33 ஆண்டுகளுக்கு முன் மறைந்த சுவாமி சின்மயானந்தாவுடன் பிரதமர் உரையாடல்

        33 ஆண்டுகளுக்கு முன் மறைந்த                 சுவாமி சின்மயானந்தாவுடன்  

பிரதமர் உரையாடல் -- பிரம்மாண்டமான பிரமை

–டாக்டர் அருண் மித்ரா 

(சுய பெருமிதத்தை உற்பத்தி செய்ய தொழில்நுட்பம் பயன்படுத்தப்படும்போது, அறிவியல் மனோபாவம், பகுத்தறிவுடன் சிந்தித்தல் மற்றும் ஜனநாயக விழுமியங்களை அது சீர்குலைக்கும்.)

தன்னைத் தானே புகழ்வது  பலருக்கும் சாதாரண வழக்கம். ஆனால் இறந்தவருடன் உரையாடலை அரங்கேற்றவும், அவர் அந்த அரசியல் தலைவர் மீது புகழ் மழையைப் பொழிவதாகக் காட்சிப்படுத்தவும் செயற்கை நுண்ணறிவு (ஏஐ) பயன்படுத்தும்போது, இந்தச் செயல்பாடு தொழில்நுட்பத்தைத் தவறாகப் பயன்படுத்துவது, பகுத்தறிவுக்குப் புறம்பான நம்பிக்கைகளை ஊக்குவிப்பது மற்றும் தனிநபர் ஆளுமை வழிபாட்டை வளர்த்தெடுப்பது குறித்த தீவிரமான கேள்விகளை எழுப்புகிறது.

சின்மயா மிஷன் அமைப்பு புதுடெல்லி பாரத் மண்டபத்தில் சின்மயா அமிர்த மகோத்சவ உலகச் சம்மேளன விழாவை ஏற்பாடு செய்து நடத்தியது; அப்போது பிரதமர் நரேந்திர மோடி, சுவாமி சின்மயானந்தா சரஸ்வதியுடன்

2026 அக்டோபர் 23 அன்று கலந்துரையாடினார். ஆனால் இதில் வினோதம், சுவாமி சின்மயானந்தா 1993ம் ஆண்டிலேயே மரணமடைந்தவர் என்பதுதான். இந்தக் கலந்துரையாடல் ‘ஹாலோ பாட்’ (ஹாலோகிராம் + ரோபோ, அதாவது முப்பரிமாண ஒளி உருவ இயந்திர மனிதன்) என்ற செயற்கை நுண்ணறிவால் இயங்கும் செயலி பயன்படுத்தப்பட்டது; பிரதமர் அந்த முப்பரிமாண ஒளி உருவத்திடம் அதன் ஆசிகளை வேண்ட, டிஜிட்டல் தொழில்

நுட்பம் பிரதிநிதித்துவப்படுத்திய ஒளி உருவ சின்மயானந்தா சுவாமிகளும் பிரதமர் மீது ‘அவர் அசாதாரணமான திறமை உள்ளவர்’ என்று பாராட்டுக்களைப் பொழிந்தது. 

தொழில்நுட்பத்தால் இறந்தவரின் உருவத்தை அல்லது குரலை மீண்டும் உருவாக்க முடியுமா என்பது இங்கு பிரச்சனை இல்லை. அந்தத் தொழில்நுட்பத் திறனுக்கு நியாயமான கல்வி மற்றும் கலாச்சாரப் பயன்பாடுகள் இருக்கக்கூடும். உண்மையான கவலை இது எவ்வாறு பயன்படுத்தப்படுகிறது என்பதே. இங்கே இந்த நிகழ்வு பிரதமரை ஓர் அசாதாரண அந்தஸ்து கொண்டவர் என்று சித்தரிப்பதன் மூலம் பெருமைப்படுத்துவதாக அமைந்திருந்தது. அதிலும் மறைந்த ஓர் ஆன்மீகத் தலைவர் இந்தச் செயலை அங்கீகரிப்பது போன்ற தோற்றம் உருவாக்கப்பட்டது. மூடநம்பிக்கைகளும், எதையும் விமர்சனமின்றி அணுகும் கண்மூடித்- தனமான நாயக வழிபாடும் பரவலாக மலிந்த ஒரு சமூகத்தில், இத்தகைய காட்சிச் சித்தரிப்புகள்,  தாங்கள் காண்பதைக் கேள்வி கேட்க விரும்பாத மக்கள் மனங்களை ஈர்க்கக்கூடும். செயற்கை தொழில்நுட்பம் உருவாக்கிய ஒளி உருவ  பிம்பம் உதிர்ப்பதாகச் சித்தரிக்கப்பட்ட வார்த்தைகள், இறந்தவரின் சுதந்திரமான ஒப்புதல் பெற்றதல்ல. ஓர் ஆன்மீகத் தலைவரது அமைப்பின் நேர்மையை அதிகரிப்பதற்கு மாறாக, இத்தகைய செயல்கள் பிரதமர் உயர்த்திப் பிடிப்பதாக உரிமை பாராட்டும் ஆன்மீக மரபுகளை விமர்சிக்கவும், கேலி செய்யவும் வழிவகுக்கும் ஆபத்தை வருந்தி அழைப்பதாக அமைந்து விடும்.

கற்றவர்கள் மற்றும் செல்வாக்கு உடையவர்கள் உட்பட, அவையில் கூடியிருந்தவர்கள் அனைவரும் உற்சாகமாகக் கைதட்டியது சமமாகச்  சங்கடப்படுத்தும் கவலைக்குரிய மற்றொரு விஷயமாகும். இது, விமர்சன ரீதியாகச்  சிந்திக்கும்   நமது கூட்டுத் திறன் குறித்த சங்கடமான கேள்வியை  எழுப்புகிறது. பகுத்தறிவு, ஆதாரம் மற்றும் சுதந்திரமாகத் தீர்மானித்தல் முதலியவற்றைக் கல்வி வளர்க்க வேண்டுமே தவிர, அரசியல் வெளியில் கேள்வியின்றிக் கீழ்ப்படியும் பங்கேற்பாளர்களை வெறுமே உற்பத்தி செய்வதாக இருக்கக் கூடாது.

2027 ஆம் ஆண்டில் பல்வேறு மாநிலங்களில் தேர்தல்கள் நடைபெற உள்ள நிலையில், இத்தகைய காட்சிச் சித்தரிப்புகள் அடிக்கடி அதிகரிக்கக் கூடும். அதன் மூலம் வேலையில்லா திண்டாட்டம், பொருளாதார ஏற்றத்தாழ்வு, பொது சுகாதாரம், ஆட்சி நிர்வாகம் மற்றும் ஜனநாயகப் பொறுப்பேற்பு போன்றவைகளில் இருந்து மக்களின் கவனம், அசாதாரணமான தலைவரின் பிம்பத்தை வலுப்படுத்தும்  வகையில் வடிவமைக்கப்படும் காட்சிகள்பால் திசை திருப்பப்படுகிறது.

இந்திய அரசியலமைப்பின் 51 A(h)  சட்டப்பிரிவு, அறிவியல் மனப்பான்மை, மனிதநேயம், (எதையும் கேள்விக்கு உட்படுத்தும்) ஆய்வு மற்றும் சீர்திருத்த உணர்வை  மேம்படுத்துவதை ஒவ்வொரு குடிமகனின் அடிப்படை கடமையாகக் குறிப்பிட்டு அடையாளப்- படுத்துகிறது. எனினும் அறிவியல் சான்றுகளால் நிரூபிக்கப்படாத கூற்றுக்களை அப்படியே ஒப்புக் கொள்ளும் போக்கு வளர்வது குறித்துக் கவலைகள் நீடிக்கின்றன. பகுத்தறிவு ரீதியான ஆய்வுக்கு எதிரான விரோதப் போக்கு கடுமையான பின்விளைவுகளை ஏற்படுத்தக் கூடும். 

நரேந்திர தபோல்கர், கோவிந்த் பன்சாரே மற்றும் கௌரி லங்கேஷ் போன்றபகுத்தறிவாளர்களும் சமூகச் செயற்பாட்டாளர்களும் படுகொலை செய்யப்பட்டனர்; அப்படுகொலைகள் ஆழமாகப் புரையோடிய 

பாரபட்சங்களுக்கு எதிராகச் செயல்- படுபவர்கள் எதிர்கொள்ளும் ஆபத்துக்களை நமக்கு நினைவூட்டி எச்சரிக்கின்றன.  

பிரதமராகப் பொறுப்பேற்ற சிறிது காலத்திலேயே மோடி, மருத்துவர்கள் மத்தியில் உரையாற்றும்போது விநாயகர் கதையை மேற்கோள் காட்டி, பண்டைய இந்தியா, யானையின் தலையை மனிதனுக்குப் பொருத்துவது உள்ளிட்ட வளர்ச்சி பெற்ற உறுப்பு மாற்ற அறுவை சிகிச்சைமுறை திறன்களைப் பெற்றிருந்ததாகக் கூறினார். இந்தக் கூற்றுக்கு அறிவியல் ஆதாரம் எதுவும் இல்லை. ஆனால் குழுமியிருந்த மருத்துவர்கள், புராணத் தொன்மக் கதைக்கும் அறிவியல் ரீதியில் நிறுவப்பட்ட உண்மைக்கும் இடையில் உள்ள வேறுபாட்டை வலியுறுத்துவதற்கு மாறாக, பிரதமர் உரைக்குக் கைதட்டி அதை வரவேற்றது மிகுந்த ஏமாற்றம் அளிப்பதாகும். கலாச்சார மரபுகளுக்கு மரியாதை காட்டுவது என்பதற்கு அறிவியல் ஆய்வு சோதனையைக் கைவிட வேண்டும் என்று அர்த்தமல்ல.

கோவிட் 19 பெருந்தொற்றின்போது, ”போ, கரோனா போ” என்ற முழக்கங்களும், பலரும் கூடி கைதட்டுவது, பாத்திரங்களைத் தட்டி ஒலி எழுப்புவது, வெளியே குழுமி நின்று மொபைல் போன் விளக்குகளை எரிய விடுவது போன்ற (அரசு முன்மொழிந்த) அடையாள நடவடிக்கைகள் பொதுமக்கள் கவனத்தை ஈர்த்தன. ஆனால் இத்தகைய செயல்கள், தொற்று பாதிப்புக்குப் பரிசோதனை, சிகிச்சை, தடுப்பூசி, போதுமான சுகாதார உள்கட்டமைப்புக்கள் மற்றும் சான்றுகள் அடிப்படையிலான விழிப்புணர்வு, பொதுத் தகவல் தொடர்பு போன்றவைகளுக்கு மாற்றாக அமைய முடியாது.

மோடி கூறியதாகச் சொல்லப்படும் பிற கருத்துக்கள்: சாக்கடையில் இருந்து வெளிவரும் வாயுவைப் பயன்படுத்தி தேநீர் தயாரித்ததாக அவர் விவரித்த நிகழ்வு; மேகமூட்டம் விமானங்களை ரேடார் கருவி கண்டறிதலிலிருந்து தப்பிக்க உதவும் என்று அவர் முன்வைத்த கருத்து போன்றவை காரண காரிய அறிவியல் ஆய்வு குறித்த கேள்விகளை எழுப்புகிறது. மிகச் சமீபத்தில் அவர் தன்னை  (பயாலஜிக்கல்) உயிரியல் பிறவி அல்ல –அதாவது அவர் கடவுளால் அனுப்பப்பட்டவரே அன்றி சாதாரணமான ஒரு தாயின் வயிற்றில் பிறந்தவர் அல்ல என்று கூறிக்கொண்டார். அவர் கூறிய நோக்கத்தின் காரணம் என்னவாக இருந்த போதிலும், இத்தகைய கூற்றுக்கள் சாதாரண மனித வரையறை எல்லைகளுக்கும் கண்காணிப்புக்கும் அப்பாற்பட்ட   ஆற்றல் பெற்ற ஒரு தலைவரின் பிம்பத்தை சாதாரண மக்கள் மனங்களில் வலியுறுத்தி கட்டமைக்கக் கூடும்.

தன்னைப் பற்றிய மிகைப்படுத்தப்பட்ட முக்கியத்துவ உணர்வும், பிறரது பாராட்டுக்கு ஏங்கும் தீராத விருப்பமும் (மனநலம் சார்ந்த ஆளுமை குறைபாடாகிய) நாசீசிசப் பண்புகளின் (narcissistic traits) அடையாளங்களாகக் கருதப்படுகின்றன. அத்தகைய பண்புகளின் அடையாளங்களை வெளிப்படுத்துபவர்கள் தங்களின் திறமைகளை மிகையாக மதிப்பிட்டு, தங்கள் கருத்துக்கள்தான் மேலானவை என்று கருத்துவதுடன், விமர்சனங்களுக்குத் தற்காப்புடன் எதிர்வினை ஆற்றுவர். அவர்களை முகஸ்துதி செய்து  சூழ்ந்து இருக்கும் துதிபாடிகள் அவர்கள் சுயமாகச்  சிந்திப்பதையும் கெடுத்து விடலாம்.

எனினும், தற்பெருமை ஆளுமை கோளாறு என்பது (நாசீசிசப் பர்சனாலிட்டி டிஸ்ஆர்டர், NPD)  தொடர்ச்சியான பிரம்மாண்டத் தற்பெருமை போக்கு கற்பனை, பாராட்டுக்கான ஆழமான தேவை, பச்சாதாப உணர்வுச் சிக்கல்கள் முதலியவற்றை உள்ளடக்கிய ஒரு மருத்துவ நோயறிதல் சார்ந்த சமிக்கைகள் ஆகும். பொது அறிக்கைகள் மட்டுமே அத்தகைய நோய்களை உறுதிப்படுத்த முடியாது. எவ்வாறாயினும், அதீதச் சுய புகழ்ச்சி மற்றும் கேள்வி கேட்காத விசுவாசம் ஆகியவற்றின் விளைவுகள் தீவிரமான ஆய்வுக்கு உரியன. 

அடால்ஃப் ஹிட்லர், பெனிட்டோ முசோலினி உள்ளிட்ட சர்வாதிகாரத் தலைவர்களின் கவலை அளிக்கும் உதாரணங்களை வரலாறு வழங்குகிறது; அவர்கள் பிரச்சாரம், மாபெரும் மக்கள் கூட்டங்களைத் திரட்டுவது மற்றும் எதிர்க் கருத்துக்களை ஒடுக்குவதன் மூலம் தனிநபர் ஆளுமை வழிபாட்டுக் கூறுகளை  வளர்த்தனர். இத்தகைய அமைப்பு முறைகள் தனிநபர்களைப் போற்றிப் புகழ்ந்த அதே வேளையில், நிறுவனங்களைப் பலவீனப்படுத்தின; எதிர்ப்பை ஓரங்கட்டி பொது நலனை ஆட்சி அதிகாரத்தில் இருப்பவர்களின் பேராசை நோக்கங்களுக்கு அடிபணியச் செய்தன.

தனிநபர் வழிபாட்டின் அபாயம் ஒரு தலைவரைத் தனித்துவத்  திறமை வாய்த்தவராகவோ, தெய்வீகமாகத் தேர்ந்தெடுக்கப்பட்டவராகவோ அல்லது தவறு ஏதும் செய்ய முடியாதவராகவோ கருதுவதில் அடங்கியுள்ளது. பின்னர் அத்தகைய ஒரு தலைவரை விமர்சிப்பது நம்பிக்கை துரோகமாகிறது; சுதந்திரமான நிறுவனங்கள் அடிமை ஊழியம் செய்பவையாக ஆகிறது; மாற்றுக் கருத்துக் கொண்டோர் எதிரிகளாக முத்திரை குத்தப்படுகின்றனர். பொறுப்பேற்றலும் பகுத்தறிவு சார்ந்த விவாதங்களும் விலகி நின்று தனிநபர் புகழ் பாடுவதற்கு வழி விடுகின்றன.

கருத்து வேறுபாடுகளை வெளியிடுவதற்கான இடஎதிர்ப்பாளர் களுக்கு எதிராக மிரட்டிப் பணிய வைக்கும் நடவடிக்கை குறித்தான கவலைகள் ஜனநாயகப் பாதுகாப்புக்களின் முக்கியத்துவத்தை மேலும் வலியுறுத்து-

கின்றன. புதுடெல்லி ஜந்தர் மந்தரில் மாணவர்களும் இளைஞர்களும் போலீஸ் தாக்குதல் நடவடிக்கை- களை எதிர்கொண்டது குறித்த செய்திகளும் காட்சிகளும் ஜனநாயக உரிமைகளைச் சாதாரணமாக எடுத்துக் கொண்டு கடந்து சென்றுவிட முடியாது என்பதை நமக்கு நினைவூட்டுகின்றன. தனது சட்டபூர்வத் தன்மையில் நம்பிக்கை கொண்ட ஓர் அரசாங்கம் விமர்சனங்களைக் காது கொடுத்துக் கேட்க வேண்டும், அமைதியான முறையில் போராடுபவர்களுடன் உரையாடவும் வேண்டும்.

பிரதமர் பதவி என்பது பொறுப்பு, பணிவு மற்றும் பொறுப்பேற்றல் தன்மைகள் தேவைப்படுவது. அதன் அரசியலமைப்புக் கடமைகளை நிறைவேற்றுவதன் மூலம்  அந்தப் பதவிக்கான மரியாதை எழ வேண்டுமே தவிர, அந்தப் பதவி வகிப்பவரை இயற்கைக்கு அப்பாற்பட்ட திறமை உடையவராகவோ அல்லது சாதாரண மனிதர்களுடன் ஒப்பிட முடியாதவராகவோ மிகையாகச் சித்தரித்துக் காட்டுவதில் இல்லை. செயற்கை நுண்ணறிவு (AI) தொழில்நுட்பம் கல்வி, அறிவியலைப் புரிந்து கொள்வது சுகாதாரம் மற்றும் மனித நலவாழ்வு முதலியவற்றை மேம்படுத்த பயன்படுத்தப்பட வேண்டும்; அதற்கு மாறாகத் தெய்வீக அங்கீகாரம் படைத்தவராகத் தலைவரின் தோற்றத்தை உருவாக்கப் பயன்படுத்தக் கூடாது.

அதிகாரத்தில் இருப்பவரைக் கேள்வி கேட்கும், சான்றாதாரங்களைப் புராணத் தொன்மங்களிலிருந்து வேறுபடுத்தி அறியும் மற்றும் சுதந்திரமான பகுத்தறிவைப் பேணும் குடிமக்களையே இந்தியாவின் ஜனநாயக எதிர்காலம்  சார்ந்துள்ளது. பகுத்தறிவு சிந்தனை இல்லாமையைத் தொழில்நுட்ப மேம்பாட்டால் ஈடு செய்ய முடியாதது போலவே கண்மூடித்தனமான புகழ்பாடுதலும் அறிவார்ந்த குடிமைப் பண்புக்கு மாற்றாக அமைய முடியாது

 இன்று உயிருடன் இருந்து ஒருவரைப் பின் தொடரும் மக்களோ, அல்லது பல தசாப்தங்களுக்கு முன்பு மறைந்த ஓர் ஆன்மீகத் தலைவரின் –ஏஐ தொழில்நுட்பத்தால் உருவாக்கப்பட்ட ஒளிஉருவ– பிம்பமோ (ஒரு தலைவரைப் பற்றி) வழங்கும் மிகையான புகழ்ச்சி  தலைமைத்துவம் என்பதற்கான உண்மையான அளவுகோல் அல்ல. மாறாக அரசியலமைப்பு ஜனநாயகத்தைப் பாதுகாக்கும் திறன், குடிமக்கள் உரிமைகளைப் பாதுகாப்பது, அறிவியல் மனப்பான்மையை ஊக்குவிப்பது மற்றும் சாதாரண மக்களின் வாழ்க்கைத் தரத்தை மேம்படுத்துவது  ஆகியவைதான் தலைமைத்துவத்தின் உண்மையான அளவுகோல் ஆகும். இந்தக் கடமை பொறுப்புகளுக்கு மாறாக சுய புகழ்ச்சி முன்னுரிமை பெறும்போது அதன் விளைவுகள் தனிநபரைத் தாண்டி ஜனநாயகப் பொது வாழ்வின் அடித்தளத்திற்கே அச்சுறுத்துவதாக அமைகின்றன.

–நன்றி: நியூ ஏஜ் (நவ.8 –14)

–தமிழில் : நீலகண்டன், 

என்எப்டிஇ, கடலூர்

 

 . 

 

நியூ ஏஜ் தலையங்கம் --- மாபெரும் அக்டோபர் புரட்சி

 நியூ ஏஜ் தலையங்கம் (நவ.1–7) 

மாபெரும் அக்டோபர் புரட்சி

அது ஒரு கனவு நிலை. அத்தனை இரத்தம் சிந்தல் மற்றும் துன்பங்கள் இருந்த போதும், அது ஓர் உச்சகட்ட இலக்காகவே நீடித்தது; இதற்காகவே பெருந்திரள் மக்களுடன் கம்யூனிஸ்டுகள் தங்கள் இன்னுயிரைத் தியாகம் செய்தனர். நெருக்கடிக்கு மத்தியிலும், முன்னேறிச் சென்ற அவர்களை எதனாலும் தடுத்து நிறுத்த முடியவில்லை. அனைத்தும் மக்களுக்குச் சொந்தமாக ‘குடிமக்கள் சொன்னபடி குடி வாழ்வு, மேன்மையுறக் குடிமை நீதி…எழுந்தது பார் குடியரசு” என்பதைக் கண்ட உலகிற்கு அது ஒரு பெரிய அதிசயம். உலகின் பிற பகுதிகளை முதலாளித்துவம் ஆட்சி செய்த நிலையில், கோடிக்கால் பூதமாக எழுந்த சோசலிசம் ஒரு சவாலாக அவர்கள் முன் நின்று வெருட்டியதால், ஏகாதிபத்தியம் தொடர்ந்து ஆதிக்கம் செலுத்தும் சக்தியாக இருக்க முடியவில்லை.

அது ஒரு புதிய சமூக–பொருளாதார அமைப்பு முறையாக விரைவாக உருவானது. தொழிலாளி வர்க்கம் முடிவெடுக்கும் அதிகாரம் பெற்றது.  அவர்கள் தங்கள் உலகத்தை உருவாக்கி, மேலும் வலிமை பெற, ஏகாதிபத்தியம் மறையத் தொடங்கியது. பழைய சுரண்டும் வர்க்கங்கள் தங்கள் வாழ்வை நீட்டிக்கச் செய்த நோக்கத்தை இழந்தன. புதிய பாதை அவற்றைத் தீர்மானகரமான தருணத்தை நோக்கி இட்டுச் சென்றது; அத்தகைய தருணத்தில், முரண்படும் இரு வர்க்கங்களுக்கு இடையிலான பகைமையை முடிவுக்குக் கொண்டு வரும் சாத்தியத்தை அவற்றால் உணர்ந்து கொள்ள முடிந்தது. அனைத்துச் சுரண்டப்பட்ட வர்கங்களுடன் தொழிலாளி வர்க்கமும் ஈடுபட, சோவியத் சோசலிசக் குடியரசுகள் ஒன்றியத்தின்  தலைமையில் புதிய சமூகத்தைக் கட்டமைப்பதற்கான போராட்டம் தொடர்ந்தது.  

1917ம் ஆண்டின் அக்டோபர் புரட்சி உலகின் முதலாவது சோசலிச அரசு உருவானதை அடையாளப்படுத்தியதுடன் இருபதாம் நூற்றாண்டின் உலக அரசியல், பொருளாதாரம் மற்றும் வரலாற்றை அடிப்படையில் மாற்றி அமைத்தது.

‘இரு அதிகார மையம்’ (‘dual power’) என்ற ஆட்சி முறையின் பரஸ்பர சக்திகளைப் பிரித்து நீக்குவதன் மூலமே புரட்சி மேலும் முன்னேற முடியும் என்பது அக்டோபர் புரட்சியின் முக்கிய அம்சமாகும்.  1917 பிப்ரவரி புரட்சி வெற்றிக்குப் பிறகு ரஷ்யாவில் தற்காலிக அரசு (புரவிசனல் கவர்ன்மெண்ட்) மற்றும் பெட்ரோகிராட் தொழிலாளர்கள் மற்றும் வீரர்களின் பிரதிநிதிகள் அமைப்பு (பெட்ரோகிராட் சோவியத்) ஆகிய இரு அதிகார மையங்கள் உருவாகி இணையாகச் செயல்பட்டன. 1917 அக்டோபர் புரட்சியானது, பெயருக்கு முறையான அதிகாரத்தைப் பெற்ற முதலாளிகளின் தற்காலிக அரசை முற்றிலுமாக நீக்கிவிட்டு உண்மையான மக்கள் பலம் கொண்ட– அதாவது, தொழிலாளர்கள் மற்றும் விவசாயிகளின்– சோவியத் அமைப்பிடம் முழு அதிகாரத்தையும் ஒப்படைத்தது. [அதன் மூலம் ஒரு தேசத்திற்குள் இரண்டு அரசாங்கங்கள் என்ற இந்த இரட்டை அதிகார முரண்பாட்டைத் தீர்த்து வைத்த வரலாற்று நிகழ்வு இது]. நடைமுறையில் முதலாளிகளின் தற்காலிக அரசிடம், போலீசோ இராணுவமோ இல்லை; அதன் காரணமாக அதனால் சோவியத்துக்களுக்கு எதிராகப் பலவந்தமாக எதுவும் செய்ய முடியவில்லை. சோவியத்துகள், முதலாளித்துவ (பூர்ஷ்வாசி) வர்க்கத்திடம் அதிகாரத்தைத் தாமாக முன்வந்து ஒப்படைக்கக் காரணம், அவர்கள் மீது கொண்ட மாயையான சில நம்பிக்கைகளே ஆகும். ஆனால் பெரும்பான்மை மக்களின் வெளிப்படையான மற்றும் மறுக்க முடியாத ஆதரவு சோவியத்துக்களுக்கு இருந்தது. 

எனவே மாமேதை லெனின், அந்த மாயையில் இருந்து மக்களை விடுவிக்கும் உத்தியைக் கடைப்பிடித்து அமைதியான வழிகளில் புரட்சியின் வெற்றியைச் சாதித்து இரட்டை அதிகார முறைக்கு முடிவு கட்டினார்

விளாடிமிர் லெனின் இதனை   இரு வெவ்வேறு வர்க்கங்களின் சர்வாதிகாரங்கள் ஒன்றோடொன்று பிணைக்கப்பட்ட (Interlocking) ஒரு தற்காலிக நிலைக்கு வழி வகுத்த குறிப்பிடத்தக்க வரலாற்று நிகழ்வு என்று 

 விவரித்தார். அதாவது, முதலாளித்துவ வர்க்கத்தின் (Bourgeois) சர்வாதிகாரமும், பாட்டாளி வர்க்கத்தின் (Proletariat) சர்வாதிகாரமும் ஒரே நேரத்தில் இணையாகச் செயல்பட்டன. லெனின் கருத்துப்படி, இந்த இரு வேறுபட்ட சக்திகளின் பிணைப்பு நீண்ட காலம் நீடிக்க முடியாது. அவற்றில் ஒன்று மறைந்தே தீர வேண்டும். சில மாதங்களுக்குப் பிறகு 1917 ஆம் ஆண்டு (பழைய ஜூலியன் நாட்காட்டிபடி) அக்டோபர் மாதம் (தற்போதைய கிரிகோரியன் நாட்காட்டிபடி) நவம்பர் 7 புரட்சியின்போது இதுதான் நிகழ்ந்தது. அப்போது சோவியத்துகள் அனைத்து அதிகாரத்தையும் தங்கள் வசம் எடுத்துக் கொண்டனர். லெனின் மற்றும் போல்ஷிவிக்குகள், “அனைத்து அதிகாரங்களும் சோவியத்துகளுக்கே” என்ற முழக்கத்தை முன் வைத்தனர்.  [ரஷ்ய மொழியில் போல்ஷிவிக்குகள் என்றால், "பெரும்பான்மையினர்" என்று பொருள். 1903ல் கட்சியின் 2வது மாநாட்டில் வாக்கெடுப்பில் வெற்றி பெற்றதால் இப்பெயர் பெற்றது]

ரஷ்யப் புரட்சியின் முக்கிய முழக்கங்கள் 3 : அமைதி, ரொட்டி மற்றும் நிலம். ரஷ்யப் புரட்சியானது முதல் உலகப் போர் மற்றும் ஏகாதிபத்தியத்தின் பொது நெருக்கடியிலிருந்து உருவானது. ரஷ்ய மக்களுக்கும் உலகம் முழுமைக்கும் அமைதி மிக முக்கியமான தேவை என்ற காரணத்தால் முதல் உலகப் போரில் இருந்து அது விலகியது. அமைதியைச் சாதித்த அடிப்படையில் ரொட்டியும் நிலமும் கூட முக்கியமானவை. இவ்வாறு இந்த இலட்சிய நோக்கங்கள் ஒட்டுமொத்த மக்கள் கூட்டத்தின் அக்கறையையும் உள்ளடக்கியது; எனவே அவை ஜனநாயகத் தன்மை கொண்டவையாக இருந்தன. 

முதலாளித்துவமும் ஏகாதிபத்தியமும் தங்கள் ஏகபோக ஆதிக்கத்தை இழந்தன; அவை நேருக்கு நேர் ஒரு புதிய சக்தியை எதிர்கொள்ள வேண்டி வந்தது. ‘ஆகா வென்றெழுந்தது பார்’ என்ற இந்தப் புதிய சக்தி வளர்ந்து, புதிய சமூகத்தை இலவசமாகக் கட்டி எழுப்பும் 20 கோடி மக்களின் தினசரி வாழ்விலிருந்தும், லட்சோப லட்சம் உழைக்கும் மக்கள் கூட்டத்தின் விழிப்புணர்விலிருந்தும் வலிமை பெற்றது; அந்தக் காணரும் வீரர்கள் அந்தப் பணிக்காகக் கைமாறு எதையும் எதிர்பார்க்காமல் உழைத்த தொழிலாளர்களின் அர்ப்பணிப்பிலிருந்தும் அது வலிமை பெற்றது.

இது, அனைத்து உழைக்கும் மக்கள் வாழ்விலும், முன்னேற்றத்தை விரும்பும் அனைத்து நேர்மையான நண்பர்கள் வாழ்விலும் ஒரு தீர்மானகரமான தருணமாக அமைந்தது: இது அவர்களின் அரசியல், கருத்தியல் மற்றும் நன்னெறி சார்ந்த அணுகுமுறை நிலைப்பாடுகளைத் தீர்மானித்தது. இது, பழைய சுரண்டும் வர்க்கத்தை மாற்றி, ஒரு புது வர்க்கம் அதிகாரத்திற்கு வந்து அமர முடியும் என்பதை இறுதியில் நிரூபித்தது. ஏகாதிபத்தியச் சங்கிலியை நொறுக்கி உடைக்க முடியும் என்பது  இறுதியில் நிரூபிக்கப்பட்டது. உழைக்கும் வர்க்கம் அதன் கடமை பொறுப்புகளில் விழிப்புணர்வுடன் இருக்கும் என்ற நிபந்தனையில் வெற்றிக்கு இட்டுச் செல்லும் புதிய பாதை மனித குலத்திற்கு உண்டு  என்பது இறுதியாக நிரூபிக்கப்பட்டது. அக்டோபர் புரட்சியின் வெற்றி மணியோசை நமது வர்க்க எதிரிகளான முதலாளித்துவம் மற்றும் ஏகாதிபத்தியத்திற்கு அவர்களின் சாவு மணியாக ஒலித்தது. 

அதன் காரணமாகத்தான் 1917 அக்டோபருக்குப் பிந்தைய தொடக்க ஆண்டுகளில், பழைய  முதலாளித்துவ ஒழுங்கிற்கு எதிராகவும், ஏகாதிபத்தியத்திற்கு எதிராகவும் பெரும் சீற்ற அலையாக ஒரு வலிமையான இயக்கம்  எழுந்தது. இந்த இயக்கம் முதலாளித்துவ மற்றும் காலனித்துவ நாடுகள் அனைத்தையும் ஆட்கொண்டது; அந்தக் கட்டத்தில் தொழிலாளர் வர்க்கத்தின் இறுதி வெற்றியை அந்நாடுகளில் அது ஈட்டித் தரவில்லை என்ற போதிலும், அது ஒரு புதிய இயக்கத்தின் தொடக்கப் புள்ளியாக அமைந்தது. அந்த இயக்கம் தொடர்ந்து வலிமை அடைந்து தனது அணி வரிசைகளைத் தூய்மைப்படுத்தி சரி செய்து கொண்டு, அமைதி மற்றும் சுதந்திரத்திற்கான பரந்த போராட்ட முன்னணியாக உருவெடுத்தது.

அக்காலகட்டத்தின் அந்த ஆண்டுகளின்போது அனைத்து நாடுகளைச் சேர்ந்த உழைக்கும் மக்களில் சிறந்த பிரிவினர் உண்மையிலேயே புதிய மற்றும் தீர்மானகரமான ஒன்றைப் பெற்றுக் கொண்ட உணர்வைப் பெற்றனர்; அது வேறொன்றுமல்ல, (ரஷ்யாவின்) போல்ஷிவிசத்தின் அனுபவமே ஆகும்; மக்களும் இதை புரிந்து கொள்ளத் தொடங்கினர். இந்த அனுபவம் வெற்றிக்கு இட்டுச் செல்லும் பாதையைக் காட்டியதால் அவர்கள் தங்கள் நோக்க இலக்கின் மீதும், அதன் தவிர்க்க முடியாத வெற்றியின் மீதும் மிகுந்த நம்பிக்கை கொண்டனர்.

அக்டோபர் புரட்சியானது, காலனிய ஆட்சியைத் தூக்கி எறிந்த தேசிய விடுதலைப் போராட்டங்களின்  சங்கிலித் தொடர் நிகழ்வுகளுக்கு வித்திட்டது. ஏகாதிபத்தியத்திற்கு எதிரான போராட்டம், முதலாவது சோசலிசப் புரட்சியின் வெற்றியுடன், உயர் கட்டத்தை எட்டியது.. ஆசியா, ஆப்பிரிக்கா மற்றும் லத்தீன் அமெரிக்க நாடுகளில் தேசிய விடுதலைப் போராட்ட இயக்கங்கள் ரஷ்யப் புரட்சியிலிருந்து ஊக்கம் பெற்றன. மேலும் சோவியத் ஒன்றியம் தேசிய விடுதலைப் போராட்டங்களுக்குத் தனது ஆதரவை வழங்கியது. 

உலகம் முழுவதும் உள்ள தொழிலாளர் வர்க்கமும்  உழைக்கும் மக்களின் பிற பிரிவினரும் புதிய தாராளமயக் கொள்கையின் தாக்குதல், சிக்கன நடவடிக்கைகள் மற்றும் ஏகாதிபத்திய அடிமைப்படுத்தலுக்கு எதிராகப் போராட்டங்களை நடத்தி வருகின்றனர். அவர்களுக்கு 1917 சோசலிசப் புரட்சி ஒரு வழிகாட்டும் ஒளிவிளக்கு ஆகும். அனைத்துப் புரட்சிகர மற்றும் முற்போக்குச் சக்திகளுக்கும் அக்டோபர் புரட்சி ஓர் ஊக்கமளிக்கும் கலங்கரை விளக்கமாக உயர்ந்தோங்கி நிற்கிறது.

வர்க்கமற்ற மற்றும் சுரண்டலற்றச் சமூகத்திற்காகப் பாடுபடும் அனைவருக்கும் அக்டோபர் புரட்சியானது, 
‘வருங்காலம் சோசலிசமே’ என்ற செய்தியை அறிவிக்கிறது. 

அக்டோபர் புரட்சி நீடு வாழ்க!

–தமிழில் : நீலகண்டன்,

என் எஃப் டி இ, கடலூர்.

 

 

 

பிரான்சில் எழுச்சி –21 ஆம் நூற்றாண்டில்
மாற்றத்தின் நெருக்கடி 

–அனில் ரஜீம்வாலே

பிரான்ஸ் கலாச்சார ரீதியாகவும், அரசியல், தத்துவ மற்றும் பொருளாதார ரீதியாகவும் வளம் மிகுந்த நாடு. இது வலிமையான பாசிச எதிர்ப்பு, மார்க்சிய, பின்–மார்க்சிய மற்றும் கற்பனாவாத மரபுகள், (மேற்கு ஐரோப்பிய நாடுகளின் சூழலுக்கு ஏற்ப மாற்றி அமைக்கப்பட்ட ஜனநாயக வழியில் அமைந்த கம்யூனிச கொள்கையான) யூரோ-கம்யூனிச, டிராட்ஸ்கியிச, அதிதீவிர இடதுசாரி, புதிய இடதுசாரி மற்றும் அதிதீவிர வலதுசாரி போக்குகள் ஆகியவற்றின் (கலைடாஸ்கோப் போல) பரந்த வண்ணமயமான கலவைகளைக் கொண்டுள்ள தேசமாகும். அது மட்டுமா, ஜீன் பால் சார்த்தரின் அதீதவாதம் (transcendentalism), உட்டோப்பிய கற்பனாவாதம், மார்க்சியத்தின் பன்முக நிறங்கள், இடது -வலது -மைய அரசியல் நிலைபாடுகள், நவீனவாதம் மற்றும் பின் நவீனத்துவம், தொழிலாளர் மையவாதம் (‘workerism’), ஃபேஷன் மற்றும் ஓவியங்கள், பண்டைய காலத்து பழமையானவை முதல் இன்றைய காலத்து அம்சங்கள் வரை என அனைத்தையும் உள்ளடக்கி எப்போதும் ஊசலாடிக் கொண்டிருக்கும் ஒரு பிரம்மாண்டமான, முழு பிரபஞ்சமே இத்தேசத்தின் வண்ணக் கலவையில் அடங்கியுள்ளது!

அந்தப் பிரான்ஸ் தேசம் 21ம் நூற்றாண்டின் எதார்த்தங்களை எதிர்கொள்வதில் தோல்வி அடைந்து இன்று நெருக்கடியில் உள்ளது,

பெரும்கொந்தளிப்பில் பிரான்ஸ்

சரிந்து வரும் கல்வி வசதிகள், விலைவாசி உயர்வு, பொதுச் சேவைகள் வீழ்ச்சி மற்றும்

சமூகப் பாதுகாப்பு முறையில் அதிகரிக்கும் விரிசல்கள் ஆகியவற்றை எதிர்த்துப் பிரான்ஸ் கொந்தளிக்கிறது. கடந்த வாரம் 10 லட்சம் மக்கள் கலந்து கொண்ட பெருந்திரள் கண்டனப் போராட்டங்கள் பரவலான விரத்தியையும் கோபத்தையும் பிரதிபலித்தது. நாடு முழுவதும் ஆயிரக்கணக்கான கடைகள் சேதப்படுத்தப்பட்டன; இவை அனைத்திலும் மிக மோசமான விஷயம், தென்மேற்கு பிரான்சில் உள்ள லிமோஜஸ் நகரில், 19-ஆம் நூற்றாண்டைச் சேர்ந்த வரலாற்றுச் சிறப்புமிக்க நகர மண்டபம் எரிக்கப்பட்டது.

இந்த இயக்கம் செப்டம்பர் மாத மத்தியில் ஒரு பள்ளியில் தொடங்கியது; பாரிஸ் நகருக்குத் தென்கிழக்கில் உள்ள தொழிலாளர் வர்க்கப் புறநகர்ப் பகுதியான கிரெட்டெயிலில் அமைந்துள்ள லைசி செயிண்ட்-எக்சுபெரி என்ற அந்தப் பள்ளியின் ஆசிரியர்கள் கூடுதல் ஆசிரியர்கள் கோரி போராடினர்; அப்போது மாணவர்களும் வகுப்புகளை விட்டு வெளியேறி  அவர்களுடன் போராட்டத்தில் இணைந்து கொண்டனர்.

கல்வி நிறுவனங்களில் நிலவும் தரம் குறைவு– உதாரணமாக, சேதமடைந்த மேசை, நாற்காலி, பெஞ்சுகள், கழிவறைகள் உள்பட வசதிகள் போதாமை, வகுப்புகளை நடத்த ஆசிரியர்கள் இல்லாதது மற்றும் குறிப்பாகச் சமீபத்திய உயர்ந்து வரும் வெப்பநிலையில் இருந்து பாதுகாப்பு வசதிகள் குறைவு போன்றவற்றை  எதிர்த்துத் தொடங்கிய ஒரு சாதாரணமான போராட்டம் இன்றைய நிலைமையைத் தூண்ட ஒரு சிறு தீப்பொறியானது.

மாணவர்கள் சேர்க்கை சரிந்தது காரணமாக சுமார் 1,588 ஆசிரியர் பணியிடங்கள் ரத்து செய்யப்பட்டது என மதிப்பிடப்பட்டுள்ளது.

மக்கள் ஆதரவு பெறாத அரசாங்கம் 

இம்மானுவேல் மக்ரோன் பத்து ஆண்டுகளுக்கு முன்பு பிரான்சின்  மிக இளம் வயது அதிபராகத் தேர்ந்தெடுக்கப்பட்டவர்; மேலும், ஒருவேளை அவர் மிக பலவீனமான மற்றும் உறுதியற்றவரும் கூட.

மக்களின் எதிர்பார்ப்புகளைப் நன்கு திட்டமிடப்படாத தவறான சீர்திருத்தங்கள் மூலம்  நிறைவேற்ற முயன்றார். ஓய்வுபெறும் வயதை 62லிருந்து 64 ஆக உயர்த்தியது, பொருளாதாரத்தில் எதிர்பாராத சுழல்களை ஏற்படுத்தியது. இது குழப்பங்களுக்குக் காரணமாகி பொருளாதாரம் முழுவதையும் பாதிப்பில் மூழ்கடித்ததுடன், கடுமையான எதிர்ப்புகளையும் எதிர்கொண்டது.

அரசு மொத்த நிதியில் தோராயமாக நான்கில் ஒரு பங்கு ஓய்வூதியங்கள் செலவிற்குச் சென்றது. இது அரசு கடன் பத்திரங்கள் பெருமளவில் விற்கப்பட்ட ஒரு காலகட்டத்தில் நிகழ்ந்தது; இதன் விளைவாகக் கடன் வாங்குவதற்கான செலவு கடுமையாக உயர்ந்தது (அதாவது borrowing costs of Government பட்ஜெட் பற்றாக்குறையை ஈடுகட்ட ஒரு அரசு மக்கள்/ வங்கி/ வெளிநாட்டு நிறுவனங்களிடமிருந்து கடனாகப் பெறும் தொகைக்குச் செலுத்தும் வட்டி மற்றும் இதர செலவுகள் உயர்தல்) இது கடந்த 25 ஆண்டுகளில் இல்லாத அளவுக்கு உச்சத்தை எட்டியது.

ஒரு விசித்திரமான சூழல் உருவானது; இது, இளைஞர்கள் மத்தியில் பெரும் அதிருப்தியை ஏற்படுத்தி, தலைமுறைகளுக்கு இடையிலான மோதலுக்கு வழி வகுத்தது 

தொழில் துறை ஆற்றல்

ஜெர்மனிக்கு அடுத்தபடியாக பிரான்ஸ் ஒரு தனித்துவமான பொருளாதார அடையாளத்தை உடைய தேசம். ஆலைத் தொழிலாளர்கள் பாரிஸ் நகரத்தில் விடுமுறையைக் கழிக்குமளவு வசதி உள்ளவர்களாக இருந்தனர். நடுத்தர வர்க்கத்தினர் வசதி மற்றும் செல்வச் செழிப்பு உடையவர்களாக இருந்தனர். தொழிலாளர்களுக்கும் உயர்கல்வி வாய்ப்பு கிடைத்தது; அவர்கள் வார இறுதி நாட்களைக் கலாச்சாரக் கண்காட்சிகளில் செலவிடும் அளவு வசதி பெற்றிருந்தனர்.

ஏர்பஸ் மற்றும் கான்கார்டு விமானங்களைப் பிரான்ஸ் இணைந்து உருவாக்கியது. ஏர்பஸ் நிறுவனம் தீவிரமாக விரிவடைந்து பிரெஞ்சு ஃபேஷன் ஓர் உலகளாவியக் கலாச்சார ஏற்றுமதியாக மாறியது. மேலும் ஆடம்பரத்துறை போட்டியைத் தாண்டி வளர்ந்தது. 

அந்தச் சகாப்தம் 2026ல் மறைந்து விட்டதாகத் தெரிகிறது

தொழில் துறையிலிருந்து சேவை துறைக்கு வேதனையான மாற்றம்:

இரண்டாம் உலகப் போருக்குப் பிந்தைய காலகட்டம் ஆழமான கட்டமைப்பு மாற்றங்கள் நடைபெற்ற காலம் என்று அடையாளப்படுத்தப்பட்டது; தொழில்துறை விரிவடைந்த 1945 முதல் 1975 வரையான காலகட்டத்தில் ஏற்பட்ட தொழில் வளர்ச்சியைப் பிரான்ஸ் பொருளாதார நிபுணர் ஜான் ஃபோராஸ்டியே (Jean Fourastié) 'ட்ரான்ட் குளோரியூஸ் (‘Trente Glorieuses’) அல்லது ‘முப்பது பொற்கால ஆண்டுகள்’ என்ற பதத்தைப் பயன்படுத்தி குறிப்பிடுவார். 

எனினும் மற்ற காரணங்களுக்கு மத்தியில் 1973 மற்றும் 1979ம் ஆண்டுகளின் எரிபொருள் எண்ணெய் நெருக்கடி, தொழில்துறை உற்பத்தி அடிப்படையிலான பொருளாதாரம் என்பதிலிருந்து தொழில்துறைக்குப் பிந்தைய சேவை சார்ந்த துறைகளுக்கு மாற வேண்டிய தொடர்ச்சியான சிக்கலான மாற்றங்களைக் கட்டாயப்படுத்தியது; இது உலகமயத்தின் செல்வாக்கையும் ஐரோப்பிய ஒருங்கிணைப்பு அழுத்தத்தையும் அதிகரித்தது.

1970களின் உலகளாவிய எண்ணெய் நெருக்கடி அதிர்ச்சிகள், எரிசக்திக்காக இறக்குமதியைச் சார்ந்திருக்கும் பிரான்சின் நிலையை

வெளிப்படுத்தின. (இரண்டாம் உலகப் போருக்குப் பின்பு மேற்கு நாடுகள் உடன்பட்டு ஏற்றுக்கொண்ட) ‘கெயின்ஸ் பொருளியல் கருத்தொற்றுமை’ கொள்கையை இந்த எண்ணெய் நெருக்கடி சிதைந்தது; (கெயின்ஸ், பிரிட்டானிய பொருளாதார நிபுணர்) கெயின்சியத்திற்குப் பிந்தைய பொருளாதார உத்திகளின் மறுமதிப்பீடு தொடங்கியது.

தொழில்நுட்பப் புரட்சியின் உந்துதலாலும் ‘தொழில்மயத்திற்குப் பிந்தைய சேவைப் பொருளாதாரம்’ (post-industrial service economy) உருவாகத் தொடங்கியது என (அமெரிக்கப் பொருளாதார நிபுணர்) டேனியல் பெல் குறிப்பிட்டார். இன்று சேவை துறை பொருளாதாரத்தில் ஏறத்தாழ 80 சதவீதத்தைக் கொண்டுள்ளது

சிலர் இதைத் தொழில்மயம் நீக்கல் (‘de-industrialisation’) என்று அழைக்கிறார்கள். (அதாவது பெரும்பாலும் உற்பத்தித் துறையில் இருந்து சேவை துறைக்குப் பொருளாதாரம் மாறுவதை இது குறிக்கும்) ஆனால் இந்தக் கருத்து சரியானது அல்ல.

இந்த மாற்றத்தின் விளைவாகத் தொழில்துறை தொழிலாளர்களில் சுமார் 36 சதவீதத்தினர் குறைக்கப்பட்டனர்; இந்த அம்சம் ஒரு வகையில் தொழில்மயம் நீக்கல் என்ற சொற்பிரயோகத்தை  நியாயப்படுத்துகிறது..

வாராந்திர வேலை நேரத்தை 40 மணியிலிருந்து 35 மணி நேரமாகக் குறைத்தல், ஓய்வு பெறும் வயதை 60 ஆகக் குறைத்தல் மற்றும் சமூக நல சலுகைகளைத் தொடர்ந்து விரிவுபடுத்தல் போன்ற நடவடிக்கைகள் அதிக செலவுகளை ஏற்படுத்தும் ஒரு சூழலை உருவாக்கின. 

இது, மலிவான உழைப்பைக் கொண்டு தயாரிக்கப்பட்ட பொருட்களால் மேற்கத்தியச் சந்தைகளை நிறைத்த சீனாவின் கடுமையான போட்டியுடன் உடன்நிகழ்வாக ஒரே காலகட்டத்தில் நடந்தது. வாரத்தில் அதிகபட்சம் 35 மணி வேலை நேரம் என்பது தவறான நேரத்தில் கொண்டுவரப்பட்ட மாற்றம் மற்றும் அழிவு ஏற்படுத்த வல்லது என்பதை நிரூபித்தது. இதனால் நவீன வர்த்தக வரலாற்றில் மிக மோசமான ஒரு‌ காலகட்டத்தில் பிரான்சின் ஓர் அலகு உற்பத்திக்கான உழைப்பின் செலவு மேலும் அதிகரித்தது.

அதிகரிக்கும் பொருளாதாரக் கட்டமைப்பு நெருக்கடி 

பொருளாதாரத்தில் அரசின் உயர் கூடுதல் பங்கேற்பு (‘dirigisme’) உள்ள பிரான்ஸ், மொத்த உள்நாட்டு உற்பத்தி (ஜிடிபி) அடிப்படையில் உலகின் 7வது பெரிய பொருளாதாரம்; மற்றும் வாங்கும் சக்தி சமத்தன்மையின்படி (PPP, பர்ச்சேசிங் பவர் பேரிட்டி-படி) 9வது பெரிய பொருளாதாரம். உலக ஜிடிபி-யில் அதன் பங்கு மூன்று சதவீதம்; ஐரோப்பாவில் மிகப் பெரிய அன்னிய நேரடி முதலீடு (FDI) செய்யப்படும் நாடு; ஆராய்ச்சி மற்றும் மேம்பாடுகளுக்காகச்  செலவிடுவதில் 2வது பெரிய நாடு; பெரும்வர்த்தகம் செய்வதில் உலகில் 5வது மற்றும் ஐரோப்பாவில் 2வது பெரிய நாடு.  

(கடந்த ஆண்டு 10 கோடி சுற்றுலாப் பயணிகள் வருகையுடன்) உலகிலேயே அதிக சுற்றுலாப் பயணிகள் வருகை தரும் நாடாகத்ன திகழும் பிரான்ஸின் ஒட்டுமொத்தப் பொருளாதாரத்தில், பாரிஸ் நகரம் மூன்றில் ஒரு பங்கைக் கொண்டுள்ளது; மேலும் இது ஐரோப்பாவின் மிகப் பெரிய பொருளாதார மையங்களில் இரண்டாவதாக உள்ளது.

இது 2008லும் 2014லிலும் நெருக்கடியான ஒரு கட்டத்தில் நுழைந்தது; அதன் பிறகு இது உண்மையில் முழுமையாக மீண்டு வரவில்லை.

இன்று பிரான்சின் பொது கடன் சுமை ஜிடிபி-யில் 120 சதவீதத்தை நெருங்குகிறது. 2025ல் வர்த்தக நிறுவனங்களின் தோல்விகள் 68,500ஐ கடந்தன; இது ஐந்து தசாப்தங்களில் இல்லாத உயர்ந்த பட்ச அளவாகும், மற்றும் தொடர்ச்சியாக 5வது ஆண்டாக இந்த வருடாந்திர அதிகரிப்புப் பதிவாகியுள்ளது. வேலையின்மை 8 சதவீதத்தைத் தாண்டி உள்ளது. மொத்த உள்நாட்டு உற்பத்தி (ஜிடிபி) வளர்ச்சி வெறும் ஒரு சதவீதத்திற்குக் குறைவானதாக மந்தமாக உள்ளது.

2025-26-ஆம் ஆண்டில் 0.8 சதவீத அளவிலான மந்தமான மொத்த உள்நாட்டு உற்பத்தி (ஜிடிபி) வளர்ச்சி, ஜிடிபி-யில் 5 சதவீதத்திற்கும் அதிகமான அரசுப் பற்றாக்குறை, ஓய்வூதியங்களுக்காக ஜிடிபி-யில் 13 சதவீதத்திற்கும் மேலான செலவு, 2025-ல் 18.2 சதவீதம் மட்டுமேயான தனியார் சேமிப்பு விகிதம் மற்றும் நுகர்வு வளர்ச்சியில் சரிவு -- இவையே அந்தப் பிரச்சனைகளாகும். 

அக்டோபர் 20, 2026 அன்று, தர மதிப்பீட்டு நிறுவனமான ஃபிட்ச் (Fitch), பிரான்சின் கடன் மதிப்பீட்டுத் தரத்தைக் குறைத்தது. முன்னதாக, கேபிஆர்ஏ (KBRA - Kroll Bond Rating Agency) தர மதிப்பீட்டு நிறுவனம், நிதிப் பற்றாக்குறைகள் மற்றும் மோசமடைந்து வரும் கடன் போக்குகள் ஆகியவற்றைக் குறிப்பிட்டு, பிரான்சின் நீண்டகால கடன் மதிப்பீட்டை 'AA-' நிலைக்குக் குறைத்திருந்தது. 2030-ஆம் ஆண்டிற்குள் பிரான்சின் கடன்-ஜிடிபி விகிதம் 130 சதவீதத்தை எட்டும் என்று சர்வதேச நாணய நிதியம் (IMF) கணித்துள்ளது.

பிரான்ஸ் எப்படி இந்த நிலைக்கு வந்தது? இது கட்டமைப்பு முறிவுகள் (structural fractures) மற்றும் தவறான முடிவுகளின் ஒட்டுமொத்த விளைவாகும்.

"(வலிமையான மத்திய அதிகாரத்திற்கு மாறாக அரசியல் அதிகாரம் கூறுபட்டிருக்கும்) சிதைந்த அரசியல் சூழல், கடன் அளவீடுகளில் அழுத்தத்தை ஏற்படுத்துகிறது... இது பற்றாக்குறையை உயர் மட்டத்திலேயே நீடிக்கச் செய்கிறது" என்று KBRA-வின் மூத்த இயக்குநர் கென் ஈகன் 2025 டிசம்பரில் குறிப்பிட்டார்.

அரசாங்கம் கடன் பெறுகின்ற செயல்பாடு செலவு மிக்கதாக மாறியுள்ளது; இது அந்தக் கடனைத் திருப்பிச் செலுத்தும் திறனுக்குச் சிக்கலை ஏற்படுத்துகிறது. சர்வதேச நாணய நிதியம் (ஐஎம்எஃப்) அல்லது ஐரோப்பிய மத்திய வங்கியை அணுகுவதற்கான வாய்ப்பும் மேலும் கடினமாகிறது. 2025ஆம் ஆண்டின் இறுதியில் பிரான்சின் கடன்கள் 3.46 ட்ரில்லியன் யூரோக்கள் அளவை எட்டியது.

2008ன் அதிர்ச்சி மற்றும் கோவிட் நெருக்கடி

2008 ஆம் ஆண்டின் உலகளாவிய நிதி நெருக்கடி பிரான்சின் நிதி மேலாண்மை குறைபாடுகளை வெளிப்படுத்தியது. ஊக்கமளித்து நிதி நிலையை நிலைப்படுத்தும் கொள்கையை, அதற்கேற்ற நடவடிக்கைகள் இல்லாமல், தேர்ந்தெடுத்தது; பொருளாதாரம் கீழ் நோக்கிச் சரிந்த வேளையில் பிரான்ஸ்  மக்களுக்கானப் பொதுச் செலவிடுவதை அதிகரித்தது,  நல்வாழ்வுக்கான செலவுகளை விரிவுபடுத்தியது.

ஆனால் அது தவறான நேரத்தில் எடுக்கப்பட்ட நடவடிக்கை. பொருளாதாரக் கட்டமைப்புப் பற்றாக்குறை முழுமையாகச் சரி செய்யப்படாத நிலையில், அது அடுத்த பெரும் நெருக்கடியின்போது பிரான்சை உயர்மட்ட அளவிலான கடன் சுமையை நேரடியாக எடுத்துச் செல்லும்படி விட்டது.

2018 முதல் 2024 வரையிலான காலகட்டத்தில், கோவிட் 19 பெருந்தொற்று தொடர்பான நெருக்கடியும், முந்தைய நெருக்கடிகளின் அலைகளும் முழு வீச்சில் தாக்கியது; இதை எதிர்கொள்ள பிரான்ஸ் நூற்றுக்கணக்கான பில்லியன் யூரோக்களைப் பொருளாதார ஆதரவு மற்றும் நிவாரண திட்டங்களில் செலவிட்டது. அந்தச் செலவுகள் ஓரளவு நியாயப்படுத்தக் கூடியன என்ற போதிலும் அவை 2024ல் ஜிடிபி யில் 5.8 சதவீதம் அளவு நிதி பற்றாக்குறையை ஏற்படுத்தியது –அது ஐரோப்பிய யூனியனின் அனுமதிக்கப்பட்ட உச்சவரம்பிற்கு இரண்டு மடங்கான அளவாகும்.

2026 ஆம் ஆண்டின் எதார்த்தம்

தற்போது உடனடியாகப் பிரான்சின் பொருளாதாரக் கட்டமைப்பு மிகவும் அழுத்தத்துக்கு உள்ளான மற்றும் எளிதில் பாதிக்கப்படக்கூடிய நிலையில்  உள்ளது; இது மீட்சி பெறுவதை  மிகவும் கடினமாக்கி உள்ளது. பொது கடன் ஜிடிபி பங்கில் 120 சதவீதத்திற்கும் அதிகமாக உள்ளத்துடன், அது 2027 வாக்கில் 122% நோக்கி வேகமாக அதிகரித்து வருகிறது.  கடனுக்கு வட்டி கட்டும் திருப்பிச் செலுத்தும் சேவைக்கான செலவு 60 பில்லியன் ஈரோக்களாக மதிப்பிடப்பட்டுள்ளது; 2020ல் இருந்து இது சுமார் இரண்டு மடங்காகி உள்ளது. 1974க்கு பிறகு வணிக நிறுவனங்களின் தோல்விகள் மிக மோசமாக உள்ளது.

நெருக்கடியின் பாடங்கள்: சர்வதேச நிதி ஏகபோக அமைப்பிலும், ஏகாதிபத்திய அமைப்புகளில் ஒன்றிலும் முதலீடு செய்வதில் தோல்வி   

பிரான்சின் கதை என்பது, உலகப் பொருளாதாரப்  பின்னடைவு தேக்கத்துடன் இணைந்த ஆழமான கட்டமைப்பு நெருக்கடியை முறியடிப்பதில் தோல்வி அடைந்த கதை.

2026-ஆம் ஆண்டில் பிரான்ஸ் செலுத்த வேண்டிய 59.3 பில்லியன் யூரோ அளவிலான ஆண்டு வட்டிச் சுமை, தொழில் துறையில் முதலீடு செய்வதையோ, அல்லது கல்வி நிறுவனங்கள் மற்றும் மருத்துவச் சேவைகளில் முதலீடு செய்வதையோ இயலாத ஒன்றாக்கி விட்டது.  தொடர்ந்து அதிகரித்து வரும் பற்றாக்குறைச் செலவினங்கள், எந்தவித ஆக்கபூர்வமான முதலீடும் இன்றி, நாட்டின் கடன் சுமையை மேலும் அதிகரிக்கின்றன.

கம்யூனிஸ்டுகளின் நிலைப்பாடு

பிரெஞ்சு கம்யூனிஸ்ட் கட்சியின் (PCF) தேசியச் செயலாளர் ஃபேபியன் ரூசெல், கம்யூனிஸ்ட் மாணவர்கள் மற்றும் இளம் கம்யூனிஸ்டுகள் யூனியன்

அமைப்புடன் இணைந்து, கட்சித் தலைமையகத்தில் நடைபெற்ற செய்தியாளர் சந்திப்பில், “போராட்டங்களை ஒடுக்குவதற்காக அரசாங்கம் அடக்குமுறையைத் தேர்ந்தெடுக்கிறது” என்று குற்றம் சாட்டினார்.

மேலும் அவர், “உயர்நிலைப் பள்ளி மாணவர்களின் போராட்டத்திற்குப் பின்பு உந்துசக்தியாக இருக்கும் கோபத்தைப் புரிந்துகொள்ள வேண்டிய கடமை நமக்கு உண்டு.” தலைநகரின் வீதிகளில் மாணவர்கள் போராட்டத்துடன் இணைந்து கொள்வதற்காகப் புறப்படுவதற்குச் சற்று முன்பு இவ்வாறு கூறினார்; இது, அரசாங்கத்தையே அதிரவைக்கும் வகையிலான நாடு தழுவிய போராட்டத்தின் ஒரு பகுதியாகும்.

அடுத்த ஆண்டு நடைபெற உள்ள அதிபர் தேர்தலில் ரூசெல் கட்சியின் வேட்பாளர் ஆவார். கட்டமைப்பு மற்றும் கல்விச் சீர்திருத்தங்களுக்காகப் பில்லியன் கணக்கான யூரோக்களைக் கோரி, அவர் 2027-32 இளைஞர் திட்டத்தை வெளியிட்டுள்ளார். தேசியத் தொழிற்சங்க மையமான CGT, வெகுஜன இயக்கத்தைத் தீவிரமாக ஆதரிக்கிறது. "60 சதவீதப் பள்ளிகள் 1980-களுக்கு முன்பு கட்டப்பட்டவை, அவற்றில் சில இப்போது மாணவர்கள் தங்கிப் படிக்கத் தகுதியற்றவைகளாக  உள்ளன," என்று ரூசெல் குறிப்பிட்டார்

தீவிர வலதுசாரிகள் அச்சுறுத்தல்

தீவிர வலதுசாரிகளும் நவ-பாசிசவாதிகளும் மக்கள் மத்தியில் நிலவும் அதிருப்தியைப் பயன்படுத்தி வளர்ந்து வருகின்றனர்; அவர்கள் தற்போதைய இயக்கத்தையும் பயன்படுத்தத் தொடங்கியுள்ளனர். அதேபோல், தீவிர இடதுசாரிகளும் ஆத்திரமூட்டும் செயல்களில் ஈடுபட்டு, வலதுசாரிகளுக்கு மட்டுமே சாதகமான சூழலை உருவாக்குவதில் உதவுகின்றனர். எனவே, உண்மையான இடதுசாரி சக்திகள் மிகுந்த எச்சரிக்கையுடன் செயல்பட வேண்டும்.

1968 மே மாதத்தில், 'புதிய இடதுசாரிகளை' (New Left) மையமாகக் கொண்டு நடைபெற்ற மாணவர்கள் கிளர்ச்சி நினைவுக்கு வருகிறது. இது 'கோலிசத்திற்கு' (Gaullism - பிரெஞ்சு எதிர்ப்புப் படையின் தலைவரான சார்லஸ் டி கோல் முன்வைத்த தேசியவாதக் கொள்கை ஆகும்) மிகப் பெரிய வெற்றியைப் பெற்றுத் தந்தது. பிரெஞ்சு கம்யூனிஸ்ட் கட்சி (PCF), எரிக்கப்படும் ஒவ்வொரு காருக்கும் ஈடாக, ஆளும் தரப்புக்கு நடுத்தர வர்க்கத்தின் கணிசமான வாக்குகள் கிடைப்பதாகக் குறிப்பிட்டதை நினைவு கொள்ள வேண்டும்.

1968-ஆம் ஆண்டு போராட்டக் கிளர்ச்சியுடன் செய்யப்படும் தவறான ஒப்பீடுகளைத் தவிர்க்க வேண்டும்; சேவைத் துறை ஆதிக்கம் செலுத்தும் இன்றைய மாறியுள்ள பொருளாதாரச் சூழலுக்கு ஏற்ப, உண்மையான செயல்திட்ட வியூகங்களை வகுக்க வேண்டியது அவசியம். பிரான்சில் ஏற்பட்டுள்ள நெருக்கடி, 21-ஆம் நூற்றாண்டின் தனித்துவமான அடையாளங்களைக் கொண்ட ஒரு மக்கள் இயக்கமாக உருவெடுத்து, மேற்கு ஐரோப்பா முழுமைக்கும் பரவியுள்ளது.

–நன்றி : நியூ ஏஜ் (அக். 25 31)

–தமிழில் : நீலகண்டன், 

என் எஃப் டி இ, கடலூர்

   

 

 

 

‘நவி’ பிள்ளையின் நோபல் செய்தி

 

–சி ஆதிகேசவன்

2026 அக்டோபர் 10 அன்று நார்வே நோபல் கமிட்டி இந்தியத் தமிழ் வம்சாவளியில் வந்த 85 வயதான தென்னாப்பிரிக்க நீதிபதி, நவநீதம் “நவி” பிள்ளைக்கு அமைதிக்கான நோபல் சமாதான விருதை வழங்கியது. (நவநீதம் அவரது முழு பெயர்; அன்புடன் ‘நவி என்றழைப்பர்). விரிவான உலகளாவிய சட்ட ஒழுங்கை முன்னெடுத்துச் செல்வதிலும்; போர்க் குற்றங்கள், மனித குலத்திற்கு எதிரான குற்றங்கள் மற்றும் இனப்படுகொலைகள் மீது வழக்கு விசாரணை தொடரப்படுவதை உறுதி செய்வதிலும், அவர் காட்டிய அசாதாரணமான துணிச்சலையும் நேர்மையும் சுட்டிக்காட்டி, சர்வதேசச் சட்டத்தின் மூலம் சமாதானத்தை மேம்படுத்த வாழ்நாள் முழுவதும் அவர் மேற்கொண்ட முயற்சிகளை நோபல் கமிட்டி அங்கீகரித்தது.

விருது வழங்கப்படும் செய்தி பிள்ளைக்குக் கிடைத்தபோது அவர், வரலாற்றுப் புகழ்பெற்ற ஜெர்மனியின் நூரெம்பெர்க் நீதியின் அரண்மனை கருத்தரங்கம் ஒன்றில் கலந்து கொண்டிருந்தார்; அரண்மனையின் அதே

நீதிமன்ற அறையில்தான் 80 ஆண்டுகளுக்கு முன்பு நவீனக் குற்றவியல் பொறுப்பேற்புச் சர்வதேசச் சட்டமுறையின்படி விசாரணைகள் தொடங்கின. அந்தத் தருணம் அடையாளபூர்வமானது. அவர் தனது சுருக்கமான ஏற்புரையில் சர்வதேசக் குற்றங்களால் பாதிக்கப்பட்டவர்கள் மற்றும் (குற்றத்தில் ஈடுபட்டவர்களுக்குத்) தண்டனையின்மை நிலவுவதைத் தடுக்கும் பணியில் ஈடுபடும் சர்வதேச நீதியைப் பயில்பவர்கள் மற்றும் அதை ஆதரிப்பவர்களுக்கு இந்த விருதை அர்ப்பணித்தார்.

சர்வதேசச் சட்டம் மற்றும் மனித உரிமைகள் குறிப்பிடத்தக்க அரசியல் தாக்குதல்களைச் சந்திக்கின்றன; குறிப்பாகச் சர்வதேசக் குற்றவியல் நீதிமன்றத்தை நோக்கி அழுத்தம் தரப்படுகிறது என எச்சரித்தார். இந்த அமைப்புகளைப் பலவீனப்படுத்துவது, நூரெம்பெர்க் விசாரணை காலத்திலிருந்து ஏற்படுத்தப்பட்ட முன்னேற்றத்தைப் பின்னடைய செய்து, யாருடைய துன்பம் பொருட்படுத்தப்பட வேண்டும் என்பதைச் சட்டத்திற்குப் பதில், அதிகாரம் முடிவு செய்யும் ஓர் அமைப்பு முறைக்கு உலகத்தைத் திரும்பச் செய்யும் ஆபத்துக்கு உள்ளாக்கும் என அவர் கூறினார்.

தமிழ் வம்சாவளியில் பிறந்த பிள்ளை இன ஒதுக்கல் ஆட்சியின் கீழ் வளர்ந்தார். அவரது தாத்தா பாட்டி தென்னாப்பிரிக்காவின் நட்டால் பகுதி கரும்புத் தோட்டங்களில் பணியாற்ற ஒப்பந்தத் தொழிலாளிகளாக வந்தவர்கள். அவரது தந்தை நாராயணசாமி பஸ் ஓட்டுநர் (தாய் சாந்தம்மா நாயுடு). வெள்ளையரல்லாத தென்னாப்பிரிக்கர்களுக்கு வாய்ப்புகள் கடுமையாகக் கட்டுப்படுத்தப்பட்டதாக இருந்தது; இருப்பினும், சட்டம் பயின்று, 1967-ல் நட்டாலில் (Natal) சொந்தமாகச் சட்ட அலுவலகத்தைத்

தொடங்கிய முதல் வெள்ளை அல்லாத நிறத்து இனப் பெண்மணி (first woman of colour) ஆனார். தென் ஆப்பிரிக்க இனவெறி கொள்கைக்கு எதிராகப் போராடியவர்களை அவர் ஆதரித்தார்; 1973ல் அவர் ராபன் தீவில் –நெல்சன் மண்டேலா உட்பட– அரசியல் கைதிகளுக்கு, அவர்களது வழக்கறிஞர்களைச் சந்திக்க உரிமைகளைப் பெற்றுத்தர உதவினார். இனவெறி ஆட்சி ஒழிக்கப்பட்ட பிறகு, அதிபரான நெல்சன் மண்டேலா 1995ல் நவி பிள்ளையைத் தென் ஆப்பிரிக்க உயர் நீதிமன்றத்தின் முதல் கறுப்பினப் பெண் நீதிபதியாக நியமித்தார்.  

பின்னர் அவரது பணி சர்வதேச அரங்கிற்கு மாறியது. (1994ல் ருவாண்டா நாட்டில் நடந்த இனப்படுகொலைகள் மற்றும் மனித உரிமை மீறல்களை விசாரிக்க ஐநா மன்றம்   ஏற்படுத்திய) ருவாண்டாவுக்கான சர்வதேசக் குற்றவியல் தீர்ப்பாய நீதிபதியாகப் பணியாற்றிய அவர், பின்னர் அதன் தலைவராகவும் பணியாற்றினார்.

(ருவாண்டாவின் ‘தபா’ கம்யூனின் மேனாள் மேயரான) ஜீன்-பால் அகயேசு-வுக்கு எதிரான வரலாற்றுச் சிறப்புமிக்க வழக்கில், பாலியல் வல்லுறவு மற்றும் பாலியல் வன்முறை ஆகியவை இனப்படுகொலை செயல்களாக அமையும் என்று சர்வதேசக் குற்றவியல் தீர்ப்பாயம் நிலைநாட்டியது. சட்டவியலில்  ஏற்பட்ட இந்த முன்னேற்றம், மேற்கண்ட குற்றங்களைப் போரின் தவிர்க்க முடியாத பக்க விளைவுகளாகக் கருதாமல், அவை சமூகங்களை அழிப்பதற்காகத் திட்டமிட்டு பயன்படுத்தப்படும் ஆயுதங்களாக அங்கீகரித்த முதலாவது தீர்ப்பு என்று புகழ்பெற்றது.

2003 முதல் 2008 வரை தி ஹேக் நகரில் அமைந்த சர்வதேசக் குற்றவியல் நீதிமன்றத்தின் நீதிபதியாக அமர்ந்தார். 2008– 2014 இடைப்பட்ட ஆண்டுகளில்

அவர் ஐக்கிய நாடுகள் மனித உரிமை ஆணையராக (ஹை கமிஷனர்) பணியாற்றி, மனித உரிமைகள் மீறப்படும் இடங்களில் எல்லாம் பாதிக்கப்பட்டவர்களின் குரலாக அந்த அமைப்பை நிலை நிறுத்தினார்.

மிகச் சமீபத்தில் அவர் சர்வதேச நீதிமன்றத்தின் அட்ஹாக் நீதிபதியாகப் பணியாற்றியதுடன், ஆக்கிரமிக்கப்பட்ட பாலஸ்தீனப் பகுதிகள் குறித்த ஐநா சபையின் சுதந்திரமான விசாரணை ஆணையத்திற்குத் தலைமை தாங்கினார். 2025ல் வெளியிடப்பட்ட அந்த ஆணையத்தின் அறிக்கை, காசாவில் பாலஸ்தீனியர்களுக்கு எதிராக இஸ்ரேல் இனப்படுகொலைகள் செய்ததாகக் குறிப்பிட்டது. மேலும் இதற்கு ஆதாரமாகப் படுகொலைகள், கடுமையான பாதிப்புகள், மக்கள் குழுவை அழிக்கும் நோக்கில் உருவாக்கப்பட்ட வாழ்க்கைச் சூழல்கள் மற்றும் இனப்படுகொலை நோக்கத்தை வெளிப்படுத்தும் அறிக்கைகள் போன்றவை அந்த அறிக்கையில் சுட்டிக் காட்டப்பட்டு உள்ளன. இஸ்ரேல் இந்த முடிவுகளை ஒருதலைச் சார்புடையது எனக் கூறி நிராகரித்தது; எனினும் இந்த அறிக்கை பொறுப்பேற்க வைத்தல் குறித்த உலகளாவிய விவாதத்தைத் தூண்டி உள்ளது.

இவ்வாறு பிள்ளையின் சட்டத்துறை சார்ந்த பணி வாழ்வு தென்னாப்பிரிக்கச் சர்வாதிகார ஆட்சியின் கீழ் இருந்த தேசிய நீதிமன்றங்கள், பேரழிவிலான கொடூரங்களுக்குப் பின் அமைக்கப்பட்ட தற்காலிகத் தீர்ப்பாயங்கள், நிரந்தரமான சர்வதேசக் குற்றவியல் நீதிமன்றம் மற்றும் ஐநாவின் உயர்ந்த மனித உரிமைகள் பதவி என பல்வேறு தளங்களில்  விரிவானது. தான் பொறுப்பு வகித்த பல்வேறு மட்டங்களிலும் அவர், அதிகாரம் படைத்தவர்களுக்கும் அதிகாரம் அற்றவர்களுக்கும் ஒரே மாதிரியான சட்டத் தரவுகளே  பொருந்த வேண்டும் என்பதை வலியுறுத்தி வந்துள்ளார். ஐநா தீர்மானத்தின் கீழ் மனித உரிமைகளைப் பாதுகாப்பதற்கும் போரைத் தவிர்ப்பதற்கும் அரசியல் தலைவர்களும் நாடுகளும் சட்டப்பூர்வ கடமைகள் கொண்டுள்ளன என்பதை நூரெம்பெர்க்கில் அவர் மீண்டும் வலியுறுத்தினார். ஒவ்வொரு நாடும் அந்தக் கடமை பொறுப்புகளை நிறைவேற்ற வேண்டுமென அவர் அறைகூவல் விடுத்தார்; மேலும் சுதந்திரமான நீதிமன்றங்களைச் சீர்குலைக்கும் வகையிலான ஒரு தலைபட்சமான நடவடிக்கைகளுக்கு எதிராக அந்நாடுகளை எச்சரித்தார்.

தற்போது சர்வதேச சட்ட நிறுவனங்கள் வெளிப்படையான எதிர்ப்பைச் சந்திக்கும் தருணத்தில் இந்தத் தீர்ப்பு வந்தது. சக்திமிக்க நாடுகள் சர்வதேசக்

குற்றவியல் நீதிமன்றம் மீது தடைகளை விதித்ததுடன், அதன் சட்டப்பூர்வத் தன்மையைக் கேள்விக்கு உட்படுத்துகின்றன. உலகளாவிய அளவில் இராணுவச் செலவினங்கள் அதிகரிக்கும் போது, உக்ரைன், சூடான், காசா மற்றும் பிற இடங்களில் ஆயுத மோதல்கள் தொடர்கின்றன. 

இந்தச் சூழலில் நோபல் கமிட்டியின் தேர்வு ஓர் எளிய உண்மையை அடிக்கோடிட்டு வற்புறுத்துகிறது: அமைதி என்பது தற்காலிகமாகத் துப்பாக்கிச் சூடுகள் ஓய்ந்திருப்பதைத் தாண்டி மேலதிகமானது. 

மோதல்களின்போது பாலியல் வன்முறையில் பாதிக்கப்படும் பெண்கள் மற்றும் குழந்தைகள் உட்பட ஒவ்வொரு மனிதருக்கும்  சமமான கண்ணியத்தைப் பாதுகாக்கவும், குற்றம் இழைத்தவர்களைப் பொறுப்பேற்க வைக்கக் கூடிய வல்லமை உடைய அமைப்புகள் அதற்குத் தேவைப்படுகிறது.

நவி பிள்ளை அவர்களே வழக்கமான நிதானத்துடனும் நகைச்சுவை உணர்வு மிளிரவும் எதிர்வினை ஆற்றினார். அந்தச் செய்தி வந்தபோது தொடக்கத்தில் அவர் அதை ஒரு கிண்டல் கேலி நகைச்சுவையாக இருக்கக்கூடும் என்று எண்ணினார். ஆனால் விடாது கைத்தட்டல் தொடர்ந்தபோது, உடனே அவர் கூறினார்: “நீங்கள் இன்னும் சிறிது கூடுதலாகக் கைதட்டினால், நான் இந்தப் பரிசை டிரம்புடன் பகிர்ந்து கொண்டு விடுவேன்”. அவர் இப்படிக் கூறியதும், ‘வாழ்நாள் முழுவதும் அமைதியாகச் செய்யும் சட்டப் பணிக்கும், அதே கௌரவத்திற்காக மேற்கொள்ளப்படும் பொதுப் பிரச்சாரங்களுக்கும் இடையிலான வேறுபாட்டை’ எடுத்துக்காட்டும் வகையில், இந்தக் கிண்டல் பேச்சு பரவலாகப் பரவியது.

கடந்த ஆண்டுகளில் முன்பு பரிசை வென்றவர்களும் மற்றும் அரசியல் பிரமுகர்களும் வெளிப்படையாக (அமைதி விருதுக்கு) வேறு சிலரை ஆதரித்தனர்; இருந்தபோதிலும் தேர்வுக்குழுவினர், விளம்பரப் பிரச்சார வெளிச்சத்தை விட  நீதிமன்ற அறைகளில் ஆற்றிய சட்டப்பணிகளேயே தனது சாதனைகளாகக் கொண்டு கம்பீரமாக உயர்ந்து நிற்கும் ஒரு சட்ட அறிஞரைத் தேர்ந்தெடுத்தது

அவரது தேர்வை விமர்சித்தவர்கள், குறிப்பாக இஸ்ரேலைச் சேர்ந்தவர்கள், அந்த முடிவு ஒரு விருதை ஆயுதமாகப் பயன்படுத்துவது என்று கூறி கடுமையாகக் கண்டித்தனர். மனித உரிமைகள் சமூகத்தைச் சேர்ந்த ஆதரவாளர்கள், அந்த முடிவை –நூரெம்பெர்க் பாரம்பரியத்தின் மையக்  கோட்பாடான– சட்டத்திற்கு மேல் யாரும் இல்லை என்பதை உறுதிப்படுத்தும் ஓர் அவசியமான நடவடிக்கை என்று வர்ணித்தனர். தான் பணியாற்றிய நிறுவனங்கள் குறைபாடற்றவை என்று பிள்ளை  ஒருபோதும் கூறியதில்லை. 'மீண்டும் ஒருபோதும் இது நடக்காது' என்ற வாக்குறுதிக்கு அர்த்தம் இருக்க வேண்டுமென்றால், அந்த நிறுவனங்கள் தொடர்ந்து செயல்பட வேண்டும் என்று மட்டுமே அவர் வலியுறுத்தியுள்ளார்.

தற்போது 85 வயதிலும் சுறுசுறுப்பாக இயங்கிக் கொண்டிருக்கிறார். காம்பியா– மியான்மர் வழக்கில் சர்வதேச நீதிமன்றத்திலும்; மற்றும் சர்வதேச நூரெம்பெர்க் கோட்பாடுகள் அகாடமி  உறுப்பினராகவும் தொடர்ந்து  பணியாற்றுகிறார். இனவெறிக் கொள்கையின் கீழ் ஒரு பேருந்து ஓட்டுநரின் மகளாக இருந்து, சர்வதேச நீதியின் உலகளாவிய பாதுகாவலராக அவர் அடைந்த வளர்ச்சிப் பயணம், கல்வியாலும் உறுதிப்பாட்டாலும் உருவாக்கப்படும் சாத்தியக் கூறுகளையும்; நலிவடைந்தோரைப் பாதுகாக்கும் ஒரு சட்ட அமைப்பைக் கட்டியெழுப்பும் இன்னும் நிறைவடையாத பணியையும் ஒருங்கே எடுத்துக்காட்டுகிறது.

2026ம் ஆண்டிற்கான நோபல் அமைதி பரிசு அந்தப் பணியை அங்கீகரிக்கும் அதே நேரத்தில், பொறுப்பேற்றலைச் சாத்தியமாக்கும் அமைப்புகளைப் பாதுகாக்கும் புதிய கடப்பாடுகளை நாடுகள் மற்றும் குடிமக்கள் மீது  சுமத்துகிறது. 

நோபல் அமைதி விருதைப் பெற்ற தமிழகத்தைப் பூர்வீகமாகக் கொண்ட திருமதி நவநீதம் ‘நவி’ பிள்ளைக்கு மீண்டும் நமது வாழ்த்துக்களை உரித்தாக்குவோம்! 

–நன்றி: நியூஏஜ் (அக்.18 – 24)

–தமிழில் : நீலகண்டன்,

என் எஃப் டி இ, கடலூர்