றும் 2023ம் ஆண்டின் மழைக்காலப் பருவங்களின்போது எரிபொருள் அவசரநிலை உறையச் செய்யும் அம்சமாகும். ஐஎம்ஃஎப் அறிக்கை, ‘‘மிக மோசமானவை இனிதான் வர உள்ளன’’ என ஏற்கனவே எச்சரித்துள்ளதுடன் மேலும், “எங்களின் சமீபத்திய உலக வளர்ச்சி குறித்த முன்கணிப்புகள் 2022ல் 3.2 சதவீதமாகவும் 2023ல் அது மெல்ல 2.7சதவீதமாகும் என்றும், 25சதவீத நிகழ்தகவுடன் அது 2 சதவீதத்திற்குக் கீழேயும் சரியலாம் என்பது மாற்றமின்றி அப்படியே உள்ளன; எண்ணற்ற பல மக்கள் 2023ம் ஆண்டை (பொருளாதாரப்) பின்னடைவு போல உணர்வர்” (தகவல் ஆதாரம் ஐஎம்ஃஎப் ‘உலகப் பொருளாதாரப் பார்வை- 2022’ அறிக்கை P. XIII). “குறைந்த வருவாய்ப் பிரிவைச் சேர்ந்த பல நாடுகள் கடன் வலை துன்பத்திலோ அல்லது அதற்கு நெருக்கமாகவோ உள்ளன. மிக மோசமாகப் பாதிக்கப்பட்ட நாடுகளுக்கு இறையாண்மை கடன் நெருக்கடி அலையைத் தவிர்க்க அவசரமாகப் பொதுவான திட்டச் சட்டகம் தேவைப்படுகிறது. காலம் விரைவாகக் கரைந்து கொண்டிருக்கிறது. உடனடியாகச் செயல்பட வேண்டிய தருணம்” (மேற்கண்ட ஆய்வறிக்கை p. XIV)

ஏகாதிபத்திய அம்சம்

            ஆழமாக எண்ணிப் பார்த்தால் ஒரு கேள்வி நம்முன் எழும். பிரிட்டன் போன்ற வல்லமையான பேரரசரின் நாடு தொடரும் பணவீக்கத்தைச் சந்திக்கும் நிலையில், பொருளாதார நிலைத்தன்மை இன்மை, வேலையின்மை, குறைந்த ஊதியம் போன்ற பிரச்சனைகளில் ஏன் துன்பப்பட வேண்டும்? ஏற்கத்தக்கதாகத் தோன்றும் ஒரு பதில் யாதெனில், அன்று இந்தப் பேரரசின் (குறைந்த ஊதியம், பணவீக்கம், வேலையின்மை, ஏழ்மை முதலான) பொருளாதாரப் பிரச்சனைகளின் தாக்கத்தைத் தாங்கிப் பிடிக்க, காலனிய நாடுகள் அதிர்ச்சிகளைத் தாங்கும் சுமை தாங்கிகளாக (ஷாக் அப்ஸார்ப்பர்) நடத்தப்பட்டதாக இருக்கலாம்; மேலும் நாளும் காலனிய நாடுகளின் செல்வத்தின் பயன் மட்டும் மாமன்னர் ராஜாங்கத்துக்குக் கொள்ளையடித்து கொண்டு செல்லப்பட்டன  – அப்படித்தான் ஆவணச் சாட்சியங்கள் காட்டுகின்றன. பேரரசரின் ஏகாதிபத்திய நாட்டிலும்கூட செல்வத்தின் பயன்கள் பணக்காரர்களுக்கே சென்றன, சாதாரண பிரிட்டன் மக்கள் நல்ல ஊதியத்திற்காக (முக்கியமாக அமெரிக்காவுக்கு) புலம் பெயர்ந்து சென்றனர். இதன் பொருள் பிரிட்டிஷ் முதலாளித்துவம் எப்போதுமில்லாத மாபெரும் சாம்ராஜ்யத்துடன் (சுமார் 40 காலனிய நாடுகள் அதன் ஆட்சியில்), தான் அடிமைப்படுத்திய நாடுகளின் மக்களுக்கும் அல்லது சொந்த மக்களுக்கும்கூட பொருளாதார நியாயம் வழங்கவில்லை என்பதுதான். ஆனால் குறுக்கும் நெடுக்குமான வர்த்தகப் பரிவர்த்தனைகள் மூலம் சாம்ராஜ்யமும் பிற சிறிய மன்னர்களும் நிலைத் தன்மையை அப்போது அனுபவித்தனர்.

            இரண்டாம் உலகப் போருக்குப் பிறகு காலனிய நாடுகளின் விடுதலை பிரச்சனை தீர்க்கப்பட்ட நிலையில் பேரரசு பிரிட்டனின் பொருளாதாரம் ஒரு சிறிய நாட்டின் பொருளாதாரம் போல மாறியது; ஐரோப்பிய பொதுச் சந்தையில் நீடிப்பதா இல்லையா, குவிந்துவிட்ட அரசின் பொதுக் கடனைத் திரும்பச் செலுத்துவது எப்படி என்பது போன்ற தனது சொந்த சமூக –பொருளாதார –அரசியல் பிரச்சனைகளைத் தீர்க்க முடியாமல் திணறியது. மேலும் முந்தைய பேரரசின் தனது சொந்த மக்கள் விசா மூலம் வெள்ளமாகத் திரும்பி வருவதை எப்படிக் கட்டுப்படுத்துவது, தனது பொருளாதாரத்திற்கு நிலைத்தன்மை அளிப்பது எப்படி, தற்போதைய இறுக்கமான பொருளாதாரத்தில் வருவாய்ச் சமத்துவமின்மையைக் கட்டுப்படுத்துவது எப்படி மற்றும் 2024ல் பொதுத் தேர்தலைச் சந்திக்க உள்ள கன்சர்வேடிவ் கட்சிக்குப் பொது மக்களின் வாக்குகளை எப்படித் திரட்டுவது போன்ற பிரச்சனைகள் கன்சர்வேடிவ் கட்சி முன் நிற்கின்றன.

சாம்ராஜ்ய சகாப்தத்தின்போது சாம்ராஜ்யத்தை விரிவுபடுத்தவும் சமாளித்து நடத்திச் செல்லவும் பிரிட்டனில் புதிய அரசியல் கருத்துகள், கோட்பாடுகள் உருவானது மிகவும் புதிர்போன்ற குழப்பமான கேள்வி. ஆனால் சாம்ராஜ்யத்தை இழந்துவிட்ட பிறகு பிரிட்டனின் புதியன படைக்கும் இப்புதிய உத்வேகம் பலவீனமடையத் தொடங்கியதாகத் தோன்றுகிறது. அரசு ஆக்ஸ்போர்டு பிளாவட்நிக் பள்ளியில் பொருளாதாரம் மற்றும் பொதுக் கொள்கை  துறையின் பேராசிரியர் பால் காலினர் (Paul Collier) தனது நூலில் ஆழமாக விமர்சிக்கிறார்: “முதலாளித்துவம் பிளவுபட்டச் சமூகங்களை உருவாக்குகிறது, அச்சமூகங்களில் எண்ணற்ற மக்கள் கவலையும் பதற்றமும் நிறைந்த நிச்சயமற்ற வாழ்க்கையில் தள்ளப்படுவார்கள்…” (மேற்குறிப்பிட்ட நூல் ‘முதலாளித்துவத்தின் எதிர்காலம் : புதிய பதற்றங்களைச் சந்திக்கும்’, ஆலன் லேன் பதிப்பகம், 2018, பக்.201).

பொருளாதாரப் பெருமந்தம் (கிரேட் டிப்ரஷன் 2008) நிகழ்வைத் தொடர்ந்த சகாப்தத்தின்போது நடைமுறைக்கேற்ற சாதுரியமான கொள்கைகள் முதலாளித்துவத்தை மீண்டும் சீரான பாதையில் கொண்டு வந்தது; மீண்டும் அவர்கள் அதனை முயற்சி செய்யலாம். இன்னும் நமது அரசியல் முறைமை அத்தகையக் கொள்கைகளை உண்டாக்கவில்லை. நமது பொருளாதாரம் போலவே அதுவும் செயல்படாத நிலையில் உள்ளது. பிரச்சனைகளுக்கான தீர்வைக் காரிய சாத்தியமான நடைமுறைகேற்ற வண்ணம் சிந்திக்கும் ஆற்றல் அவர்களை விட்டு அற்றுப் போய்விட்டதா என்ன?

பிரிட்டனின் தற்போதைய பொருளாதார மற்றும் அரசியல் பிரச்சனைகளுக்குத் தீர்வு காணும் வகையில் பிரிட்டிஷ் முறைமையில் மாற்றம் கொண்டு வர பிரதமர் ரிஷி சுனக் அவர்களால் இயலுமா என்பதை நாம் பொறுத்திருந்துதான் காண வேண்டும்.

--நன்றி : நியூஏஜ் (நவ.6 –12)

--தமிழில் : நீலகண்டன்,

என்எப்டிஇ, கடலூர்

 

நியூஏஜ் தலையங்கம் -- பாசிசமும் முசோலினியும்

 

நியூஏஜ் தலையங்கம் (நவ.6 –12)

பாசிசமும் முசோலினியும்

          நமக்கு முன் மீண்டும் வந்து நிற்கிறது அக்டோபர் 31, நூறு ஆண்டுகளுக்கு முன் இந்த நாளில்தான், முசோலினி ஆயுதம் தாங்கிய தனது இளைஞர் ‘கருஞ்சட்டை படை’யுடன் பேரணியாக இத்தாலி தலைநகர் ரோம் நகரில் நுழைந்தான். அதன் முன்பே 1922 அக்டோபர் 28ல் இத்தாலிய மன்னர் விக்டர் இமானுவேல், முசோலினியை நாட்டின் பிரதமராக ஏற்க வேண்டிய நிர்பந்தத்திற்கு ஆளானார். ஆனால் அனைத்தும் அத்தோடு முடியவில்லை. ஜனநாயகத்தை அழிப்பது என்ற ஒற்றை லட்சியத்துடன் முசோலினி 1925ல் படுகொலை அட்டூழியம் ஒன்றை நடத்த, காட்டுமிராண்டித்தனமான கொலைகள் அவனது பயங்கர ஆட்சியை நிறுவ உதவின. ஏதேச்சிகாரத்தை நோக்கி நடந்த அவனது ஆட்சியின் வேர்களில் பயங்கரத்தைக் கட்டியமைத்தான் என்ற உண்மைக்கு மாறாக அதற்கு அவன் ‘முழுமையான அரசு’ (டோட்டாலிடேரியன் ஸ்டேட்) என்று பெயரிட்டான். சர்வாதிகாரத்திற்கு அப்படி ஒரு ஒரு பெயர்!

    இந்தியர்களாகிய நமக்கும் 1925ம் ஆண்டு முக்கியமானது. அதே ஆண்டில்தான் செப்டம்பர் 27ல் ராஷ்ட்ரிய சுயம்சேவக் சங் பிறந்தது, (கம்சனுடன் அவன் எதிரி கிருஷ்ணன் பிறந்தது போல) கூடவே அதனை வீழ்த்தும் இந்தியக் கம்யூனிஸ்ட் கட்சி

1925 டிசம்பர் 26ல் பிறந்தது. முசோலினி 1925 அக்டோபர் 28ஐ “பாசிசப் புரட்சி தினம்” என்று பிரகடனம் செய்தான். ஆனால் அந்தப் புரட்சி ஒருபோதும் நிறைவேறவில்லை. அதற்கு முன்பே, பாசிசத் தாக்குதல்கள் மற்றும் முடிவற்ற இடையூறுகளையும் மீறி ஏப்ரல் 6ல் PCI அல்லது இத்தாலிய கம்யூனிஸ்ட் கட்சி தேர்தல்களில் பங்கெடுத்தது; பல இடங்களை வென்றதுடன் 2,68,000 வாக்குகளையும் பெற்றது. வெற்றி பெற்றவர்களில் அன்டனியோ கிராம்சி மிகப் பிரபலமான தலைவராவார்.

       1920களின் பத்தாண்டுகள், மட்டியோட்டி நெருக்கடி வெடித்தபோது குறிப்பிடத்தக்க சில இன்னல்களை ஏற்படுத்தியது. பாசிசவாதிகளால் கொடூரமாகக் கொலை செய்யப்பட்ட மட்டியோட்டி ஒரு சோஷலிச நாடாளுமன்றவாதி. இத்தாலி நாடு கடும் முரண்பாடுகளில் சிக்கி கூறுபட்டது. பாசிசத்திற்கு எதிரான சக்திகள் தலைநிமிரத் தொடங்கின, (இத்தாலி கம்யூனிஸ்ட் கட்சியின் ஸ்தாபன உறுப்பினரும் செயலாளருமான) பால்மிரோ டோக்ளியாட்டி மற்றும் அன்டோனியோ கிராம்சி போன்றவர்கள் பாசிச ஆட்சிக்கு எதிராக ஐக்கிய முன்னணிக்கு ஆதரவாகப் பிரச்சாரம் செய்து எழுதத் தொடங்கினர்.

      1931ல் ஜெர்மனியில் ஏற்பாடு செய்யப்பட்ட இத்தாலிய கம்யூனிஸ்ட் கட்சியின் 4வது கட்சிப் பேராயத்தில் இத்தாலியத் தலைவர் டோக்ளியாட்டி ‘ஐக்கிய முன்னணி’

என்ற முழக்கத்தை முன் வைத்தார்; அவரது முன்முயற்சியில் புரட்சியாளர்கள், டிராட்ஸ்கியவாதிகள், சோஷலிஸ்டுகள் மற்றும் கம்யூனிஸ்ட்கள் ஒன்றாகத் திரண்டு 1934 ஆகஸ்ட் 17ல் ஓர் உடன்பாட்டிற்கு வந்தனர். விரைவில் 1935ல் கம்யூனிஸ்ட் அகிலத்தின் 7வது பேராயத்தில் (பல்கேரிய கம்யூனிஸ்ட் தலைவரும், 1935முதல் 1943வரை கம்யூனிஸ்ட் அகிலத்தை வழிநடத்தியவருமான) ஜார்ஜ் டிமிட்ரோ, (படம்) பாசிசத்தைத் தோற்கடிக்க நாடுகள் மற்றும் வர்க்கங்களின் ஒற்றுமையை வலியுறுத்தினார்.

     இந்த நாட்களின்போதுதான் இத்தாலிய கம்யூனிஸ்ட் கட்சித் தலைவர் டோக்ளியாட்டி, “பாசிசம் தனது பலத்தை எங்கிருந்து பெறுகிறது” என்ற அவரது

கட்டுரையில், ‘பாசிசத்தை அதனுடைய உண்மையான நிறங்களில் அங்கீகரிக்க வேண்டும்’ என எழுதினார். அதாவது பாசிசத்தை ஆழமாகப் புரிந்து கொள்ள வேண்டும். அர்த்தமற்ற அறிக்கைகள் மற்றும் கிளிப் பிள்ளை கோட்பாடுகளை மீண்டும் திரும்பச் செய்வதற்கு எதிராக அவர் எச்சரித்தார்; பிற நாடுகளின் எதார்த்த சூழல்களில் இத்தாலியப் பாசிசத்தின் உதாரணத்தை எந்திரத்தனமாகப் பயன்படுத்தக் கூடாது எனவும் எச்சரித்தார். இத்தாலியில் எவை எல்லாம் உண்மையோ, அப்படித்தான் அவை பிற நாடுகளிலும் உண்மையாகும்; ஆனால் அவை எப்போதும் அப்படியே இருப்பதில்லை எனவும் அழுத்தமாகக் கூறினார்.

          அவர் தனது உரைகளில் பாசிசத்தின் தோற்றம், அதன் கட்டமைப்பு மற்றும் வர்க்க குணாம்சம் முதலியவற்றை ஆராய்ந்து அவற்றைக் குறித்தும், ஜெர்மனியின் நாசிசம் மற்றும் இத்தாலியின் பாசிசம் இவற்றுக்கு இடையேயான வேறுபாடுகளையும் எடுத்துக் கூறினார். பாசிசத்தை அதனது உண்மையான கலரில் தோலுரித்துக் காண வேண்டும், அது ஒரு போதும் முதலாளித்துவ ஜனநாயகத்தின் இன்னொரு வடிவம் இல்லை. என்னதான் ஜனநாயகத்திற்கு வரையறைகள் கட்டுப்பாடுகள் இருந்தாலும், ஜனநாயகம் ஒருபோதும் பாசிசத்தின் மற்றொரு வடிவம் அல்ல. மேலும் பாசிசம், ஒடுக்குமுறை குணத்துடன் மக்கள் ஆதரவு இல்லாத ஜனநாயக ஆட்சி போன்றதல்ல. பாசிசத்தை டோக்ளியாட்டி, ஆணாதிக்கச் சக்திகளின் பயங்கரவாதச் சர்வாதிகாரம் என்றும், அதுதான் ஏகாதிபத்தியவாத மற்றும் நிதிமூலதனப் பிற்போக்கு அம்சங்கள் எனவும் வரையறுத்தார். பாசிசம், ஏகபோக மூலதனத்தின் வளர்ச்சிக்கு ஆதரவான ஜனரஞ்சகக் களத்தைத் தயாரிக்கிறது.

       மேலும்,  பெட்டி அலுவலக ஊழியர்கள் (பெட்டி என்ற பிரெஞ்ச் வார்த்தைக்கு மதிப்புக் குறைந்த, தாழ்வான, இரண்டாம் தரம் என்று பொருள்படும்), மற்றும் தங்கள் சொந்த அடையாளம் இழந்த சிவில் பணியாளர்கள் மத்தியில் பாசிசம் தனது பரவலான ஜனரஞ்சக ஆதரவு அடித்தளத்தைத் தயாரிக்கிறது என டோக்ளியாட்டியும் பிற கம்யூனிஸ்ட்களும் 13வது ப்ளீனம் மாநாட்டில் வற்புறுத்தினர். இது குறித்து லெனின், பாசிசம் பரிணாமடைந்த தொடக்க காலத்தில் வளர்ச்சிபெற்ற அந்த ஜனநாயக அம்சங்களிலிருந்து ஏகாதிபத்தியவாதிகளும் ஏகபோக முதலாளிகளும், முதல் உலகப் போரின்போதே, அதைப் புறக்கணித்து ஒதுங்கிச் சென்றதைக் கண்டதாகக் கூறுகிறார்; மேலும் அதற்கு மாறாக அவர்கள் அவற்றின் மீது தாக்குதல் தொடுக்கவும் முயன்றார்கள் என்கிறார்.

      உண்மையில், இந்தப் புதியப் பொருளாதாரத்தின் அம்சம், ஏகபோக முதலாளித்துவ அம்சத்தைக் கொண்டிருக்கிறது; அது, அரசியல் ஜனநாயக முறைமையிலிருந்து அரசியல்

பிற்போக்குத்தன முறைமையாக வளர்கிறது. இது ஜனநாயகத்திலிருந்து விடுதலை பெற்ற போட்டியின்படி (அமைந்து) அரசியல் பிற்போக்குத்தனமான ஏகபோகப் பொருளாதாரத்தைப் பின்பற்றுகிறது. மாமேதை லெனின் அவதானித்து குறிப்பிட்டார்: ‘இங்கே ஏகபோக மூலதனத்தின் இயல்பான போக்கு ஜனநாயகத்தின் மீது தாக்குதல் நடத்தி அப்பட்டமான ஏதேச்சிகார ஆட்சியை நிறுவுவதே’. அவர் எப்போதுமே ஜனநாயகத்தின் வரையறுக்கப்பட்ட பங்கை விமர்சிப்பார், மேலும் சோஷலிச ஜனநாயகத்தை வலியுறுத்துவார். ஆனால் அதன் பொருள் முதலாளித்துவ முறையில் லெனின் ஜனநாயகத்தை நிராகரிக்கிறார் என்பதல்ல; மாறாக, முதலாளித்துவத்தில் ஜனநாயகத்தைப் பாதுகாப்பதற்கும் மற்றும் எவ்வாறு முதலாளித்துவ ஜனநாயகம் பாதுகாக்கப்பட வேண்டும் என்பதற்கும் ஆதரவாகவே லெனின் நின்றுள்ளார்.

     பதின்ஆண்டுகள் பல பல கடந்த பிறகும், இந்த உண்மைகள் மாறாது நிலைத்துள்ளன. இந்தியாவே ஓர் உதாரணம்தான். நமது நாட்டின் பொருளாதாரப் பரப்பின் மீது நிதிமூலதனம் ஆட்சி செலுத்துகிறது. இதற்குமுன் காணாத மட்டங்களுக்குச் சுரண்டலின் உயர் மட்டம் சென்றுள்ளது. பாசிசம், கார்ப்பரேட் அரசுக் கோட்பாட்டை வழங்கியது; ஆனால் கார்ப்பரேட்- மயமாக்கல் அதுவே, முரண்பாடுகளின் ஊற்றுக் கண்ணாக நிரூபித்துள்ளது. மக்களின் பிரதிநிதித்துவம் கண்ணுக்குப் புலப்படும் ஒரு வெளியாக நாடாளுமன்றம் பயன்படுகிறது. அதனைப் பாசிசம், தனது தாக்குதலுக்கான முதலாவது இலக்குகளில் ஒன்றாக ஆக்கியது. மக்கள் கூட்டத்தின் மீது சட்டங்கள் சுமையாக ஏற்றப்பட்டு, இதற்கு மேலும் சுமக்க இயலாது என்ற நிலைக்கு ஆக்கியுள்ளது. [தற்போது நம் நாட்டில்[ அதிரடியாகக் கொண்டுவரப்படும் வேளாண் சட்டங்கள், தொழிலாளர் குறுங்குறிகள், குடியுரிமை சட்ட திருத்தம் போன்று மக்கள் மீது ஏற்றப்படும் சட்டங்களின் சுமையைச் சுட்டிக் காட்டலாம். –மொழிபெயர்ப்பாளர் இணைத்தது] ஆனால் மக்கள் நம்பிக்கை இழந்துவிடவில்லை, அவர்களின் நன்நம்பிக்கை இன்னும் உயிர்ப்போடு உள்ளது – காரணம், அவர்களுக்குத் தெரியும் சரித்திரம் முசோலியையும் விட்டுவைக்கவில்லை. அவரும் மக்கள் திரளைச் சந்திக்க வேண்டி வந்தது, மற்றவர்களை முசோலினி எப்படி நடத்தினாரோ அதனையே மக்களும் அவருக்குத் திரும்ப வழங்கினர்.

    (1945 ஏப்ரல் 27-ல் மாறுவேடத்தில், முசோலினி சுவிட்சர்லாந்துக்குத் தப்ப முயன்றபோது, இத்தாலி அரசு எதிர்ப்புப் படை வீரரால் அடையாளம் காணப்பட்டு, மறுநாள் மிலன் நகருக்குக் கொண்டு செல்லப்பட்டார்; மக்கள் கூடும் சதுக்கத்தில் பெரிய கம்பத்தில் கட்டித் தொங்க விடப்பட்டு சுட்டுக் கொல்லப்பட்டார். அவரது மனைவி கிளாரா பெட்டாசி, அவளுடைய தம்பி மார்செலோ பெட்டாசியும் சுட்டுக் கொல்லப்பட்டனர். அவரது அமைச்சர்களுக்கும் அரசு அதிகாரிகளுக்கும் இதே கதிதான். ஹிட்லருக்கும் அதே முடிவுதான்)

வரலாறு சர்வாதிகாரிகளுக்குக் கோர முடிவையே வழங்கியது! 

--தமிழில் நீலகண்டன்,

என்எப்டிஇ, கடலூர்

கம்யூனிஸ்ட் தலைவர்கள் வரலாறு 74 -- YV கிருஷ்ணா ராவ்

 கம்யூனிஸ்ட் தலைவர்கள் வரலாறு 74

               

வொய் வி கே – புகழ்பெற்ற வேளாண் நிபுணர்                              மற்றும் கட்சி அமைப்பாளர்

                                                                         --அனில் ரஜீம்வாலே

‘YVK’ என்று பிரபலமாக அன்புடன் அழைக்கப்படும் YV கிருஷ்ணா ராவ் விவசாயிகளின் தலை சிறந்த தலைவர், வேளாண் பிரச்சனைகளில் நிபுணர் மற்றும் ஆந்திரப் பிரதேசத்தில் குறிப்பாக ராயலசீமா பகுதிகளிலும் அனைத்திந்திய மட்டத்திலும் கட்சியைக் கட்டியவர். அவர் ஒரு திறன் வாய்ந்த மார்க்சிய அறிஞர்.

            கிருஷ்ணா ராவ் 1915 செப்டம்பர் 15ல் ஆந்திரா, கிருஷ்ணா மாவட்டம், கண்ணவரம் தாலுக்கா, பேடா அவுட்டபள்ளி என்ற இடத்தில் (விஜயவாடா விமானநிலையத்திலிருந்து 7.5 கிமீ) சுமார் 5 ஏக்கர் நிலம் வைத்திருந்த நடுத்தர விவசாயக் குடும்பத்தில் பிறந்தார். குடும்பத்தினர்கள் விவசாயத்திற்கு உதவிக்கு ஆட்களை அமர்த்தாமல் வயல்வெளிகளில் வேளாண் பணிகளைச் செய்தனர். கிருஷ்ணா மூன்று நான்கு வயதிலேயே ஆடுமாடுகள் பராமரிப்பில் ஈர்ப்புக் கொண்டார். இரண்டு ஆண்டுகளுக்குப் பிறகு அவரது தந்தை தெலுங்கு மற்றும் கணக்கு முதலிய பாடங்களைக் கற்க உள்ளூர் பள்ளியில் சேர்த்தார்.

            காங்கிரஸ்காரர்களின் வீட்டில் தங்கியிருந்த பள்ளி முதல்வரை அணுகி பின்னர் அவர் ஆங்கிலமும் படித்தார். இவ்வாறு கிருஷ்ணா ராவ் தேசிய மற்றும் காங்கிரஸ் கொள்கைகளில் இணக்கமாகத் தொடங்கினார்.

            1928ல், அவருக்கு 13 வயதே ஆனபோது, சைமன் குழு புறக்கணிப்புக் குறித்து அவர் படித்தார். 1931ல் கண்ணவரம் உயர்நிலைப் பள்ளியில் அவர் இரண்டாவது பாரம் வகுப்பில் சேர்ந்தார். அன்றைய நாட்கள் பொருளாதார மந்தநிலை நிலவிய காலம்.

காந்தியடிகள் விஜயம்

            1929 ஏப்ரலில் காந்திஜி கிருஷ்ணா மாவட்டத்திற்கு விஜயம் செய்தபோது எல்லா இடங்களிலும் அவர் மிக உற்சாகமான வரவேற்பைப் பெற்றார். அதில் மிகவும் ஈர்க்கப்பட்ட ராவ் காதி உடை அணிய முடிவு செய்தார், அதன்படியே இறுதி மூச்சுவரை அவர் தொடர்ந்து கதர் ஆடை அணிந்தார்! 1930ல் சட்ட மறுப்பு இயக்கத்தில் பங்கு பெற்ற அவர் கள்ளுக்கடை மறியல், அன்னியத் துணிக் கடைகள் புறக்கணிப்பில் ஈடுபட்டார். காங்கிரஸ்காரர்கள் ‘சவுடு’ நிலத்தின் மேல் மண்ணிலிருந்து உப்பு தயாரிப்பது வழக்கம், அப்படித் தயாரித்து அதனை பாக்கெட்டுகளில் கிராமத்தினருக்காக எடுத்து வருவர். மலபார் ரிசர்வ் போலீஸ் அவர்களை அடித்துத் துவைப்பார்கள். கிருஷ்ணா ராவும் உப்பு தயாரித்துக் கிராம மக்களிடம் காட்டுவார்.

            கிருஷ்ணாவும் நண்பர்களும் பகத்சிங் மற்றும் தோழர்கள் தூக்கிலிடப்பட்டதற்காக மிக வருத்தமுற்றனர். அவர்களுக்கு அஞ்சலி செலுத்தி நடத்தப்பட்ட கூட்டத்தில் கிருஷ்ணா ராவும் பேசினார். அனைத்துச் சாதியினரும் பேதமின்றி கலந்து கொள்ளும் சமபந்தி விருந்தில் அவர்களுடன் அமர்ந்து அவரும் சாப்பிட்டார்.

            பீகார் பூகம்பத்தின்போது, டாக்டர் பட்டாபி சீத்தாராமையாவின் நெருங்கிய சகாவான காங்கிரஸ்காரர் காலா வெங்கட ராவ் ஒருங்கமைத்த நிவாரணப் பணிகளில் அவர் ஈடுபட்டார்.

SSLC பள்ளி இறுதித் தேர்வு

            கேள்வித்தாள் ‘வெளியாகி’விட்டதென்ற சர்ச்சைக்குப் பிறகு கிருஷ்ணா ராவ் மார்ச் 1936ல் எஸ்எஸ்எல்சி தேர்வுகளில் தேர்வு பெற்றார். காப்பி அடித்ததாகக் குற்றம்சாட்டி ஆறு மாணவர்களின் தேர்வு முடிவுகளை அதிகாரிகள் நிறுத்தி வைத்தனர். மீண்டும் அவர்களுக்கு மட்டும் மறுதேர்வு நடத்தலாம் என்று ராவ் விளக்கிய பிறகு மறுதேர்வில் அவர்கள் பாராட்டத் தக்க உயர் மதிப்பெண்களுடன் தேர்வு பெற்றனர்.

            அமெரிக்கரான ஜெராய் ஸ்ட்ரோக் முதல்வராக இருந்த ஏசி கல்லூரியில் சேர்ந்தார். ஏழை மாணவர்கள் கட்டணமின்றித் தங்கும் விடுதியில் தங்கினார். அங்கே அவர்களுக்கு இலவசமாக இரண்டு நாட்களுக்கு உணவு கிடைத்தது; வாரத்தின் மீதம் உள்ள 5 நாட்களுக்கு குண்டூரில் வசதியாக இருந்த கம்மா இன குடும்பங்களிடம் ‘வாரலு’ அல்லது இலவச உணவுக்காகக் குடும்பத்திற்கு ஒரு நாள் முறை வைத்து வாரம் முழுவதும் சென்றார். (‘பிச்சை புகினும் கற்கை நன்றே’ என்று ஔவையார் இதைத்தான் சொன்னாரோ!)

சோஷலிசத்தின்பால் ஈர்ப்பு

        அவர் கல்லூரியில் படித்த காலத்தில் ஆந்திரக் கம்யூனிஸ்ட் இயக்க முன்னோடிகளில் ஒருவரான போலேபெட்டி நரசிம்ம மூர்த்தியுடன் தொடர்பு ஏற்பட்டது. கிருஷ்ணா ராவுக்கு

அவர் ரஷ்யப் புரட்சி, சோஷலிசம் முதலியவற்றை அறிமுகம் செய்தார்.

 தும்மலா வெங்கடராமையாவின் இளைய சகோதரரான வெங்கடசுப்பையாவுடன் அவர் தனது அறையைப் பகிர்ந்து கொண்டார். அவரிடம் மார்க்சிம் கார்க்கி எழுதிய ‘தாய்’ நாவலையும் பிற மார்க்சிய இலக்கியங்களையும் தும்மலா படிக்கக் கொடுத்தார். கிருஷ்ணா ராவ் காங்கிரஸ் மற்றும் சிபிஐ இரண்டு கூட்டங்களிலும் கலந்து கொண்டார். 

     1937 தேர்தல்களில் அவர் காங்கிரசுக்காகப் பணியாற்றினார், மேலும் ராஜமுந்திரி இரயில்வே தொழிலாளர் தொகுதியில் போட்டியிட்ட வி வி நரசிம்மன் மற்றும் விஜயவாடா ஆலைத் தொழிலாளர்கள் பகுதியில் போட்டியிட்ட பி வெங்கடேஸ்வரலுக்காகவும் பாடுபட்டார். அங்கே பிரச்சாரத்திற்கு வந்த ஜவகர்லால் நேரு உரையைக் கேட்டார். நேரு சோஷலிசத்தை ஆதரித்தார்; ஆனால் ஓர் இடத்தில் அவரது உரை வேண்டுமென்றே தவறாக, அப்படியே எதிரிடையாகப் பொருள்பட மொழிபெயர்க்கப்பட்டது. மொழிபெயர்த்தவரை எதிர்த்துக் கூச்சல் எழுந்தது. 

          காங்கிரஸ் சோஷலிசக் கட்சி கூட்டத்தில் உரையாற்ற எஸ் ஏ டாங்கே குண்டூர் வந்தார். அணு இயற்பியல் விஞ்ஞானத்திருந்து உதாரணங்களைக் கூறி இயங்கியல் பொருள் முதல் வாதமே சரியானது என்பதை அவர் விளக்கியது, கிருஷ்ணா ராவிடம் ஆழமான தாக்கத்தை ஏற்படுத்தியது.

        கணிதவியல், இயற்பியல் முதலான பாடங்களில் அவர் மார்ச் 1937ல் இன்டர் மீடியட் தேர்வில் சிறப்புத் தகுதியுடன் தேர்வானார். இதற்குச் சற்று முன்னதாக அவருக்குச் சிபிஐ உறுப்பினர் அட்டை வழங்கப்பட்டது. பின்னர் அவர் பி எஸ்சி (இயற்பியல்) பட்டப் படிப்பில் சேர்ந்தார்.

            பிறருடன் அவர் 1937 ஆகஸ்டில் குண்டூரில் ஏற்பாடு செய்த மாகாண மாணவர்கள் மாநாட்டில் எஸ் எஸ் பாட்லிவாலா மற்றும் ஹஸ்ரா பேகம் (படம்) உரையாற்றினர். 1937ல்

தடுப்புக் காவலுக்கு எதிரான மாணவர்கள் போராட்டத்தில் கிருஷ்ணா ராவ் தீவிரமாகப் பங்கேற்றார்; ஏசி கல்லூரிக்கு எதிரே அவர் மறியலுக்குத் தலைமையேற்றார். கல்லூரியின் பர்சராக (நிதி நிர்வாகி) இருந்த ஸ்பைஸ் என்ற அமெரிக்கர் கொடூரமான பேர்வழியாக இருந்தார். கிருஷ்ணா ராவும் மற்றவர்களும் கல்லூரி கேட்டின் முன் படுத்து மறியலில் ஈடுபட்டபோது ஏறத்தாழ அவர்கள் மீது ஏற்றுவதுபோல ஸ்பைஸ் தனது காரை ஓட்டி வந்தார். கிருஷ்ணா ராவ் காயமடைந்தார், மாணவர்கள் ‘ஸ்பைஸ், திரும்பிப் போ!’ என சீற்றத்தோடு முழங்கினர், YV கிருஷ்ணா ராவ் கதாநாயகனானார்!

          காங்கிரசின் ஹரிபுரா மற்றும் திரிபுரி அமர்வுகளுக்கு அவர் நிதி திரட்டினார். மேலும் ராய் குழுவினர் 1938ல் நடத்திய எம் என் ராய் கூட்டத்திலும் கலந்து கொண்டார், ஆனால் அவருடன் உடன்படவில்லை.

       1939 செப்டம்பர் 1, 2 தேதிகளில் காக்கிநாடாவில் நடத்தப்பட்ட மாணவர்களின் மாகாண மாநாட்டைச் சுபாஷ் சந்திர போஸ் தொடங்கி வைத்தார். காக்கிநாடாவின் பிரபல கம்யூனிஸ்ட்டான சிவிகே ராவ் வீட்டில் கம்யூனிஸ்ட் மாணவர்கள் தங்கள் கூட்டத்தை நடத்தினர்.

போருக்கு எதிரான செயல்பாடுகள்

       போருக்கான ஆளெடுப்புக்கு எதிரான இயக்கத்தில் ஆளெடுப்பு நடைபெற்ற குண்டூர் மருத்துவமனைக்குள் கிருஷ்ணா ராவ், எம் ஹனுமந்த ராவ் மற்றும் மற்றவர்கள் நுழைந்து கண்டன ஆர்பாட்டம் நடத்த, போலீசாரின் பிரம்படி தாக்குதலுக்கு ஆளாயினர். மாலையில் ‘ஏகாதிபத்திய’த்தின் கொடும்பாவி எரிக்கப்பட்டது, ஒரு சவப்பெட்டி (‘பாடை’) கட்டப்பட்டது. எம் ஹனுமந்த ராவ் முற்போக்கு இலக்கியங்களுக்காக அமைத்த ‘ஸ்டூடெண்ட் எம்ப்போரியம்’ புத்தகக் கடைக்கு சென்ற அவர்களைப் போலீஸ் கைது செய்ய முயன்றும் முடியவில்லை.

       1940 ஜனவரி 26ல் தேசிய மூவர்ணக் கொடியை ஏற்ற இந்தியக் கம்யூனிஸ்ட் கட்சி அறைகூவல் விடுத்தது. இரவு நேரத்தில் சென்று கிருஷ்ணா ராவ் பல இடங்களில் கொடி ஏற்றினார். 1940 மார்ச்சில் அவர் பிஎஸ்சி இளங்கலைப் பட்ட இறுதித் தேர்வில் வென்று தனது கிராமத்திற்குத் திரும்பிச் சென்றார், இந்தி மொழி கற்றார். கட்சியின் ரகசிய செல் அமைப்புகளையும் ஏற்படுத்திய அவர் கட்சி வகுப்புகள் நடத்தினார்.

திருமணம்

            தனது மூத்தவர்களின் எதிர்ப்பை மீறி தெனாலி தாலுக்கா முசுனூரி வெங்கடசுப்பையா மகள் பாக்கியவதியை 1940 ஆகஸ்ட் 30ல் கிருஷ்ணா ராவ் திருமணம் செய்து கொண்டார். மிகக் குறைவான சடங்குகள், மாலை மாற்றலுடன் மரபுவழி அல்லாத எளிய திருமணமாக நடந்தது. தேசிய இயக்கத்தில் தீவிரமாக ஈடுபட்ட பாக்கியவதி கதர் ஆடை அணிந்து கதர் பிரச்சாரம் செய்வார். 1933ல் காந்திஜி விஜயவாடா வந்தபோது அவர் தனது தங்க வளையல்களை நன்கொடையாக வழங்கினார்.

ஜப்பான் குண்டு வீச்சு

            இரண்டாவது உலகப் போரின்போது ஜப்பான் 1942 ஏப்ரல் 7ல் விசாகப்பட்டினம் மற்றும் காக்கிநாடா மீது குண்டு வீச, அதன் படையினர் இந்திய மண்ணின் பகுதிகளை ஆக்கிரமித்தனர். பிரிட்டிஷ் அரசு கண்ணவரத்தில் விமானதளம் கட்டும் பணியை மேற்கொள்ள தேவையான கற்கள் மற்றும் களிமண் சுமந்து செல்லும் வண்டியோட்டிகளைத் திரட்டியது. அவர்கள் நியாயமான ஊதியம் கோரினர். ஆனால் போராடத் தொடங்கிய பிறகே கோரிக்கைகள் நிறைவேறின. இந்தச் செயல்பாடுகளில் கம்யூனிஸ்ட்கள் பங்கெடுத்தனர். 

            கிருஷ்ணா ராவ் பேஜ்வாடா சென்று வேளாண்மை மற்றும் தொழில் துறையில் ரூ30 மாத ஊதியத்தில் எழுத்தர் பணியில் சேர்ந்தார். உள்ளூர் சிபிஐ அலுவலகம் விஜயம் செய்தார்.

பெண்களுக்கான பயிற்சி முகாம்

            சிபிஐ, பெண்களுக்கான பயிற்சி முகாம் ஒன்றை அம்மாகாணத்தில் அமைத்தது. அதில் பாக்கியவதியும்கூட ஆர்வமாகப் பங்கெடுத்தார். வான்வழித் தாக்குதலிருந்து பாதுகாப்பு (ஏர் ரைடு புரொட்டெக்க்ஷன்) அளிப்பதிலும் பயிற்சி அளிக்கப்பட்டது. பிரஜாசக்தி, பியூபிள்ஸ் வார் முதலான கட்சிப் பத்திரிக்கைகளைப் பாக்கியவதியும் பிற பெண்களும் விற்றனர்.  1943 தொடக்கத்தில் கட்சி, கிருஷ்ணா ராவிடம் வேலையை ராஜினாமா செய்து கட்சி முழுநேர ஊழியராகப் பணியாற்றுமாறு பணித்தது, அவரும் அவ்வாறே செய்தார். முதலில் ரூ30, பின்னர் ரூ60 மற்றும் 1957 –58ல் ரூ 100கூட மாத ஊதியமாகப் பெற்றார்.

கட்சி மற்றும் கிசான் பணி

            ரஜனி பால்மே தத் எழுதிய ‘இன்றைய இந்தியா’ புத்தகத்தை முதன் முதலாக தெலுங்கு மொழியில் கே சத்தியநாராயணா, ட்டி வெங்கடராமையாவுடன் இணைந்து கிருஷ்ணா ராவ் மொழிபெயர்த்து “நேதி பாரதம்” என்ற பெயரில் பதிப்பித்தனர். சிபிஐ விஜயவாடா நகரக் குழுவின் உறுப்பினராகக் கிருஷ்ணா ராவ் இருந்தார். 1943ல் ஆந்திரா மாகாணக் குழு அவரிடம் மாகாண கிசான் சபாவின் பொறுப்பேற்குமாறு பணித்தது.

            கிசான் அமைப்பில் அலுவலகச் செயலாளராகக் கிருஷ்ணா ராவ் சேர்ந்து, 1945ல் அதன் செயற்குழுவில் இணைத்துக் கொள்ளப்பட்டார்.

            எட்டாவது அனைத்திந்திய கிசான் மாநாடு விஜயவாடாவில் 1944 மார்ச் 13 மற்றும் 14 தேதிகளில் நடைபெற்றது. அரசு உணவுப் பற்றாக்குறை மற்றும் கொள்ளை நோய் பரவல் என்ற சாக்கில் இரயிலில் செல்ல டிக்கெட் வழங்குவதை நிறுத்தி விட்டது. இருப்பினும் பிரதிநிதிகள் படகுகளிலும், கால் நடையாகப் பல காத தூரம் நடந்தும் வந்து சேர்ந்தனர். அருகிலிருந்த கிராமங்களிலிருந்து விவசாயிகள் மாட்டு வண்டிகளில் காய்கறிகள் மற்றும் பழங்களைக் கொண்டு வந்தனர். நகரம் முழுவதும் எலுமிச்சை பழங்களாலேயே அழகழகான அலங்காரங்கள், சாலைகளிலும்கூட, பெண்களால் செய்யப்பட்டது. அங்கு ஒரு லட்சத்திற்கும் மேல் கூடினர். அம்மாநாட்டுப் பணிகளில் YVK மற்றும் பாக்யவதி தீவிரமாகப் பங்கேற்றனர்.

‘பந்தர் கால்வாய்’ தூர்வாரல்

            வங்கத்தில் மட்டுமல்லாமல் ராயல சீமா, வடக்கு விசாகா முதலிய பகுதிகளிலும் பஞ்சம் வெடித்தது. கிருஷ்ணா ராவ் தீவிர நிவாரணப் பணிகளில் ஈடுபட்டார். பந்தர் கால்வாயில் அண்டை வெட்டி, கால்வாயில் படிந்து குவிந்த சேறு அகற்றி மராமரத்துப் பணிகளை மேற்கொண்ட கிசான் சபா, கால்வாயை 1944 ஜூன் 1ம் நாள் மீண்டும் பயன்பாட்டிற்குத் திறந்தது. ஒப்பந்ததாரர்கள் வராத நிலையில் கட்சி மிகவும் சுறுசுறுப்பாகி, குறித்த காலத்தில் பணியை முடிக்கக் கிசான் சபா பொறுப்பேற்றது. பெண்கள் உட்பட 3000க்கும் மேற்பட்ட தன்னார்வத் தொண்டர்கள் பல்வேறு அணிகளில் (ஜாட்டுலு) பணியாற்றியபோது, சிறப்பு கலாச்சாரக் குழுகள் அவர்களை உற்சாகப்படுத்தியது. இடதுசாரி காங்கிரஸ்காரர்களும்கூட இணைந்து கொண்டனர். நம்ப முடியாத வேகத்தில் கால்வாயின் பெரும் தொலைவு பரப்புகள் தூர் வாரப்பட்டு காலத்தில் பணி முடித்தனர்.

     இந்த இயக்கத்தில் கிசான் சபா சார்பாகக் கிருஷ்ணா ராவ் அரசு ஓவர் சீயருக்கு (கண்காணிப்பாளர்) உதவியாளராக இருந்தார்.

பெருந்திரள் விவசாயிகள் இயக்கம்

      1945ல் தெனாலியில் நடைபெற்ற மாகாண விவசாயிகள் மாநாட்டில் கிருஷ்ணா ராவ் அதன் செயற்குழுவிற்குத் தேர்ந்தெடுக்கப்பட்டார். அரசு தடைசெய்ய முயன்றது, ஆனால் அவர்கள் விவசாயிகள் காங்கிரசுடன் கூட்டு சேர்ந்து அந்நடவடிக்கையை முறியடித்தனர்.

      இரண்டாம் உலகப் போருக்குப் பின் ஏற்பட்ட எழுச்சியில் நிலப்பிரபுத்துவத்திற்கு எதிரான ‘கட்லா உத்யமம்’ (‘bunds movement’) என்ற இயக்கம் [அதனைத் தோராயமாக, நீரைத் தேக்கும் ஏரி போல வயல் பரப்புகளை ஒரு தொகுப்பாக வரப்புக் கட்டுவது எனலாம்], பல இடங்களில் வெடித்தது; குறிப்பாக 1946 தேர்தல்களில் காங்கிரஸ் வெற்றிக்குப் பிறகு ஒரு சாதகமான நிலை உருவானது. கட்சி மற்றும் கிசான் அமைப்புகள் தலைமையில் விவசாயிகள் நிலப்பிரபுக்களிடமிருந்து நிலங்களைக் கைப்பற்றி நிலத் ‘தொகுப்பு’களை (‘bunds’) ஏற்படுத்தி அதனைத் தங்களிடையே பிரித்துக் கொண்டு தங்கள் நிலங்களில் மீண்டும் அமர்ந்தனர்.

       ஆந்திர மகாசபா அமைப்பு இடதுசாரித் தலைமையின் கீழ், முக்கியமாகச் சிபிஐ கீழ், வந்தது. 1947 வாக்கில் கிருஷ்ணா ராவ் ‘ராயத்து சங்கம்’ (விவசாயிகள் அமைப்பின்) எல்லா பொறுப்புக்களையும் தம் தோள்களில் சுமந்தார்.

        1947 மே - ஜூனில் கிசான் போராட்டம் தொடர்பாக சி இராஜேஸ்வர ராவிடமிருந்து ஒரு கடிதத்துடன் கிருஷ்ணா ராவ், அலிகார் சிகந்தர் ராவில் நடந்த அனைத்திந்திய கிசான் சபா (AIKS) மாநாட்டில் பி சி ஜோஷியைச் சந்தித்தார்.

    1947 ஆகஸ்ட் 15, தேசத்தின் விடுதலை விழா விஜயவாடா மற்றும் பிற பகுதிகளில் பரவலாகக் கொண்டாடப்பட்டது. பிரம்மாண்ட பொதுக் கூட்டங்களில் கிருஷ்ணா ராவும் உரையாற்றினார்.

       1948 ஜனவரி 30ல் தேசத் தந்தை மகாத்மா காந்திஜி படுகொலை செய்யப்பட்டார். கடும் சீற்றமடைந்த மக்கள் ஆர்எஸ்எஸ் ஆட்களை அடித்து உதைத்தனர். போலீஸ் இத்தாக்குதல்களுக்குக் கம்யூனிஸ்ட்கள் மீது பழி சுமத்த முயன்றனர்.

     சிபிஐ இரண்டாவது கட்சிப் பேராயத்தில் (1948 கல்கத்தா) விஜயவாடாவிலிருந்து கலந்து கொள்ளச் சென்ற கிருஷ்ணா ராவ் வழியில் வைசாக் மற்றும் பிறகு கட்டாக்  சென்றார். கல்கத்தா பேராயத்தில் கிருஷ்ணா ராவ் முழுமையாகப் பிடிஆர் பாதையை ஆதரித்தார்.

ராயலசீமாவும் ஆயுதப் போராட்டமும்

      மக்கள் தெலுங்கானா ஆயுதப் போராட்டம் பற்றிப் பேசினாலும், குறிப்பிடத்தக்கப் பெரும் போராட்டம் 1948 – 50ம் ஆண்டுகளின்போது கல்கத்தாவைத் தொடர்ந்து ராயலசீமா மாவட்டங்களிலும்கூட நடைபெற்றது. 1938 வந்தே மாதரம் போராட்டக் காலங்களிலிருந்தே கிருஷ்ணா ராவ் தெலுங்கானாவுக்கு நன்கு அறிமுகமானவர். 1948 ஆகஸ்ட்டில் கைது செய்யப்பட்ட அவர் போலீஸ் காவலிருந்து தப்பி கமலாபுரம் தாலுக்காகளில் வகுப்புகள் எடுத்தார். போலீஸ் அவருக்கு ‘நால்கொண்டா கம்யூனிஸ்ட்’ என்று பெயரிட்டனர்!.

     ராயலசீமா மாவட்டங்களில் நடைபெற்ற ஆயுதப் போராட்டத்தில் கிருஷ்ணா ராவ் ஒரு முன்னணித் தலைவர் என்பது பெரிதும் அறியப்படாத தகவல். அதில் கலந்து கொள்வதற்காக அனுமதி பெற ஹைத்தராபாத் சென்றார், அனுதியும் தரப்பட்டது. ராயலசீமா பிராந்திய குழுவுக்கு முதலில் பெல்லாரியும் பின்பு பெங்களூரும் தலைமையகமாக இருந்தது, கிருஷ்ணா ராவ் அதன் செயலாளர். அவர் பெங்களூரில் தலைமறைமாக இருந்தார். நூலிழையில் அவர் தப்பினார், அவ்வாறின்றி அவர் கைது செய்யப்பட்டிருப்பின் நிச்சயம் சுடப்பட்டிருப்பார்.

      ராயலசீமா போராட்டத்திற்கு நல்லமாலா காடுகள் பின்வாங்கித் திரும்பச் செல்லும் இடமாக இருந்தது.

   இந்த நிகழ்வுப் போக்கை ‘மூன்று P-களின் கடிதம்’ (‘Three-P’s Letter’) மாற்றியது. [கட்சி வரலாற்றில் அது ஒரு முக்கிய ஆவணம். அந்த ஆய்வறிக்கையைத் தோழர் டாங்கே உள்ளிட்ட மூன்று தலைவர்கள் தயாரித்தளித்தனர். அப்போது தலைமறைவாக இருந்த அத்தலைவர்கள் சூட்டிக்கொண்ட புனைப் பெயர்கள் மூன்றும் ஆங்கில எழுத்து P-யில் தொடங்கியது. எனவே அது ‘மூன்று P-களின் கடிதம்’]. 1951வரை கிருஷ்ணா ராவ் ஆயுதப் போராட்டத்திற்கு ஆதரவாகவே இருந்தார்; ஆனால் விரைவில் அதன் தவறைப் புரிந்து கொண்டார். ஆயுதப் போராட்டம் தொடர்வதை ராவி நாராயண் ரெட்டி, பத்தம் யெல்லா ரெட்டி, மக்தூம் மற்றும் சிலர் உறுதியாக எதிர்த்தனர் என்பதையும் கிருஷ்ணா ராவ் தெரிந்து கொண்டார்.

     தலைமையால் கிருஷ்ணா ராவ் பம்பாய்க்கு அழைக்கப்பட்டார்; எம் பசவயுன்னையா (படம்)

அவரிடம் ஆயுதப் போராட்டத்தைத் திரும்பப் பெற்று தேர்தல்களில் பங்கேற்பதான கட்சியின் முடிவைத் தெரிவித்தார். ஸ்டாலினைச் சந்திக்கச் சென்ற சிபிஐ கட்சிக் குழுவில் டாங்கே, அஜாய் கோஷ், சி இராஜேஸ்வரராவுடன் சென்ற நான்காவது உறுப்பினர் பசவபுன்னையா. பம்பாயில் பசவபுன்னையாவைச் சந்தித்த இப்போது கிருஷ்ணா ராவ் தனது கருத்தை முழுமையாக மாற்றிக் கொண்டார்.

தேர்தல்கள்

            4½ ஆண்டுகள் தலைமறைவு வாழ்க்கைக்குப் பின் 1951 அக்டோபரில் வெளிவந்த கிருஷ்ணா ராவ் சிபிஐ கடப்பா மாவட்டச் செயலாளராகத் தேர்ந்தெடுக்கப்பட்டார். பொதுத் தேர்தல் பணிகளில் ஈடுபட்டார். 1962ல் குடிவாடா நாடாளுமன்றத் தொகுதி இடத்திற்குப் போட்டியிட்ட அவர் தோல்வியுற்றார். 1964 கட்சி பிளவுபட்டதற்குப் பின் அவர் இந்தியக் கம்யூனிஸ்ட் கட்சியில் உறுதியாக நீடித்தார். 1966 முதல் 1978வரை மாநில மேலவை உறுப்பினராக இருந்தார். மொழிவாரி மாநிலங்கள் சீரமைப்பில் ஆந்திரப் பிரதேசம் ஏற்படுத்துவதற்கானப் போராட்டத்தில் அவர் பங்கேற்றார். மேலும் வைசாக் உருக்காலைப் போராட்டக் கிளச்சியில் அவர் தீவிரமாகக் கலந்து கொண்டார்.

பதவி பொறுப்புகள்  

ஆந்திரப் பிரதேசக் கிசான் சபாவின் தலைவராக அல்லது பொதுச் செயலாளராக அவர் பல ஆண்டு காலம் இருந்தார். பின்னர் கிருஷ்ணா ராவ் அனைத்திந்திய கிசான் சபாவின் பொதுச் செயலாளராக அல்லது தலைவராகப் பல ஆண்டுகள் இருந்தார். இந்திய அரசின் வேளாண் விலை ஆணையம் (அக்ரி ப்ரைஸ் கமிஷன்) உறுப்பினராக அவர் இருந்தார்.

இந்தியக் கம்யூனிஸ்ட் கட்சியின் தேசியக் குழு உறுப்பினராக நீண்ட காலத்திற்குப் பொறுப்பு வகித்த கிருஷ்ணா ராவ் மத்திய செயற்குழுவில் 1989 முதல் 1995வரை இருந்தார்.

இறுதி ஆண்டுகள்

        கிருஷ்ணா ராவ் தனது இறுதி ஆண்டுகளை அனைத்திந்தியக் கிசான் சபாவிலும், பின் சிஆர் ஃபௌண்டேஷன் மற்றும் ஹைத்ராபாத் NRRR மையத்தில் அதன் முதல்  இயக்குநராகவும்

பணிசெய்து அர்ப்பணித்தார். பெரும்பாலான தன் நேரத்தைப் படிப்பதிலும் ஆய்வு செய்வதிலும் அர்ப்பணித்தார். அறிவுசார் மையமாக அனைத்திந்திய முற்போக்கு ஃபோரம் அமைப்பை நிறுவுவதில் அவர் தீவிரமாக உதவி செய்தார். YV கிருஷ்ணா ராவ் புத்திசாலித்தனமான அறிவாளி, வேளாண் பிரச்சனைகளில் நிபுணர் மற்றும் இத்தாலிய மார்க்சியவாதி அன்டோனியோ கிராம்சி குறித்த ஆய்வுகளில் சிறப்பு ஆர்வம் எடுத்துக் கொண்டவர். 21ம் நூற்றாண்டில் சோஷலிசம் உட்பட பல பொருட்களின் மீது கோட்பாடு சார்ந்த பிரச்சனைகள் மற்றும் கேள்விகள் மீதான பல்வேறு முக்கிய கருத்தரங்கங்களை (செமினார்) நடத்த அவர் உதவினார். 

      2010 டிசம்பர் 26ல் (இந்தியக் கம்யூனிஸ்ட் அமைப்பு தின நாளில்) இம்மண்ணுலக வாழ்வைவிட்டு மறைந்த YV கிருஷ்ணா ராவ், அறிவார்ந்த செல்வம் மற்றும் பெரும் ஆய்வுப் பாராம்பரியத்தைவிட்டுச் சென்றென்றுள்ளார். அவற்றை நன்கு பயன்படுத்தி அவர் உயர்த்திப் பிடித்த செங்கொடிக்குப் புகழ் சேர்ப்பதே நாம் அவருக்குச் செலுத்தும் செவ்வாஞ்சலி! ஓங்குக அவர் புகழ்!

--நன்றி : நியூ ஏஜ் (அக்.9 –15)

--தமிழில் : நீலகண்டன்,

என்எப்டிஇ, கடலூர்

24வது சிபிஐ கட்சிப் பேராயத்தில் தோழர் யெச்சூரி முழக்கம்

 

ஆர்எஸ்எஸ் – பாஜகவை வெளியேற்ற
மதசார்பற்ற கட்சிகள் ஒன்றுபட வேண்டும்

         -- கட்சிப் பேராயத்தில் தோழர் யெச்சூரி முழக்கம்

சிபிஐ24வது கட்சிப் பேராயப் பொது அரங்கில் அக்டோபர் 15ல் இந்தியக் கம்யூனிஸ்ட் கட்சி (மார்க்சிஸ்ட்) பொதுச் செயலாளர் சீத்தாராம் யெச்சூரி அவர்களின் வாழ்த்துரை பின்வருமாறு:

        “சிபிஐ 24வது கட்சிப் பேராயத்திற்கு இந்தியக் கம்யூனிஸ்ட் கட்சி (மார்க்சிஸ்ட்) சார்பில் எங்களது அன்பான தோழமை வாழ்த்துகள். பேராயத் தொடக்க அமர்வில் கலந்து கொள்ள என்னை அழைத்ததற்கு மிக்க நன்றி. ஏனைய இடதுசாரி கட்சித் தலைவர்களையும் நான் வாழ்த்துகிறேன். இன்று நமது நாடும் மக்களும் சந்திக்கின்ற கடுமையான சவால்களை எதிர்கொள்வதற்காக இடதுசாரி ஒற்றுமையை வலிமைப்படுத்த விரும்பும் நமது பரஸ்பர விழைவை மீண்டும் வற்புறுத்துகிறேன்.

    தோழர்களே நண்பர்களே! ஆந்திர மாநில அரசியல் மையமான விஜயவாடா நகரில் நீங்கள் குழுமியிருக்கிறீர்கள். விடுதலை வரலாற்றில் பல பத்தாண்டுகளாக கம்யூனிஸ்ட்களின் புரட்சிகர நடவடிக்கைகளின் மையமாக இருந்த இந்த நகரம், இன்றும் அவ்வாறே திகழ்கிறது. முக்கிய மக்கள் போராட்டங்களில் ஒன்றான, கொடிய நிலப்பிரபுத்துவ அடக்குமுறைக்கு எதிராக, விவசாயப் பெருங்குடி மக்கள் நடத்திய ஆயுதப் போராட்டம் நடந்த அரசியல் மையத்தில் நீங்கள் கூடியுள்ளீர்கள்.

     இந்த ஆயுதப் போராட்டம் சுமார் 30 லட்சம் விவசாயிகளின் விடுதலையை 18 மாதங்களுக்கு உறுதிப்படுத்தியது; மூவாயிரம் கிராமங்களின் 16ஆயிரம் சதுர மைல்கள் பரப்புள்ள 10லட்சம் ஏக்கர் நிலங்களை விவசாயிகளுக்குப் பகிர்ந்தளித்தது. கம்யூனிஸ்ட் தலைமையில் நடத்தப்பட்ட இந்த ஆயுதப் போராட்டம் மற்றும் பிற பல பகுதி விவசாயிகளின் எழுச்சிகள் –வங்கத்தின் தேபகா இயக்கம், கேரள புன்னப்புரா–வயலாறு, மராட்டியத்தில் வார்லி (பழங்குடி இனமக்களின்) எழுச்சி, அசாமில் சுர்மா பள்ளத்தாக்கு உள்ளிட்ட போராட்டங்கள் – நிலச் சீர்திருத்தம் மற்றும் ஜமீந்தாரி முறை ஒழிப்பு நிகழ்ச்சி நிரலை அரசியல் மைய இடத்திற்குக் கொண்டு வந்தன. கம்யூனிஸ்ட் இயக்கம் மற்றும் கம்யூனிஸ்ட் கட்சி தலைமையிலான மக்கள் போராட்டங்கள் இப்பகுதியில் ஆழமாக வேர் கொண்டுள்ளது. இந்த இடத்தில் கட்சிப் பேராயத்தை நடத்துவது, மேலும் கம்யூனிஸ்ட் செல்வாக்கையும் இடதுசாரி சக்திகள் இடையே ஒற்றுமை மற்றும் ஒருமைப்பாட்டை மேலும் வலிமையாக்கவும் உதவிடும் என்பதில் நான் பெருநம்பிக்கை கொள்கிறேன்.

        தோழர்களே நண்பர்களே! சிபிஐ 24வது கட்சிப் பேராயம் நடைபெறும் தருணத்தில் சுதந்திர இந்தியாவும் நமது மக்களும் எல்லா வகையிலான நெருக்கடிகளையும் கடுமையான சவால்களையும் சந்திக்கின்றன.

     அரசு அதிகாரத்தைச் செலுத்தும் இந்தப் பாஜக அரசு, பாசிச ஆர்எஸ்எஸ் அமைப்பின் இந்துத்துவ வகுப்புவாத நிகழ்ச்சி நிரலைத் தீவிரமாகப் பின்பற்றுகிறது. கெடுமதி பிடித்த வகுப்புவாத பிளவுபடுத்தும் செயல், வெறுப்பு விஷம் தோய்ந்த பிரச்சாரங்கள் மற்றும் வன்முறை, மதச் சிறுபான்மையினரைக் குறிப்பாக முஸ்லீம்களைத் தாக்குதல் இலக்காக்கி, இந்திய அரசியல் சட்டத்தைக் கடுமையாகத் தாக்கிச் சீர்குலைக்கிறது; இந்தியக் குடியரசு அமைப்பின் மதச்சார்பற்ற ஜனநாயகப் பண்புநலனை, ஆர்எஸ்எஸ் செயல்திட்டத்தின்படி   சகிப்புத்தன்மையற்ற பாசிச இந்துத்வ ராஷ்ட்டிராவாக மாற்றப் பிரயத்தனப்படுகிறது.

     அதே நேரத்தில் இந்தப் பாஜக அரசு, வகுப்புவாத – கார்ப்பரேட் உறவுத் தொடர்பை வலிமையாக்க, கேடு பயக்கும் புதிய தாராளமயச் சீர்திருத்தங்களைப் பின்பற்றுகிறது; தேசியச் செல்வாதாரங்களைக் கொள்ளையடித்தும், அரசதிகாரம் சார்ந்த முதலாளித்துவத்தை (க்ரோனி கேப்பிடலிசம்) ஆதரிக்கிறது; அரசியல் ஊழலைச் சட்டபூர்வமாக்கி, முழுமையான அதிகாரத்துவ ஆட்சியைத் திணிக்கிறது: (இவற்றின் மூலம்) மக்களின் ஜனநாயக உரிமைகள் மற்றும் குடிமைச் சுதந்திரங்களைத் தாக்குகிறது.

   தோழர்களே நண்பர்களே! இந்தியக் குடியரசின் குணாம்சத்தை மாற்ற திட்டமிட்ட முறைகளில் முயற்சிகள் நடக்கின்றன. இந்திய அரசியலமைப்புச் சட்ட ஆதாரத் தூண்களான – மதசார்பற்ற ஜனநாயகம், கூட்டாட்சி, சமூக நீதி மற்றும் பொருளாதார இறையாண்மை – இந்நான்கும் தொடர்ந்து தாக்கப்படுகின்றன.

 புதிய தாராளமயப் பொருளாதாரச் சீர்திருத்தங்கள் தறிகெட்டு வேகமெடுக்கிறது. வழக்கமான தனியார்மயப்படுத்தல் மற்றும் கார்ப்பரேட்டுகளுக்கு வரிச் சலுகைகள் வழங்குவதைத் தாண்டி, இந்தியாவின் பொருளாதார இறையாண்மை அழிக்கப்படுவது பல்முனைகளில் நிகழ்ந்து வருகின்றன.

        நமது அரசியலமைப்பில் பொறிக்கப்பட்ட மதச்சார்பற்ற விழுமியங்கள் கடுமையான தாக்குதலுக்கு உள்ளாகின்றன. இது, மோடி அரசு இந்தியாவை இந்துத்துவத் தேசமாக மாற்றுவதை நோக்கிச் செல்லும் வளரும் எதார்த்தத்தைச் சுட்டிக்காட்டும் சமிக்ஞைகள் ஆகும்.

    வகுப்புவாத அடிப்படையில் மக்களைப் பிரிக்கும் நோக்கத்திலான சட்டங்களைப் பாஜக மாநில அரசுகள் இயற்றி வருகின்றன. இச்சட்டங்கள் வழக்கமாகச் சிறுபான்மை இன அப்பாவி மக்களை இலக்காகக் கொள்கின்றன; மேலும், அவர்களை நேரடியாகத் தாக்கவும் அல்லது சட்டப்படி அவர்களை வழக்கு விசாரணைக்கு உட்படுத்தி தொல்லைப்படுத்தவும் பயன்படுத்தப்படுகின்றன. சட்டவிரோதச் செயல்களைத் தடுக்கும் சட்டமான ஊபா (UAPA) / தேசத் துரோகம் / தேசியப் பாதுகாப்புச் சட்டம், என்எஸ்ஏ ஆகியவை நூற்றுக்கணக்கான மக்களைச் சிறையிலடைக்கத் தாறுமாறாக மனம்போன போக்கில் பயன்படுத்தப்படுகின்றன.

    இச்சட்டங்களின் கொடூரமான பிரிவுகளைக் குறிப்பாகச் சிறுபான்மையின மக்களுக்கு எதிராகப் பயன்படுத்த எழுப்புவது மட்டுமல்லாமல், அவை அரசுடன் உடன்பட மறுத்து எதிர் கருத்துகளை எழுப்பும் பத்திரிக்கையாளர்கள் மற்றும் பிறருக்கு எதிராகவும் பயன்படுத்தப் படுகின்றன. எதிர் கருத்தை இந்த அரசு தேச விரோதமானது என முத்திரை குத்துகிறது. கடந்த இந்த ஆண்டுகள் –கல்வி, அரசியல், நிதி விவகாரம், சமூக, பண்பாடு என – கூட்டாட்சியின் அனைத்துத் துறைகளிலும் எல்லா பக்கங்களிலிருந்தும் தொடர்ச்சியான தாக்குதல்களைச் சந்தித்து வருகின்றன.

  மாநில ஆளுநர்களின் செயல்பாடுகள் மற்றும் ஆளுநர்கள், அரசிலமைப்புச் சட்டத்தின் அனைத்து நியதி நெறிமுறைகளையும் மீறுகின்றனர். அவர்கள் எதிர்க் கட்சிகள் ஆளும் மாநிலங்களில் பாரதிய ஜனதா கட்சி அரசியல் நிகழ்ச்சிநிரல் திட்டத்தின் தொங்கு சதை நீட்சியாகச் செயல்படுகின்றனர்.

        அரசியலமைப்புச் சட்டம் உறுதியளித்த சமத்துவம் மற்றும் சமூக நீதி லட்சியத்தை நனவாக்குவதை நோக்கிச் செல்வதற்குப் பதிலாக, சமூக ரீதியில் ஒடுக்கப்பட்ட பிரிவு மக்கள் பெரும் அநீதிகளுக்கும் பாரபட்சமாக நடத்தப்படுவதற்கும் ஆளாக்கப்படுகின்றனர்.

   தோழர்களே நண்பர்களே! மேலே சொல்லப்பட்டவைகளுடன், நாடாளுமன்றம், நீதித்துறை, தேர்தல் ஆணையம் முதலான சுதந்திரமான அரசியலமைப்பு அதிகார அமைப்புகள் அனைத்தும் நீர்த்துப்போகச் செய்து (இனி இந்த அமைப்புகளை நம்பிப் பயனில்லை என்றளவு) மதிப்பிழக்கச் செய்யப்படுகின்றன.

        மத்திய புலனாய்வு அமைப்பான CBI மற்றும் குறிப்பாக அமலாக்க இயக்குநரகம் மேலும் மேலும் எதிர்க்கட்சித் தலைவர்களைக் குறி வைக்கும் ஆளும் கட்சியின் அரசியல் கரங்களாக அக்கட்சியின் ஏவல் துறைகளாகி வருகின்றன.

   தகவல் ஊடகங்களைக் கட்டுப்படுத்தும் கார்ப்பரேட்டுகள், ஜோடிக்கப்பட்ட செய்தி மற்றும் தகவல்களை வெள்ளமெனப் பாய்வதை உறுதிப்படுத்துகின்றன.

      அறிவியல் அடிப்படையற்றதும் வரலாற்று ஆதாரங்கள் இல்லாததுமான இந்துத்துவா வகுப்புவாதக் கோட்பாடு, பகுத்தறிவு மற்றும் காரணகாரிய இயைபுத் தொடர்பு இரண்டின் மீதும் தாக்குதல் நடத்துகிறது. உண்மைகளை மறைக்கும் இருண்மைவாதம் அல்லது குழப்பம், மூட நம்பிக்கை மற்றும் குருட்டு நம்பிக்கை இவற்றைப் பரப்புவது, மக்களை ஏமாற்ற உதவுகின்றன; இவை இந்து புராணக் கதைகளை உண்மை வரலாறாக மக்கள் மனங்களில் சுலபமாகத் திணிக்க உதவுகின்றன. இது அறிவியல் மனப்பான்மை மற்றும் பகுத்தறிவின் மீது நடத்தப்படும் தாக்குதல்.

        தோழர்களே நண்பர்களே! காலத்தால் நிரூபிக்கப்பட்ட சுதந்திர இந்திய வெளியுறவுக் கொள்கையை மோடி அரசு கை கழுவி விட்டது. இந்தியா இப்போது அனைத்து உலக விஷயங்களிலும் அமெரிக்க ஏகாதிபத்தியத்தின் அடிபணியும் கூட்டாளியாகத் தரமிழந்து விட்டது.

        இஸ்ரேலுடன் இந்தியா தந்திரோபாய உறவுகளை மேம்படுத்தியும்; பாலஸ்தீன நலன் மற்றும் போராட்டங்களுக்கு நமது வரலாற்றுப் பாரம்பரிய ஆதரவு மற்றும் ஒருமைப்பாட்டை நீர்க்கச் செய்தும் விட்டது. அமெரிக்கா–இஸ்ரேல்–இந்தியா கூட்டணி அச்சு மேலும் உறுதியாக்கப்பட்டுள்ளது. மேலும் இந்தியா, அமெரிக்காவுடன் தந்திரோபாய உறவு மற்றும் இராணுவக் கூட்டை நெருக்கமாக்கியுள்ளது. அமெரிக்கா, ஜப்பான், ஆஸ்திரேலியா மற்றும் இந்தியா இணைந்து (QUAD) ‘குவாட்’ எனும் நாற்கரணக் கூட்டணியை ஏற்படுத்தியுள்ளன; தீவிரமான அந்தத் தந்திரோபாய இராணுவக் கூட்டின் நோக்கம், இந்தோ -பசிஃபிக் பகுதியில் சீனாவை ஒதுக்கித் தனிமைப்படுத்துவதே ஆகும்.

        தோழர்களே நண்பர்களே! அரசு என்னதான் பிரச்சாரப் பரபரப்பைக் கட்டவிழ்த்து விட்டாலும், நாட்டின் பொருளாதாரம் தலை குப்புறக் கீழ்நோக்கி வீழ்கிறது. கோவிட் பெருந்தொற்றைத் தவறாகக் கையாண்டதன் மூலம் மக்கள் மீது சுமத்தப்பட்ட துன்பங்களுக்கு மேலே மக்களின் வாழ்வாதாரத்தின் மீதான கடுமையான தாக்குதல்கள் அதிகரித்தபடி உள்ளன. வேலையின்மை உச்ச மட்டங்களில் உள்ளது; கட்டுக்கடங்காமல் ஓடும் பணவீக்கம், லட்சோப லட்சம் மக்களை ஏழ்மையிலும் பசியிலும் ஆழ்த்துகிறது.

        இந்திய அரசமைப்புச் சட்டத்தின் மீதான தாக்குதல்கள், அதிகரிக்கும் அதிகாரத்துவப் போக்கு மற்றும் வாழ்வாதாரத்தின் மீதான தாக்குதல்களுக்கு எதிராக மக்களின் எதிர்ப்புத் தீவிரமாகிக் கொண்டு வருகிறது.

        குடியுரிமைச் சட்டத் திருத்தத்திற்கு எதிரான எழுச்சி இயக்கம், குறிப்பாக பெண்களும் இளைஞர்களுமாக, பெரும் மக்கள் கூட்டம் திரண்டதைப் பார்த்தது.

        ஓராண்டிற்கும் மேல் நீடித்த வரலாற்றுச் சிறப்புடைய விவசாயிகளின் வீரம் செறிந்த போராட்டம், அடம் பிடித்த மோடி அரசைப் பிற்போக்குத்தனமான வேளாண் சட்டங்களைத் திரும்பப்பெறச் செய்தது.

        தனியார்மயத்திற்கு எதிராகவும், தொழிலாளர் சட்டத்திருத்தங்களைக் நீக்கவும் வற்புறுத்தி ஆண்டு தோறும் வெற்றிகரமான அனைத்திந்திய வேலைநிறுத்த நேரடி நடவடிக்கைகளில் இறங்கிய மத்தியத் தொழிற்சங்கங்கள், சமீபத்தில் தொழிலாளர் குறுங்குறிகளை (லேபர் கோடு) சட்டபூர்வமாக ரத்து செய்யக் கோரி 2022 மார்ச் 28, 29 இரண்டு நாட்கள் நாடு தழுவிய வேலைநிறுத்தங்களைச் செய்தனர்.

        அதிகரித்த ஒருமைப்பாட்டுடன் தொழிலாளர்கள், விவசாயிகள் மற்றும் விவசாயத் தொழிலாளர்கள் ஒன்றிணைந்து விடுத்த கூட்டுப் போராட்ட அறைகூவல் இயக்கங்களில், சமீப ஆண்டுகளில், பெருந்திரளானவர்கள் ஒன்று திரண்டதைப் பார்க்க முடிந்தது.

        மக்களின் போராட்டங்களை மேலும் தீவிரப்படுத்த இடதுசாரி சக்திகள் ஒற்றுமையின் பலம் அதிகரிப்பது மிகவும் முக்கியமானது.  இந்த அடிப்படையிலேயே இடதுசாரிகள் மற்றும் ஜனநாயக சக்திகளின் ஒற்றுமை, மாற்றுக் கொள்கைத் திசைவழியுடன், இறுக்கமாகக் கட்டப்பட வேண்டும்.

  அதே நேரத்தில், இந்துத்துவா வகுப்புவாதத் தாக்குதல்களை முறியடிக்கவும், அவர்களைத் தனிமைப்படுத்தவும் பரந்துபட்ட அளவில் மதசார்பற்ற சக்திகளை ஒன்று திரட்டுவது உறுதி செய்யப்பட வேண்டும்.

        கேரளாவில் இடது ஜனநாயக முன்னணி அரசு, அதன் மக்கள் நலம் சார்ந்த மாற்றுக் கொள்கைகள் மூலம் மக்களின் இதயங்களைக் கவர்ந்து, அம்மாநிலம் இதற்குமுன் சந்தித்திராத வகையில் தொடர்ச்சியாக இரண்டாம் முறை இடது ஜனநாயக முன்னணியை அரசமைக்க மக்கள் தேர்ந்தெடுத்தனர். அதன் சாதனைகள், மனித வளர்ச்சிக் குறியீடுகளில் நாட்டிலேயே கேரள மாநிலம் உயர்ந்த முதல்தர இடத்தைப் பெற்றுச் சாதிக்க வைத்துள்ளன. இடது ஜனநாயக முன்னணி அரசைச் சீர்குலைத்துக் கவிழ்க்க ஆர்எஸ்எஸ் அமைப்பும் ஒன்றிய அரசும் எல்லா வகையிலும் ஓயாது முயற்சி செய்கின்றன. இடதுசாரி சக்திகள் ஒன்றிணைந்து இந்த முயற்சிகளைத் தடுத்து முறியடிக்க வேண்டும்.

  இந்தியக் கம்யூனிஸ்ட் கட்சி (மார்க்சிஸ்ட்), இந்த அனைத்துக் கடமைகளையும் ஒரே நேரத்தில் மேற்கொள்ள வேண்டும் என்பதில் நம்பிக்கை கொண்டுள்ளது. அதன் மூலம் மட்டுமே இடதுசாரி கட்சிகள் மற்றும் சக்திகள் ஜனநாயகத்தைப் பாதுகாப்பதில் இந்திய மக்களை ஒன்று திரட்ட முடியும்; மக்களின் வாழ்வாதாரங்களை மேம்படுத்த முடியும்; இந்தியாவின் மதசார்பற்ற ஜனநாயக குணாம்சத்தைப் பாதுகாத்து, நமது மக்களுக்கான மேலான இந்தியாவை உருவாக்குவதை நோக்கி முன்னேறிச் செல்ல முடியும் என்பதை சிபிஐ(எம்) கட்சி நம்புகிறது.

    இந்தியக் கம்யூனிஸ்ட் கட்சி 24வது கட்சிப் பேராயம் அதன் விவாதங்களில் அனைத்து வெற்றிகளையும் பெற நான் வாழ்த்துகிறேன்!

         ஆர்எஸ்எஸ் / பாஜக அரசை வெளியேற்றுவோம்!

       

         இடதுசாரி ஒற்றுமையை உறுதிப்படுத்தி வலிமை பெறச் செய்வோம்!

  கொள்கை மாற்றங்களை ஏற்படுத்துவதற்கான போராட்டங்களில் இடதுசாரி மற்றும் ஜனநாயக சக்திகளின் ஒற்றுமையைக் கட்டுவோம்!

   இந்துத்துவா வகுப்புவாதத்திற்கு எதிராக மதசார்பற்ற சக்திகளின் விரிவான மக்களைத் திரட்டுவோம்!

        மார்க்சியம் – லெனினிசம் நீடு வாழ்க!

--நன்றி : நியூஏஜ் (அக்.23 –நவ.5)

--தமிழில் : நீலகண்டன்,

என்எப்டிஇ, கடலூர்