சிந்திக்கச் சில கேள்விகள் -- தோழர் பட்டாபி வலைப்பூ பக்கத்திலிருந்து

 

என் கேள்விக்கு என்ன பதில்?

தோழர் பட்டாபி வலைப்பூ பக்கத்திலிருந்து (PATTABI WRITES )

BSNL விஆர்எஸ் 2019 திட்டத்தின்கீழ் ஓய்வு பெற்றவர்களின் கனிவான பார்வைக்கு…

சிந்திக்கச் சில கேள்விகள்

1.   பென்ஷன் மற்றும் ஓய்வூதியப் பலன்களுக்கான (செலவுத் தொகைக்குப்) பட்ஜெட் ஒதுக்கீடு செய்யப்படுகிறதா?

ஆம். சம்பந்தப்பட்ட அமைச்சகங்கள் கோரியதற்கு ஏற்ப நிதி ஒதுக்கீடு செய்யப்பட்டு, ஆண்டு வாரியாக மத்திய பட்ஜெட் ஆவணங்களில் குறிப்பிடப்படுகிறது; BSNLல் நம்மைப் பொருத்தவரை, மத்திய தொலைத்தொடர்பு இலாக்கா (DOT) டிமாண்டு எழுப்புகிறது.  

2.   (நம் தொலைத்தொடர்பு பிரிவில்) விருப்ப ஓய்வு பெற்றவர்கள் மற்றும் BSNL அப்சார்ப்டு விஆர்எஸ் பெற்றவர்கள் என்று இருக்கின்ற இரண்டு வகையினரும் ஒரே விதியின் கீழ் பென்ஷன் பெறுகிறார்களா?

‘இல்லை’ என்று நாம் சொல்ல முடியும். விருப்ப ஓய்வு பெற்றவர்கள் தாங்கள் விருப்ப ஓய்வு பெற்ற தேதியிலிருந்து சிசிஎஸ் (மத்திய பணியாளர் சேவை) விதிகள் 37-ஏ படி ஓய்வூதியம் பெறுகின்றனர்.

AIBSNLDPA ஓய்வூதியர் சங்கத்திற்கு DOT இலாக்கா எழுதிய 2021 மார்ச் 9 தேதியிட்ட கடிதத்தில் அளிக்கப்பட்ட விளக்கத்தின்படி, BSNL 2019 விஆர்எஸ் பெற்றவர்கள் சிசிஎஸ் விதிகள் 37-ஏ படி ஓய்வூதியம் பெறவில்லை. DOT பயன்படுத்திய வார்த்தைகள் அப்படியே கீழே தரப்படுகிறது:

‘அடிப்படையில் பொதுவாக அர்த்தம் கொள்ளும் எந்த வகையிலும் (Any generic reference of CCS pension Rules) சிசிஎஸ் பென்ஷன் விதிகளைத்  தொடர்புபடுத்துவது (விஆர்எஸ் சிறப்புத் திட்டத்தின்) தனித்துவமான பலன்களை மோசமாகப் பாதித்துவிடக் கூடும்.’

3.   அந்தக் கடிதத்தில் எந்த உறுதிமொழியும் இருக்கிறதா?

ஆம். (ஓய்வூதியர்களின்) பிபிஓ உத்தரவில் ‘BSNL விஆர்எஸ் 2019’ எனக் குறிப்பிடுவது, தற்போது நடைமுறையில் உள்ள விதிகளின்படி வழங்கக்கூடிய நியாயமான எந்த ஓய்வூதியப் பலன்களையும், ஓய்வூதியர்களிடமிருந்து எதிர்காலத்தில், பறித்துவிடாது என்று அக்கடிதம் வலியுறுத்துகிறது.

4.   (வயதுமூப்பு ஓய்வு / விருப்ப ஓய்வு / விஆர்எஸ் 2019 என) அனைத்து BSNL ஓய்வுபெற்றவர்களுக்கும் பென்ஷன் மற்றும் ஓய்வூதியப் பலன்களுக்கான (பட்ஜெட் நிதி) ஒதுக்கீடு ஒரே முதன்மை கணக்கின் கீழ் (single Major Head) வழங்கப்படுகிறதா?

இதற்கான பதிலும் ஒரு பெரிய ‘ இல்லை ’ என்றே நாம் சொல்ல வேண்டியுள்ளது. சிடிஏ பென்ஷனர்கள், BSNL ஐடிஏ பென்ஷனர்கள் மற்றும் MTNL ஐடிஏ பென்ஷனர்கள் அனைவரும் ஒரே முதன்மை கணக்குத் தலைப்பின் கீழ், அதாவது ‘மேஜர் ஹெட் 2071, பென்ஷன் மற்றும் பிற ஓய்வூதியப்பலன்கள்’, (நிதி ஒதுக்கீடு) செய்யப்படுகிறது.

BSNL விஆர்எஸ் 2019 பென்ஷனர்கள் இந்தத் தலைப்பின்படி ஒதுக்கீடு பெறவில்லை.

5.   அவ்வாறெனில், பிறகு எந்தக் கணக்குத் தலைப்பின் கீழ் BSNL விஆர்எஸ் 2019 பென்ஷனர்கள் தங்களுக்கான ஒதுக்கீட்டைப் பெறுகின்றனர்?

BSNL விஆர்எஸ் 2019 பென்ஷனர்கள் வேறு வித்தியாசமான மேஜர் ஹெட் 3275 அதாவது, ‘பிற தொலைத்தொடர்பு சேவைகள்‘ (Major Head 3275  viz  'Other Communication Services') தலைப்பின் கீழ் தங்களுக்கான ஒதுக்கீட்டைப் பெறுகின்றனர். எக்ஸ்கிரீஷியா எனப்படும் சிறப்புக் கருணைத் தொகையும் இந்த முதன்மை தலைப்பின் கீழேயே வழங்கப்படுகிறது.

6.   எந்தத் தலைப்பின் கீழ் அவர்கள் விஆர்எஸ் ஓய்வூதியர்களுக்கான ‘பென்ஷன் அம்சத்தை’ (‘the item Pension’) கொண்டு வருகிறார்கள்?

அவர்கள் அதற்குத் தரும் பெயர் ‘விருப்ப ஓய்வு பெற்ற BSNL மற்றும் MTNL ஊழியர்களுக்கான கூடுதல் பென்ஷன் பட்டுவாடா’ (‘Incremental Pension Payment). BSNL நிறுவனம் மற்றும் MTNL நிறுவனம் இரண்டிற்கும் தனித்தனியே கணக்குகள் காட்டப்படுகின்றன.

7.   என்னென்ன ஒதுக்கீடுகள்?

DOT டிமாண்ட் செய்தபடி நமக்கு நான்கு விதமான தொகைகளுக்கான புள்ளிவிபரங்களை வழக்கமாகப் பெறுகிறோம். அவை 2019–20ம் ஆண்டிற்கான உண்மையான செலவு (Actual expenditure), 2020–21ம் ஆண்டிற்கான பட்ஜெட் எஸ்டிமேட் (மதிப்பீடு), அதே ஆண்டிற்கான ரிவைஸ்டு எஸ்டிமேட் (திருத்தப்பட்ட மதிப்பீடு) மற்றும் நான்காவதாக எதிர்வரும் 2021 –22 காலத்திற்கான பட்ஜெட் எஸ்டிமேட்.

இவை நான்கும் மேஜர் ஹெட் 2071க்குத் தனியாகவும் விஆர்எஸ் 2019 ஊழியர்களுக்கான இன்கிரிமெண்டல் பென்ஷனுக்குத் தனியாகவும் பின்வருமாறு தரப்பட்டுள்ளது: (ரூபாய் கோடிகளில்)

 

தலைப்பு	உண்மை செலவு Actual expen. 2019 --20	பட்ஜெட் எஸ்டிமேட் BE 2020 -- 21	ரிவைஸ்டு எஸ்டிமேட் RE 2020 -- 21	எதிர்காலபட்ஜெட் எஸ்டிமேட் BE 2021--22
ஹெட் 2071	13450.66 கோடி	13981.68 கோடி	14481.08 கோடி	15350.00 கோடி
VRS 2019 ஹெட் 3275	295.01 கோடி	3294.70  கோடி	2160.30 கோடி	3000.00  கோடி

மேற்கண்ட அட்டவணையில் கோவிட் 19 பாதிப்புள்ள 2020 – 21ஆண்டிற்கான ரிவைஸ்டு எஸ்டிமேட் (column 4ல்) அதே ஆண்டிற்கான பட்ஜெட் எஸ்டிமேட்டை (column 3ஐ) விட (சிடிஏ, BSNL / MTNL ஐடிஏ பென்ஷனர்கள் அனைவருக்குமான மேஜர் ஹெட் 2071ன் கீழ் அதிகரித்திருக்கும்போது, விஆர்எஸ் ஓய்வூதியர்களுக்கான எஸ்டிமேட் மேஜர் ஹெட் 3275ன் கீழ் குறைந்திருப்பதைப் பாராளுமன்றக் குழுவின் தலைவர் திரு சசி தரூர் அவதானித்துச் சுட்டிக்காட்டியுள்ளார்.  

 

தலைப்பு	உண்மை செலவு Actual expen. 2019 --20	பட்ஜெட் எஸ்டிமேட் BE 2020 -- 21	ரிவைஸ்டு எஸ்டிமேட் RE 2020 -- 21	எதிர்காலபட்ஜெட் எஸ்டிமேட் BE 2021--22
எக்ஸ்கிரிஷீயா ஹெட் 3275	5000  கோடி	9889.65 கோடி	11206 கோடி	இல்லை

 

8.   விஆர்எஸ் 2019 பென்ஷன் பற்றி BSNL புத்தாக்கம் குறித்த DOT கடிதம் என்ன கூறுகிறது?

DOT அலுவலக மெமோரண்டம் 2019 அக்டோபர் 29 தேதியிட்ட (DOT OM dt Oct 29, 2019 ) கடிதத்தின் பாரா 2.iii ல் அமைச்சரவை முடிவின் படி (கூறப்பட்டிருப்பதாவது)

“விஆர்எஸ் ஊழியர்களுக்கான எக்ஸ்கிரீஷியா பட்டுவாடா ரூ 17,169 கோடி மற்றும் 10 ஆண்டுகளில் (அவர்களுக்கு) வழங்கப்படக்கூடிய ஓய்வூதியத்திற்கான முன்கூட்டிய செலவு (preponed Pensionary liability) ரூ 12,768 கோடி இவை இரண்டும் இந்திய அரசின் பட்ஜெட் ஒதுக்கீட்டின் ஆதரவோடு செயல்படுத்தப்படும்…”

இலாக்காவின் அலுவலகக் கடிதம் ‘விஆர்எஸ் ஊழியர்களின் 10 ஆண்டுகளில் வழங்கப்படக்கூடிய ஓய்வூதியத்திற்கு ரூ 12,768 கோடிக்கான முன்கூட்டிய செலவு இந்திய அரசின் பட்ஜெட் ஒதுக்கீட்டின் ஆதரவோடு செயல்படுத்தப்படும்’ என்று மட்டுமே பேசுகிறது.  முன்கூட்டிய செலவான இந்தத் தொகைதான் தற்போது 2019—20, 2020 –21 மற்றும் எதிர்கால 2021 –22 காலத்திற்கான ஒதுக்கீடாகப் பிரித்துப் பிரித்துக் காட்டப்பட்டுள்ளது. மேலும் தற்போது “BSNL மற்றும் MTNL விஆர்எஸ் ஊழியர்களுக்கான இன்கிரிமெண்டல் (கூடுதல்) பென்ஷன் பட்டுவாடா” என்ற தலைப்பின் கீழ் அதற்கான நாமகரணம் சூட்டப்பட்டுள்ளது.

அலுவலகக் கடிதம் எந்த விதியின் கீழ் பென்ஷன் பட்டுவாடா செய்யப்படுகிறது என்பது பற்றி எதுவும் குறிப்பிட்டுத் தெரிவிக்காமல் மௌனம் சாதிக்கிறது.

அமைச்ரவை ஒப்புதலுக்காக 2019 அக்டோபர் 23ல் அனுப்பப்பட்ட 2019 அக்டோபர் 22 தேதியிட்ட அமைச்சரவை மெமோ குறிப்பு (தயாரிக்கும்போது) இது குறித்து என்ன விவாதிக்கப்பட்டு, என்ன நடந்தது என்பது பற்றி நாம் அறியோம் பராபரமே.

9.   பென்ஷன் குறித்து BSNL விஆர்எஸ் 2019 திட்டம் என்ன பேசுகிறது?

விஆர்எஸ் 2019 திட்டம் பாரா 6.2ல் ஓய்வுக்கால இறுதிப் பலன்கள் குறித்து பேசுவதாவது…

“…தற்போது நடைமுறையில் உள்ள விதிகளின்படி ஊழியர்கள் என்ன ஓய்வவூதிய இறுதி மற்றும் பிற பலன்களைப் பெறுவதற்கு உரியவையோ அவற்றை இத்திட்டத்தின் கீழ் விருப்ப ஓய்வில் செல்லும் ஊழியர்கள் பெறுவதற்கு உரிமை உடையவர்கள். அத்தகயை பலன்களுக்கான பட்டுவாடாக்களைக் கீழ்க்கண்ட முறையில் பெறுவார்கள்.’’

“6.2. a இத்திட்டத்தின் கீழ் ஓய்வு பெறும் ஊழியர்கள் பென்ஷன் / குடும்ப பென்ஷன் பெற உரிமை உள்ளவர்கள்; விருப்ப ஓய்வு அனுமதிக்கப்பட்டு அமலான தேதிக்கு மறுநாளிலிருந்து, தற்போதைய நடைமுறையின்படி, (பலன்களைப்பெற) உத்தரவு வழங்கப்படுவார்கள்”

10.             இத்திட்டத்தின் மீதான எந்தக் குழப்பத்திற்கும் விளக்கம் அளிக்க அதிகாரம் வழங்கப்பட்ட அதிகாரி யார்? அல்லது இத்திட்டத்தில் சொல்லப்படும் விதிமுறை வார்த்தைகளுக்கு (terms) அர்த்தம் மற்றும் பொருள் விளக்கம் தருவதற்கான அதிகாரி யார்?

BSNL விஆர்எஸ் 2019 பாரா 9ன் இணைப்பு 1 கூறுகிறது, “CMD BSNL ன் முடிவு இறுதியானதும் அனைவரையும் கட்டுப்படுத்துவதுமாகும்”.

எனவே மேற்கண்ட பத்தி 6.2ன் மீது நமக்கு ஏற்படும் குழப்பத்தைத் தீர்த்து வைக்கவும் / சந்தேகத்திற்கு விளக்கம் அளிப்பதற்குமான அதிகாரி CMD BSNLயே ஆவர்.

யாரும் “தற்போது நடைமுறையில் உள்ள விதிகள்” என்ற பதம் / வாசகம் என்ன பொருளைத் தருகிறது என்பதற்கான விளக்கத்தை அளிக்குமாறு வற்புறுத்தினால் CMD BSNL, தற்போதைய நடைமுறை விதிகள் என்பது என்ன அர்த்தப்படுகிறது என்ற விளக்கத்தை அளிக்கும்  தனது கடமைப்  பொறுப்பைத் தட்டிக் கழிக்க முடியாது.

விதியின் பெயரைக் கூறு எனக் கேட்பது சுலபமான ஒன்றாகத் தோன்றலாம்; ஆனால், அற்கான விடையைப் பெறுவதுதான் சிரமமானது.   

   (பதிவிட்ட நாள் 4-4-2021 நேரம் பிற்பகல் 12. 25)

தமிழாக்கம் : நீலகண்டன்,

என்எப்டிஇ, கடலூர்          

 

 

வரலாற்றுத் தலைவர்கள் வரிசை 29 எஸ் வி காட்டே : இந்தியக் கம்யூனிஸ்ட் கட்சி முதல் பொதுச் செயலாளர்

நமது பெரும் தலைவர்கள் வாழ்விலிருந்து :

சில சித்திரத் சிதறல்கள் -29

 எஸ்  வி காட்டே

              இந்தியக் கம்யூனிஸ்ட் கட்சி 

           முதல் பொதுச் செயலாளர்

--அனில் ரஜீம்வாலே

--நியூஏஜ் (ஜன.10--.16 இதழ்)

            சச்சிதானந்த் விஷ்ணு காட்டே மங்களூரில் மிகுந்த பொருளாதாரச் சிரமங்களில் இருந்த ஒரு கீழ் நடுத்தர வர்க்கக் குடும்பத்தில் 1896 டிசம்பர் 14ம் நாள் பிறந்தார். அவருடைய தந்தையும் மூத்த சகோதரரும் புரோகிதர்கள்; வீட்டில் பழமைவாத ‘சனாதன’ச் சூழ்நிலையே நிலவியது. அச்சூழலை ஒரு கட்டத்திற்கு மேல் பொறுத்துக்கொள்ள முடியாத சச்சிதானந்த் எதிர்த்தார், பழமைவாதத்தைக் கைவிட்டு நாத்திகர்ஆனார்.

கல்வி

            1914 கேஇஎம் பள்ளியில் மெட்ரிக்குலேஷன் தேர்ச்சி பெற்றபின், இன்டர்மீடியட் கல்வி செயின்ட் அல்யோசியுஸ் கல்லூரியில் தொடர்ந்தார். அந்நாட்களில் அன்னி பெசன்டின் புகழ்பெற்ற ஹோம் ரூல் இயக்கம் காட்டுத் தீபோலப் பரவியது. அதில் ஈடுபட்ட சச்சிதானந்த் அவ்வியக்கத்தின் ‘தி நியூ இந்தியா’ இதழை மக்களிடம் பிரபலப்படுத்தினார்.

            அவர் கணிதப் பாடத்தை மிகவும் வெறுத்ததால் பம்பாய் ஸிடென்ஹாம் கல்லூரி பி.காம்., படிப்பில் சேர்ந்தார். உடல்நலப் பாதிப்பிலிருந்து குணமடைந்து தேற 1918ல் அகமதாபாத்தில் இருந்தபோது தனது எதிர்காலத் தோழரான சிஜி ஷாவைச் சந்தித்தார்.  

சோஷலிசம் நோக்கி

            1919ல் பம்பாய் திரும்பிய சச்சிதானந்த் வேலைக்குச் சேர்ந்த காப்பீட்டு நிறுவனம், சில காலத்தில் திவாலாகிப் போனது. இதன் மத்தியில் கிர்காமில் ஸ்ரீகிருஷ்ணா லாட்ஜ் உரிமையாளரான மங்களூரைச் சேர்ந்த ஒரு கோபால் பட் என்பாரைச் சந்திக்க, அவர் காட்டேவை அந்த லாட்ஜின் மானேஜராக நியமித்தார். அந்த லாட்ஜ் உடன் அவருக்கு ஏற்பட்டத் தொடர்பு வரலாற்றுபூர்வமானது. வாடிக்கையாளர்களின் பில்களைத் திரட்டுதல், தஸ்தாவேஜ்களைப் பாதுகாத்துப் பராமரித்தல் முதலிய பணிகளைச் செய்வது மட்டுமின்றி இலவசமாகச் சினிமா படங்களைப் பார்ப்பது முதலானவையும் அவருக்குக் கிடைத்தன!   

            பின்னர் 1923ல் செயின்ட் சேவியர் கல்லூரியில் பிஏ ஹார்னர்ஸ் தேர்வானார். இதன் மத்தியில் ஆர் பி லாட்வாலா என்ற வியாபாரியின் தனிச் செயலாளராகப் பணியாற்றச் சிஜி ஷா பம்பாய்க்கு வந்தார். ஆர்வத்தைத் தூண்டக்கூடிய மனிதரான அந்த வியாபாரி ஆண்டு தோறும் லண்டன் சென்று வருபவர்; வரும்போது மார்க்சிய நூல்கள் உட்பட பல நூல்களை எடுத்து வந்து ஒரு பெரிய நூலகமும் வைத்திருந்தார். அந்நூலகத்தை ஷா அவர்கள்தான் பராமரித்ததால், காட்டே அங்கே இலவசமாகப் பொழுதைக் கழிக்க முடிந்தது. அவர்கள் இருவருமாகச் சேர்ந்து ஒரு படிப்பு வட்டத்தையும் அமைத்தனர்.

            ஒரு நாள், எஸ் ஏ டாங்கே வெளிட்டுவந்த ‘தி சோஷலிஸ்ட்’ என்ற பத்திரிக்கையைக் காட்டே படிக்க நேர்ந்தது; அப்பத்திரிக்கையால் பெரிதும் ஈர்க்கப்பட்டார். டாங்கேவை அழைத்துவர ஒரு சிறப்பு தூதரை அவர் அனுப்ப, அது குறித்து முன்னரே தகவல் தெரிவிக்காததால் காட்டேவை அவர் காய்ந்து விட்டார். முதல் முறைதான் சந்தித்தபோதும் அவரை அன்பான விருந்துக்கு அழைத்து, அவரோடு நீண்ட நேரம் உரையாடினார். இப்படியாக அவர்களிடையே வாழ்நாள் முழுவதும் நீடித்த நட்புறவு மலர்ந்தது. அப்போதிலிருந்து சிபிஐ பொருளாளர் மற்றும் பிற அமைப்புகளின் பொறுப்புக்கள் உட்பட, பல பொறுப்புகளை அவர் சுமந்தார்.

            விரைவில் அவர்கள் இருவரும் காங்கிரஸின் பம்பாய் கிளையில் பணியாற்றத் தொடங்கி, காங்கிரசுக்குள் புரட்சிகர குழு ஒன்றை ஏற்படுத்தினர். எப்படிப் பணியாற்ற வேண்டும் என்ற நிபந்தனைகளை மாஸ்கோவிலிருந்து எம்என் ராய் விதிக்க, அதை அவர்கள் ஏற்க மறுத்தனர். காட்டேவின் இருப்பிட லாட்ஜ் தலைமறைவுச் செயல்பாடுகளுக்கான மையம் ஆயிற்று. மற்ற தோழர்களோடு காட்டேவுக்குக் காமின்டர்ன் உடன் தொடர்பு ஏற்பட்டது. காட்டேவும் டாங்கேவும் ஒரு தீவிரச் செயல்பாட்டுக் குழுவை அமைக்க அதில் ஜோக்லேக்கர், மிராஜ்கர், நிம்கர் முதலானவர்கள் இணைந்தனர்; அக்குழு பம்பாய் மற்றும் பிற பகுதிகளின் தொழிலாளர் இயக்கத்தின் எதிர்கால நடவடிக்கைகளை வடிவமைத்தது.

            1924ல் போல்ஷ்விக் சதி வழக்கில் டாங்கே கான்பூரில் கைதானார். காட்டே பிற தோழர்களுடன் இணைந்து ஒரு பாதுகாப்புக் குழுவை அமைத்தார்.

இந்தியக் கம்யூனிஸ்ட் கட்சி அமைப்பு, கான்பூர் 1925

          கான்பூரைச் சேர்ந்த சத்யபக்த் என்பார் ஓர் அகில இந்திய மாநாட்டிற்காக இந்தியா முழுவதும் பரவியிருந்த கம்யூனிஸ்ட்களைத் தொடர்பு கொண்டார். பம்பாயிலிருந்து காட்டே

மற்றும் தோழர்கள் உட்பட சுமார் 300 தோழர்கள் கான்பூரில் திரண்டனர். 1925 டிசம்பர் 25ம் நாள் மாநாடு தொடங்கி மறுநாள் டிசம்பர் 26 அன்று இந்தியக் கம்யூனிஸ்ட் கட்சி அமைக்கப்பட்டது. மாநாடு, கட்சி செயற்குழு மற்றும் பொறுப்பாளர்களைத் தேர்ந்தெடுத்து, கட்சிக் கொடி மற்றும் உறுப்பினர் படிவத்தை முடிவு செய்ததுடன், சிபிஐ கட்சி அமைக்கப்பட்டதை ஓர் அறிக்கையில் அறிவித்து கட்சியின் சுருக்கமான எதிர்காலத் திட்டத்தை அறிவித்தது. மாநாட்டு ஆவணங்கள் 1920 ’தாஸ்கண்ட் பார்ட்டி’ குறித்த பார்வைக் குறிப்பு எதையும் குறிப்பிடவில்லை.

            ஆர்வத்தைத் தூண்டும் வகையில் மூன்று பொதுச் செயலாளர்கள் மற்றும் இரண்டு பொருளாளர்களுக்கு அன்றைய கட்சி அமைப்பு விதிகளின்படி இடம் இருந்தது. எஸ் வி காட்டே மற்றும் ஜெ பி பகர்ஹெட்டா இருவரும் பொதுச் செயலாளர்களாகத் தேர்ந்தெடுக்கப்பட்டனர். அதில் காட்டே செயல்படும் பொதுச் செயலாளர். மாநாட்டின் தலைவர் ம சிங்காரவேலர் கட்சியின் தலைவரானார்.

            1927 மே 31ம் நாள் பம்பாயில் நடைபெற்ற கட்சியின் விரிவடைந்த மத்திய செயற்குழு கூட்டத்தில் கட்சியின் புதிய அமைப்புவிதி நிறைவேற்றப்பட்டு ஏற்கப்பட்டது. அதன்படி, கட்சிக்கு ஒரே பொதுச் செயலாளர்; அவர் காட்டே. இவ்வாறு காட்டே, இந்தியக் கம்யூனிஸ்ட் கட்சியின் ‘முதல் பொதுச் செயலாளர்’ என்று அறியப்படுகிறார். அக்கூட்டத்தில் ஐந்து உறுப்பினர் அடங்கிய தலைமைக் குழுவும் செயற்குழுவும் தேர்ந்தெடுக்கப்பட்டதுடன் சுருக்கமான கட்சித் திட்டமும் நிறைவேற்றப்பட்டது. வரலாற்று முக்கியத்தும் உடைய நிகழ்வுகளின் ஊடே காட்டே பயணப்படலானார்.

தொழிலாளர்கள் மற்றும் விவசாயிகளின் கட்சி (WPP)

            காங்கிரஸ் கட்சிக்குள் செயல்பட்டுவந்த சோஷலிசக் குழுவை, எஸ்எஸ் மிராஸ்கரைப் பொதுச்செயலாளராகக் கொணடு, தொழிலாளர்கள் மற்றும் விவசாயிகளின் கட்சி (WPP) அமைப்பை 1927ல் அமைத்தனர்.  விரைவில் அந்தக் கட்சி பல பிரதேசங்களிலும் பரவியது. காட்டேயும் இளம் தொழிலாளர்கள் அமைப்பை (யங் ஒர்க்கர்ஸ் லீக்) ஒன்றைத் தொடங்கினார். 1927–28 சைமன் குழுவைப் புறக்கணிக்கும் இயக்கத்தில் அவர் முக்கியமான பங்காற்றினார்.  பம்பாயில் ஏற்பட்ட எழுச்சியைக் கண்டு சைமன் குழு, பூனா செல்லும் வழியில் பம்பாய்க்குள் வருவதைத் தவிர்த்து, சுற்றிக்கொண்டு செல்ல வேண்டியிருந்தது. குழுவின் 7 உறுப்பினர்களைக் குறிக்கும் வகையில் ஏழு கொடும்பாவிகள் கொளுத்தப்பட்டன. WPP கட்சியின் தலைமையில் 50 ஆயிரத்திற்கும் மேற்பட்ட மக்கள் கண்டனப் பேரணியில் கலந்து கொண்டனர்.

            (பிரிட்டிஷ் பாராளுமன்ற உறுப்பினரும் கம்யூனிஸ்ட் தலைவருமான) ஷபூர்ஜி சக்லத்வாலா 1927 ஜனவரியில் பம்பாய் வந்தபோது காட்டேயும் மிராஸ்கரும் அவரைச் சந்தித்தனர்; அவருக்கு மரியாதை தரும் வகையில் மிகப்பெரிய வரவேற்பு நிகழ்ச்சியை ஏற்பாடு செய்தனர்.

            1928ல் ஜவுளி ஆலைத் தொழிலாளர்களின் சரித்திரப் புகழ் வாய்ந்த வேலைநிறுத்தம் நடைபெற்றபோது, காட்டே கிர்ணி காம்கர் யூனியனின் ஒரு மையத்தின் பொறுப்பாளராகச் செயல்பட்டார். மத்திய வேலைநிறுத்தக் குழுவில் டாங்கே, ஜோக்லேக்கர், என்எம் ஜோஷி மற்றும் பிறரோடு காட்டேயும் ஓர் உறுப்பினராக இருந்தார்.

            1928 டிசம்பரில் கல்கத்தா, அல்பர்ட் ஹாலில் WPP கட்சியின் அகில இந்திய மாநாடு நடந்தபோது, அதில் காட்டே மையமான முக்கிய பங்காற்றினார். காங்கிரஸ் கட்சி முழு சுதந்திரத் தீர்மானத்தை ஏற்க வற்புறுத்தி WPP கட்சி பிரம்மாண்டமான ஆர்ப்பாட்டத்தைக் காங்கிரஸ் (மாநாட்டுப்) பந்தலுக்கு முன்பு நடத்தியது. அவருடைய வழிகாட்டுதலில் கம்யூனிஸ்ட் கட்சியும் அதனுடைய கூட்டங்களை நடத்தியது.

மீரட் சதி வழக்கு, 1929 – 33

            31 பெரும் கம்யூனிஸ்ட் கட்சித் தலைவர்களோடு எஸ் வி காட்டே கைது செய்யப்பட்டார்; நாடுமுழுவதும் பல தொழிற்சங்கத் தலைவர்கள் கைது செய்யப்பட்டனர். கைதானவர்களை மனிதத் தன்மையற்றச் சூழலுக்குப் பெயர் பெற்ற மீரட் சிறையில் அடைத்தனர். அவருக்கு 12 ஆண்டுகள் கடும் சிறைதண்டனை வழங்கப்பட்டாலும் பின்னர் தண்டனை காலம் குறைக்கப்பட்டது. மற்ற சக கைதிகளுடன் சேர்ந்து அவர் ஒரு கூட்டு அறிக்கை வெளியிட்டார்.

            1933ல் விடுவிக்கப்பட்ட அவர் 1934 ஜனவரியில் பம்பாய் திரும்பினார். கம்யூனிஸ்ட் இயக்கத்தை மறு சீரமைப்பு செய்வதில் அவர் பங்காற்றினார்; ஆனால் உடனே கைதாக அங்கே உடல்நலம் பாதிக்கப்பட்டார். ஏறத்தாழ தனிமைச்சிறையில் அவர் சத்தாரா ஜெயிலில் அடைக்கப்பட அங்கே டாங்கேவைச் சந்தித்து இருவரும் தப்ப முயன்றனர். விடுதலைக்குப் பிறகு காட்டே மெட்ராசுக்கு நாடு கடத்தப்பட்டார். இதன் மத்தியில் பி சி ஜோஷி கட்சியின் பொதுச் செயலாளர் ஆனார்.  

மெட்ராஸ் ராஜதானியில் ஆற்றிய பணிகள்

            மெட்ராஸில் ஏற்கனவே (அக்னிக் குஞ்சாய்) சிறிய அளவில் கட்சி அமைப்பு இருந்தது; அதில் அமீர்கான், சுந்தரையா, ஏஎஸ்கே அய்யங்கார், கிருஷ்ணப் பிள்ளை மற்றும் அவர்களோடு சிந்தனைச் சிற்பி சிங்காரவேலுவும் இருந்தனர். காட்டேவும் சிங்காரவேலுவும் மிகுந்த நெருங்கிய ஒத்துழைப்போடு பணியாற்றினர். 1936 லக்னோ காங்கிரஸ் மாநாட்டில் காட்டே பங்கேற்றார். அங்கே சிபிஐ கட்சியும் காங்கிரஸ் சோஷலிஸ்ட் கட்சியும் சேர்ந்து பணியாற்ற வேண்டும் என பிசி ஜோஷி, ஜெய் பிரகாஷ் நாராயணன் மற்றும் காட்டே முடிவு செய்தனர்.

            காட்டேவின் முயற்சியால்தான் தோழர் இஎம்எஸ் (நம்பூதிரிபாட்) இந்தியக் கம்யூனிஸ்ட் கட்சியில் சேர்ந்தார். அப்போது இஎம்எஸ் காங்கிரஸ் சோஷலிஸ்ட் கட்சியிலும் காங்கிரஸ் கட்சியிலும் இருந்தார்; அவரைப் போலவே (ஏகே) கோபாலனும். காங்கிரஸ் சோஷலிஸ்ட் கட்சியின் தென்னகப் பணிகளில் காட்டே முக்கிய பிரமுகராகப் பணியாற்றினார்; அப்போது காட்டே மெட்ராஸிலிருந்து வெளிவந்த ‘நியூ ஏஜ்’ மாத இதழின் ஆசிரியர். தென்னிந்தியாவில் கட்சி மற்றும் பல தொழிற்சங்கங்களைக் கட்டி எழுப்புவதில் அவர் பெருந்துணையாக இருந்தார்.

வேலூர் சிறை மற்றும் தியோலி காவல் முகாம்

            1940 மார்ச் மாதம் மங்களூரில் காட்டே கைது செய்யப்பட்டு முதலில் வேலூர் சிறையில் அடைக்கப்பட்டவர் பின்னர் தியோலி தடுப்புக் காவல் முகாமிற்கு மாற்றப்பட்டார்.

            தியோலி முகாமில் காட்டே பஞ்சாப் சிபிஐ தோழர்களுக்கும் ’கீர்தி கம்யூனிஸ்ட்’களுக்கும் இடையே ஒற்றுமையை ஏற்படுத்த முக்கிய பங்களிப்புச் செய்தார். (கீர்தி கிஸான் பார்ட்டி, 1926ல் சோகன்சிங் ஜோஷ் தலைமையில் செயல்பட்ட பஞ்சாப் ‘தொழிலாளர் விவசாயிகள் கட்சி’யாகும்); கீர்தி கம்யூனிஸ்ட்களில் சோகன் சிங் பக்னா, தேஜா சிங் ஸ்வதந்தர் மற்றும் சிலர் அடங்குவர்.  தன்வந்திரி, சோகன் சிங் ஜோஷ் போன்றோரையும் காட்டே சந்தித்து கலந்து விவாதித்தார். இதன் பலனாகக் கீர்தி பார்ட்டி இந்தியக் கம்யூனிஸ்ட் கட்சியுடன் இணைந்தது.

            விடுதலையான பிறகு 1942ல் அவர் மீண்டும் கைது செய்யப்பட்டு முதலில் ராஜமுந்திரி சிறைக்கும் பின்னர் வேலூர் சிறைக்கும் அனுப்பப்பட்டார்.

            1943ல் பம்பாயில் நடந்த சிபிஐயின் முதலாவது கட்சி காங்கிரஸில் அவர் கலந்து கொள்ளாதபோதும்,  மத்தியக் குழு உறுப்பினராகத் தேர்ந்தெடுக்கப்பட்டார். விடுதலையானதும் பம்பாய் கட்சித் தலைமையகத்தில் இணைந்து கொண்டார்.

ஆங்கில எழுத்து ‘மூன்று Pகள்’ சேர்ந்த கடிதத்தின் சிற்பி

    அன்னிய ஆட்சியிலிருந்து இந்திய தேசம் விடுதலை அடைந்த சாதனையை இந்தியக் கம்யூனிஸ்ட் கட்சி வரவேற்றது. விரைவில் கட்சியின் பொதுச் செயலாளர் பிசி ஜோஷி மாற்றப்பட்டு அப்பொறுப்புக்கு BTரணதிவே கொண்டுவரப்பட்டார். அதுமுதல், கட்சியை இடதுசாரி சாகச தற்கொலைப் பாதை பிடித்துக் கொள்ள ஏறத்தாழ கட்சி சிதறியது. காட்டே உறுதியாகப் பிடிஆர் பாதையை எதிர்த்தார். 1948 பிப்ரவரி – மார்ச் கல்கத்தா கட்சி காங்கிரஸ் மாநாட்டிற்கான முன்தயாரிப்புப் பணிகளில் காட்டே தீவிரமாக ஈடுபட்டார். தலைமறைவு வாழ்வுக்குச் சென்றவர் கைதாகி 1950ல் விடுதலையானார். 

            புகழ்பெற்ற ’ஆங்கில மூவெழுத்து கடிதத்தை’ வடிவமைத்து எழுதியவர் காட்டே; மற்ற

இருவர், டாங்கே மற்றும் அஜாய் கோஷ். இவர்கள் மூவரின் தலைமறைவு வாழ்வின் புனைப் பெயர்களின் ஆங்கில முதல் எழுத்துக்களே அவை. இந்தக் கடித ஆவணம் கட்சிக்கு –செக்டேரியன்குழுப் போக்குப் பாதைக்கு மாற்றான -- ஓர் ஆரோக்கியமான பாதையை  அளித்தது. கட்சியின் அந்தப் புதுப் பாதை அஜாய் கோஷ் தலைமையில் 1951 ஏப்ரலில் தலைமறைவாக நடத்தப்பட்ட மாநாட்டில் பெரும் செல்வாக்கு செலுத்தியது. சிபிஐ தனது பழைய தவறான பாதையைச் சரிசெய்யும் வழிமுறையைத் தொடங்கியது.

            சிதறுண்டு பாழ்பட்டுக் கிடந்த கட்சியின் மையத்தைக் காட்டே திரும்ப புனர் நிர்மாணம் செய்ய உதவினார். மெல்ல மெல்ல, படிப்படியாக டாங்கே மற்றும் அஜாய் கோஷ் இருவரோடும் காட்டே கட்சிக்கு புது உற்சாகமளித்து மனவாட்டத்தில் சோர்ந்து போயிருந்த சூழ்நிலையைப் போக்கினார். காட்டே கட்சி வெளியீடுகள் பணியை எடுத்துக் கொண்டதுடன், கட்சியின் பொருளாளராகவும் பொறுப்பு வகித்தார்.

1964 சிபிஐ கட்சி பிளவு

            அக்டோபர் 1962ல் நடந்த சீன ஆக்கிரமிப்பை மிகக் கூர்மையாக காட்டே கண்டித்தார். குழப்பத்தையும் பேரழிவையும் ஏற்படுத்துவதில் மாவோயிசம் முக்கிய பங்கு வகிக்க, உலக கம்யூனிஸ்ட் இயக்கம் பிளவுபட்டது. அதனால் மிகப் பெரிதும் பாதிக்கப்பட்டது இந்தியக் கம்யூனிஸ்ட் கட்சியே. பிளவுபடுத்தும் போட்டியான இணை செயல்பாடுகள் சிபிஐ கட்சியை முடக்கியது. அத்தகைய பிளவு நடவடிக்கைகள் குறித்து அறிக்கை தயாரிக்குமாறு காட்டே தலைமையிலான கட்சியின் கட்டுப்பாடு குழு கேட்டுக் கொள்ளப்பட்டது.  ஏறத்தாழ ஒன்பது மாத காலம் கடும் பணியாற்றி, அறிக்கை 1964 ஏப்ரலில் தயாரானது; அந்த அறிக்கை பிளவு நடவடிக்கைகளை மிகக் கடுமையாகக் கண்டித்தது. அந்த அறிக்கையைத் தயாரிக்க காட்டே நாடு முழுதும் பயணம் மேற்கொண்டார். 1964ல் கட்சி பிளவுபட்டு விட்டது. 

            மத்திய நிர்வாகக் குழு உட்பட மத்திய தலைமைப் பொறுப்புகளில் காட்டே தொடர்ந்து பணியாற்றினார். கட்சியின் பொருளாளராகவும் மத்திய கண்ட்ரோல் கமிஷன் (மத்திய கட்டுப்பாட்டுக் குழு)  உறுப்பினராகவும் இருந்தார்.

            இந்தி, மராட்டி, ஆங்கிலம், கன்னடம், வங்காளம், தமிழ் முதலிய பலமொழிகளில் பயிற்சியும் புலமையும் மிக்கவராக அவர் இருந்தார். கட்சியின் வரலாறு, சிபிஐ கட்சியின் அமைப்பு நாள் போன்றவற்றின் மீது ஆதாரபூர்வமான விவரங்கள் அடங்கிய பல கட்டுரைகளை அவர் எழுதினார்.

            நீண்டகாலம் உடல்நலமின்றி இருந்த பிறகு சச்சிதானந்த் விஷ்ணு காட்டே எனப்படும் புகழ்பெற்ற கம்யூனிஸ்ட் எஸ் வி காட்டே புது டெல்லியில் 1970 நவம்பர் 28ம் நாள் மறைந்தார்.

            அவரது கடும் உழைப்பைப் பறைசாற்றி விண்ணில் ஒளிவீசிப் பறக்கிறது நமது செங்கொடி. வாழ்க காட்டே நாமம்!

--தமிழில் : நீலகண்டன்,

என்எப்டிஇ, கடலூர்

 

             

  

தோழர் ரகுவுக்கு ஆத்மார்த்த அஞ்சலி -- எழுத்தாளர் எஸ்ஸார்சி

       

    தோன்றிற் புகழொடு தோன்றுக!

                                          

 எஸ்ஸார்சி

நன்றி: திண்ணை இணைய இதழ் (மார்ச் 28, 2021 இதழில் வெளியானது)

            கடலூர் தொலைபேசி தொழிற்சங்கத் தலைவர் T.ரகுநாதன் 21/03/2021 அன்று சென்னை கே கே நகரில் காலமானார்.   அவரின் வயது எண்பதைத்தொட்டுக் கொண்டிருந்தது. இன்னும் சில ஆண்டுகள் அவர்  ஆரோக்கியத்தோடு வாழ்வார் எனத் தோழர்கள்  நம்பிக்கையோடு இருந்தனர். ஆனால் அன்புத் தோழர்களிடமிருந்து அவர்  இறுதிவிடை பெற்றுக்கொண்டார்.

            கடலூர்  மற்றும் விழுப்புரம் மாவட்டத் தொலைபேசி ஊழியர்களில்  குறைந்தது  ஓராயிரம் குடும்பங்களின்  மகிழ்ச்சியிலும் இன்ப துன்பத்திலும் பங்குபெற்ற பண்பாளர்.  தோழர்  ரகு  நேர்மைச் செல்வத்திற்கு ஓர்  ஒளி வீசும் இலக்கணம்.  முந்திரிக் காட்டில் முப்பது பேர் என்று குறைவாக மதிப்பிடப்பட்ட தொழிற்சங்கத்தை ஆயிரம் உறுப்பினர்களுக்குச் சொந்தமாக்கிய அமைப்புக் கலை தெரிந்த வித்தகத் தோழர்.

மகளிருக்குப் பாதுகாப்புத் தர மறுத்திட்ட தொலைபேசி நிர்வாகத்தை எதிர்த்து 1980 பிப்ரவரியில் நடைபெற்ற கடலூர் தொலைபேசி மாவட்டம் தழுவிய போராட்டம் ஐந்து நாட்கள் நடைபெற்றது. நிர்வாகத்தால் 300 தோழர்கள் தண்டனை பெற்றாலும் தண்டனையிலிருந்து எல்லோரையும் மீட்டெடுத்தச் சாதனையாளர் ரகு.

            தொழிற்சங்கத்தைச் சமூக நோக்கத்தோடு அணுகியவர். உறுப்பினர்களின்  நாட்டுப் பற்றுக்கு உரம் ஊட்டி வளர்த்தவர். மார்க்சியத்தை மனிதநேய மாற்றுக் குறையாமல் காத்த போராளிகளில் ரகு முதன்மையானவர். ஒழுக்க சீலர். மானுடப் பண்பின் உரைகல்.

            நாற்பது  ஆண்டுகள் தொலைபேசித் துறையில் பணிக் கலாசாரத்தோடு  பணியாற்றி ஓய்வுபெற்றவர். தொலைபேசி ஊழியர்  பொதுவுடமைத் தொழிற்சங்கத்தில் (NFTE)  பல்வேறு பொறுப்புக்களில்  ஈடுபாட்டோடு பங்காற்றியவர். ஒவ்வொரு தோழனுக்கும் அவரின் உதவியும் ஆலோசனையும்  எவ்வகையிலேனும் நிச்சயமாகக் கிடைத்தேயிருக்கும். அவ்வுதவியை அந்தத் தோழர் தன் வாழ்நாள் முழுவதும் நினைவில் வைத்துக் கொள்ள வாய்த்த பெரும் பேறு. இது கடலூர்ப் பகுதியின் எதார்த்தம்.

திருவரங்கத்துப் புனித பூமியில் மிக உயர்ந்த ஆசாரச் சீலர்களின் குடும்பத்தில் பிறந்த ரகுநாதன் சாதி மத மாச்சர்யங்களைக் கடந்து தன் வாழ்க்கையை அமைத்துக் கொண்டார். தன் இறுதி மூச்சு வரை தன் குல ஆசாரப்படி அணியவேண்டிய முப்பிரி நூல் அணியாது புரட்சிகரமாய்த் தன் வாழ்க்கையை அமைத்துக் கொண்டவர்.

            கடலூர்ப் பகுதியில்  பணியாற்றிய  தோழர் சிரில் என்னும் அன்புத் தோழரின் வழிகாட்டுதலால் மார்க்சிய நெறிக்கு கொண்டுவரப்பட்டவர் தோழர் ரகு. தமிழகத் தொலைபேசி ஊழியர்களின்  நெஞ்சங்களை கொள்ளைகொண்ட உத்தமர் தோழர் ஜகன் அவர்களுக்கு மிக அணுக்கமானவர்.

தோழர் ரகுவின் பணி ஓய்வுப் பெருவிழா கடலூர் நகர் மன்ற அரங்கில் 01 06 2002 ல் வெகு சிறப்பாகத் தொலைபேசித் தோழர்களால் கொண்டாடப்பட்டது. பொதுவுடமைச் செல்வர் மூத்த தோழர் ஐயா நல்லக்கண்ணு அவர்கள் விழாவில் கலந்துகொண்டு  ரகுவை வாழ்த்திப் பெருமை சேர்த்தார்.  நிகழ்ச்சியைக் கடலூர் மாவட்டத் தொலைபேசி ஊழியர் சங்க   நெறியாளர் தோழர் இரா ஸ்ரீதர்  சிறப்பாக வடிவமைத்துச் சரித்திரம் படைத்தார்.

            ‘விருட்சம்’ என்னும் தலைப்பில் ஒரு கட்டுரை சிறப்பு மலர் வெளியிடப்பட்டது. தோழர் ரகுவின் அருமை பெருமைகளை எல்லோரும் அறிய அது வாய்ப்பானது. கவிஞர் கோவி. ஜெயராமன் தொலைபேசி ஊழியர் சங்கத் தலைவர்  பணி ஓய்வு விழா மலர் சிறக்கவும்  அவ்விழா நிகழ்வு ஓர் வரலாறுத் தடமாக அமைந்திடவும் ஓய்வின்றி பங்களிப்பு நல்கினார்.

தோழர் சிரில் நினைவு அறக்கட்டளை என்னும் அமைப்பினைக் கடலூர் தொலைபேசி ஊழியர்கள் அமைத்து கடந்த இருபது ஆண்டுகளுக்கு  மேலாகத் தமிழ்ப் பணி ஆற்றிவருவது இவண் குறிப்பிடத்தக்கது. தமிழ்ப் பாடத்தில் முதல் மதிப்பெண் பெற்ற தொலைபேசி ஊழியர்களின்  மாணவச் செல்வங்களுக்குச்  சங்க வேறுபாடின்றி  ஆண்டுதோறும் பரிசுகள் வழங்கி சிறப்பு செய்யப்படுகிறது.

            அத்தமிழ் விழாவில் தமிழ்ச் சான்றோர் பெருமக்கள்  தொடர்ந்து கவுரவிக்கப்படுகின்றனர்.  முனைவர் நா. பாசுகரன், அகரமுதல்வன், பிரபஞ்சன், ராஜம் கிருஷ்ணன், காசி ஆனந்தன், கவிஞர் அறிவுமதி, பத்மாவதி விவேகானந்தன், சிருங்கை சேதுபதி, வைணவ அறிஞர் மதுராந்தகம் ரகுவீர் பட்டாச்சாரியார்,  தோழர் தா பாண்டியன், ராஜ்ஜா, ஸ்டாலின் குணசேகரன், திருப்பூர் சுப்புராயன்,  இந்து தமிழ் நாளிதழ் சமஸ் என அந்த வரிசைத் தொடர்கிறது. இத்தகைய அரிய நிகழ்வுகளுக்கு எல்லாம் தனது மனக் குகையில் அடித்தளம் அமைத்திட்டவர் தோழர் ரகுவே.

கடலூரில் பல்வேறு இலக்கிய அமைப்புக்கள் இயங்குகின்றன. தமிழ்ச் சான்றோர்கள் வாழ்ந்து வருகிறார்கள்.  நாமார்க்கும் குடியல்லோம் எனப் பாடிய அப்பர்  உலாவிய மண்.  வாடிய பயிரைக்கண்ட போதெல்லாம் வாடிய பெருமகனார்  இராமலிங்க வள்ளலார் திருவடிபட்டத்  திருமண் அல்லவா. ஈடில்லா தேசப்பற்றுக்குச் சொந்தமான  வீரத்தாய்  கடலூர் அஞ்சலை அம்மாள்  இந்திய நாட்டு விடுதலைக்குப் போராடிய புனித பூமிதானே கடலூர்.

தோழர் ரகு, கடலூர் அருகே சாத்தான்குப்பத்திலுள்ள கிறித்துவ மிஷினரியின்  ஆளுகையின் கீழுள்ள ஆதரவற்றோர் இல்லத்தில் பயிலும் மாணவச் செல்வங்களுக்கு உதவிக்கரம் நீட்டுவதில் முன் கை எடுத்தவர். தொழிலாளர்களையும் சங்கத்தையும் சமூகப் பணிகளில் ஆற்றுப்படுத்தி  ஈடுபடுத்தியவர்.

2004 டிசம்பரில்  கடலூர் சந்தித்த சுனாமிப் பேரழிவு நிகழ்வின்போது பாதிக்கப்பட்ட மீனவக் குடும்பங்களுக்கு உதவுவதில் முன் நின்றனர். கடலூர் மாவட்டத் தொலைபேசித் தோழர்கள். தோழர் ரகுவின் தலைமைப் பங்கு அதனில் மகத்தானது.

கடலூர் மாவட்டக் கலை இலக்கியப் பெருமன்றக் கிளையின் செயல்பாட்டில் தன்னை முழுமையாக இணைத்துக் கொண்டவர் தோழர் ரகு. இலக்கியப் பெருமன்ற நிகழ்வுகளான கவிஞர் ஞானக்கூத்தன் கவி அரங்கிலும், நூற்கடல் கோபாலைய்யர் ‘கம்பனில் தோழமை’ எனும் உரை நிகழ்விலும், தனுஷ்கோடி ராமசாமியின் ஜெயகாந்தன்  ஞான பீடவிருது பெற்றமை குறித்தப் பாராட்டு நிகழ்விலும் ஈடுபாட்டுடன் கலந்துகொண்டவர்.

கடலூரில் எண்ணற்ற  தொழிற்சங்க .மாநாடுகள் தோழர் ரகுவின் தலைமையின் கீழ் வெற்றிகரமாக நடைபெற்றதனை இங்கே பெருமையோடு குறிப்பிடலாம்.

தோழர் ரகுவின் எல்லையற்ற தோழமைப் பண்பு காணக் கிடைக்காத செல்வம். துப்புரவுப் பணியாற்றும் தொழிலாளியிலிருந்து எத்தனை உயர்மட்ட அதிகாரிகள் இருந்தாலும் எல்லோருடனும் சம நிலையோடு பழகும் பண்பாளர். தொலைபேசி ஊழியர்களின் ஆயிரம் ஆயிரம் பிரச்சனைகளைத்  தனது கூர்மதியால் தீர்த்து வைத்தவர்.

தொலைபேசித் தொழிற்சங்கம் இந்தியத் தொழிற்சங்க வரலாற்றில் சாதித்தவைகள் ஏராளம். தினக்கூலித் தொழிலாளர்கள்  எண்ணிக்கையில் லட்சம் பேருக்கும் கூடுதலாக  நிரந்தர  ஊழியர் ஆக்கிய சாதுர்யத்திற்கும்  சாகசத்திற்கும் பாத்தியதையுடைய உயிரோட்டமுள்ள அமைப்பு அது. அந்தப் பெருமை மிகு அமைப்பின் செயல்பாட்டிற்கும் சிறப்புக்கும் தோழர் ரகு போன்ற தலைவர்களே ஆணிவேராக இருந்து பணியாற்றியவர்கள்.

.கடலூரில் மகளிர் தினவிழா ஆண்டுதோறும் மார்ச் மாதம் எட்டாம் நாள் நடைபெறும் அவ்விழாவில்  சாதனைப் பெண்மணிகள் கலந்து கொள்வர். பெண்கள் மட்டுமே  விழா மேடையை அலங்கரிப்பார்கள். விழா நிகழ்வு  முழுமையும் பெண் ஊழியர்களால் நடத்தப்படும். தோழியர் கே. விஜயலட்சுமி எனும் தோழியர் மகளிர் தினவிழா நிகழ்வுகளுக்குப் பொறுப்பாகச் செயல்பட்டார். அந்தத் தோழியரும் சிலகாலம் முன் காலமானார். இப்படியாக மகளிர் நிகழ்வுகளுக்குப்  பிரபலங்கள் பலர் கலந்துகொண்டு சிறப்பு சேர்த்துள்ளார்கள். ராஜம் கிருஷ்ணன், தமிழ்ச்செல்வி, அ. வெண்ணிலா, பர்வீன்சுல்தானா என அந்த வரிசையைப் பட்டியலிடலாம்.

கருத்து மாறுபாடு கொண்ட தோழர்களை அரவணைத்துச் செல்வதில் தோழர் ரகுவிற்கு நிகர் ரகுவே. எதிரணித் தோழர்களோடு விவாதிப்பதில், பிரச்சனைகளை எடுத்துவைப்பதில் ரகுவிற்கு நிகர்  அவர் மட்டுமே. அத்தனை கூர்மையான அறிவுத் திறனுடன்  ததும்பும் நகைச்சுவை உணர்வுடன் விவாதம் செய்பவர்களைத் தொழிற்சங்க அரங்கில் காண்பது மிக அரிது.

எப்பொழுதும் படித்துக் கொண்டே இருக்கும் தோழர் ரகு ஆங்கிலப் புலமை மிக்கவர்.

மேடைகளில் பேசும்போது அவரின் பேச்சு நம்மைத் தட்டி எழுப்பும், சொக்கவைக்கும். இந்தி மொழியிலும் ஆகத் தேர்ச்சிபெற்றவர் ரகு. வட இந்தியத் தலைவர்களின் இந்தி உரையை நம்தமிழில் ஆக்கி விருந்து படைப்பார்.

            ஆங்கில மொழிச்செறிவால் நல்ல மொழி பெயர்ப்பாளர். அதிகாரிகள் எத்தனை உயர் அதிகாரிகளாக இருந்தாலும் தோழரின் பேச்சாற்றலுக்கு முன்னால் தோற்றுத்தான் போவார்கள். தோழர் எடுக்கும் பிரச்சனைகளில் நேர்மை நிச்சயம் கொலுவிருக்கும். சட்டப்படியே செய்யவேண்டும் என்பதில் மாற்றுக் குறையாத  உறுதியிருக்கும். எடுக்கப்படும் எல்லா முடிவுகளுக்கும்  அடிநாதமாக மனிதாபிமானம் மிளிர்வதை நாம் கண்டுணர முடியும்.

தன் குடும்ப முன்னேற்றத்தைவிடத் தன் தோழர்களின் நல் வாழ்க்கையைப்பற்றி மட்டுமே சிந்தித்த ஒரு தோழர் உண்டென்றால் அந்த அதிசயமே எங்கள் ரகு.

நல்ல நண்பனாய் உடன் பிறவா சகோதரனாய்,  பெற்றதாயினும் சாலப்பரிந்து உதவும் அன்பருக்கு அன்பனை, தோழர் ரகுவை நாம் தோற்றுவிட்டுத்தான் நிற்கிறோம்.

அவரை மீண்டும் படிப்போம்.  தோழர் ரகுவின் சிந்தனைகள் நமக்கு வழிகாட்டக் காத்திருக்கின்றன!

 ‘உன்னோடு விவாதித்து

 வென்றவர் இல்லை

ஆனால்

தோற்பதிலும்  வெற்றியுண்டு

எப்படி நீ அறியாது போனாய் ?’

                                                      கவிஞர் கடலூர், நீலகண்டன்.

சர்வதேச பெண்கள் தினம் கட்டுரை 3 நம்முடைய பெண்களை உண்மையில் நாம் கொண்டாடுகிறோமா?

 

நம்முடைய பெண்களை உண்மையில் நாம் கொண்டாடுகிறோமா?

--நந்திதா கிருஷ்ணா

வரலாற்றாளர், சூழலியல் ஆர்வலர் மற்றும் எழுத்தாளர்

            சோவியத் யூனியனில் பெண்கள் வாக்குரிமை கோரி போராடி அதனை 1917லேயே அடைந்த நிலையில் மார்ச் 8 சர்வதேச பெண்கள் தினத்தைக் கொண்டாடுகிறார்கள். சிலநாடுகள் மார்ச் மாதத்தைப் பெண்கள் மாதம் என்றும் வேறுசில நாடுகள் பெண்களுக்கான வரலாற்று மாதம் என்றும் கொண்டாடுகின்றன. பெண்கள் தினம் என்பது பெண்மையை, பெண்ணின மதிப்புகளை உயர்த்திப் பிடிப்பதும் அவர்களின் சாதனைகளையும் பங்களிப்புகளையும் அங்கீகரிப்பது என்றும் பொருள். இந்தியாவிலும் அந்நாளில் பெண் சாதனையாளர்களுக்கு விருது வழங்கும் நிகழ்வுகள் நடத்தப்படுகின்றன. ஆனால் அவையெல்லாம் படித்த நடுத்தர வர்க்கப் பெண்கள் சம்பந்தப்பட்டது. பெண்ணினத்தின் எஞ்சிய பகுதியினர் கவனிக்கப்படாது விடப்படுகின்றனர். இந்தியாவில் பாலினச் சமத்துவத்தை அடைவதிலிருந்து வெகு தொலைவு தள்ளி இருக்கிறோம்; ஆயிரம் ஆண்களுக்கு 940 பெண்கள் மட்டுமேயெனும் ஏற்றத் தாழ்வான பாலின விகிதம் அதிர்ச்சியளிப்பதாகும்.

            இந்தியாவில் பெண்கள் ஆற்றும் பாதிக்கும் மேற்பட்ட பணிகள் ஊதியமளிக்கப்படாதவை மற்றும் அமைப்பு சாராத பணிகளே. இந்திய விவசாயிகளில் 40% பெண்கள் என்றபோதிலும், அவர்கள் வசம் 9% நிலங்கள் மட்டுமே உடைமையாக உள்ளது. பாதி இந்தியப் பெண்களுக்கு வங்கிக் கணக்கு இல்லை உச்சநீதிமன்றம் இந்து குடும்பச் சொத்தில் மகள்களுக்கும் சமமான உரிமை உண்டென்று கூறியபோதிலும் 60% பெண்களுக்குச் சொத்து இல்லை. மொத்த உற்பத்திக் குறியீட்டில்  (ஜிடிபி) பெண்களின் பங்களிப்பு உலக சராசரி 37 சதவீதமாக இருக்க, இந்தியாவில் வெறும் 17%. உழைப்புச் சக்தியில் பெண்களுக்குச் சமமான வாய்ப்பு அளிக்கப்படுமானால் இந்தியாவின் ஜிடிபி 27 சதவீதமாக உயருமெனச் சர்வதேச நாணய நிதியம் (ஐஎம்ஃஎப்) மதிப்பிட்டுள்ளது.

            பாதிக்கும் மேற்பட்டப் பெண்களிடம் செல்பேசி இல்லை, 80% பெண்கள் இணையத் தொடர்பு இல்லை. அரசின் பிரதம மந்திரி முத்ரா திட்டத்தின் கீழ் விவசாயமல்லாத, கார்ப்பரேட் அல்லாத கடன்கள் சிறு குறு தொழில் முனைவோருக்கு வழங்கப்படுகிறது: அதில் பெண் தொழில் முனைவோர்கள் 78%மாகவும், வங்கிமூலம் நேரடி நலஉதவி பெறும் பொருளாதாரத்தில் பின்தங்கியோருக்கான ஜன்தன் யோஜனா திட்டத்தின் மூலமும் அரசு பெண்களுக்கு அதிகாரமளிக்க முயல்கிறது. இருப்பினும் இந்தியப் பெண்கள் இன்னும் பொருளாதார ரீதியாக அதிகாரமளிக்கப்பட்டவர்களாக இல்லை – சமவேலைக்கு (பெண்களுக்குச்) சம சம்பளமில்லை.

            இந்தியாவில் பெண்களின் மிகப்பெரிய பிரச்சனை உடல்ரீதியாகப் பாதுகாப்பில்லாதது. பெண்களுக்கு எதிரான குற்ற விகிதம் இந்தியாவில் 53.9%. டெல்லியில் பெண்கள் பொது இடங்களில் பாலியல் அல்லது உடல்சார்ந்த வன்முறைத் தாக்குதல்களை அனுபவிப்பது 92%. அது நமது தேசியத் தலைநகரம். பெண்களுக்கு எதிரான வன்முறை வெளியே தெரிவதைவிட எங்கும், எப்போதும், நீக்கமற இன்னும் அதிகமாகவே நடைபெறுகின்றன; இதில் பலவகை வடிவிலான வன்முறைகள் குற்றங்களாகக் கருதப்படுவதில்லை, அன்றி வெளிஉலகிற்குத் தெரிவிக்கப்படுவதில்லை. பெண்களுக்கு எதிரான பாலியல் வன்முறைக்காக இந்தியாவை உலகின் மிகமிக அபாயகரமான நாடாகக் கருதுகின்றனர். வன்புணர்வு இந்தியாவில் மிகச் சாதாரணமான நிகழ்வாகிப் போனது; இந்தியாவில் ஒவ்வொரு 20 நிமிடத்திற்கும் ஒரு பெண் வன்புணர்வுக்கு ஆளாகிறாறென தேசிய குற்ற ஆவணப் பதிவுகள் அமைப்பு (NCRB) கூறுகிறது.

            2019ம் ஆண்டில் ஒவ்வொரு நாளும் 88 வன்புணர்வு வழக்கு பதியப்பட்டதாக அவ்வமைப்பு சமீபத்தில் புள்ளிவிபரம் வெளியிட்டுள்ளது. பாலியல் வன்கொடுமைக்கு ஆளான பெண்ணுக்குப் பல நேரம் நியாயம் கிடைப்பதில்லை; காரணம், அவர்களது தரப்பைக் காவல்துறை நியாயமாகக் காதுகொடுத்துக் கேட்பதில்லை, முதல் தகவல் அறிக்கை பதிவதில்லை, பலதருணங்களில் மருத்துவ சாட்சியம் பதியப்படுவதில்லை. இவையெல்லாம் குற்றம் புரிந்தவர்கள் சுலபமாகத் தப்பிவிடச் சாதகமாகின்றன.

            என்னால் ஆணின் மன அமைப்பைப் புரிந்து கொள்ள முடியவில்லை, எப்படி பலாத்காரமாக ஒரு பெண்ணை அல்லது குழந்தையைத் தவறாக நடத்துவது அல்லது வன்புணர்வுக்கு ஆட்படுத்துவது என்ன மனநிலையோ? இந்தியப் பெற்றோர்கள் தங்கள் மகன்களுக்கு வாழ்வின் நல்ல மதிப்பீடுகளைச் சொல்லித் தருவதில்லையோ? பெரும்பான்மை வன்புணர்வுக் குற்றங்களும் கழிவறை வசதி இல்லாத காரணத்தால் வயல்வெளிக்குச் செல்லும்போது நடக்கின்றன. ஆனால் நகரில் பேருந்துக்காகக் காத்திருக்கும் பெண்ணுக்கும் பாதுகாப்பில்லை என்பதைத்தான் நிர்பயா வழக்கு அம்பலப்படுத்தியது. இந்நிலையில் இரவில் காலங்கடந்து பெண்கள் வெளியே தங்கியிருப்பதும், அல்லது ஈர்க்குமாறு மேற்கத்திய உடைகளை அணிவதையும் காரணம் காட்டிப் பெண்களை அரசியல்வாதிகள் குறை கூறுவது எந்தவகையிலும் பயன்தராது. அது அவர்களுடைய வேலை இல்லை. மாறாக, அவர்களுடைய பணி பெண்களுக்குப் பாதுகாப்பு வழங்குவதுதான்.

            கல்விக்கான வாய்ப்பு குறைவு, ஏழ்மை காரணமாகப் பெண்களைத் தகுந்த வயதிற்கு முன்பே திருமணம் செய்து கொடுப்பது கரோனா தீநுண்மி பெருந்தொற்றால் அதிகரித்துள்ளது. உலகம் முழுவதும் கோவிட் தொடர்பாகப் பள்ளிகள் மூடப்பட்டதால் 160 கோடி குழந்தைகளின் கல்வி தடைபட்டுள்ளது. இப்படித்தான் 2013ல் எபோலா தொற்று பரவியதும் பெண் குழந்தைகள் படிப்பைக் கைவிட்டு பள்ளியைவிட்டு நீங்க, தொடர்ந்து அவர்கள் குழந்தைத் திருமணம் செய்து கொடுக்கப்பட்டதும் நடந்தது – இதனை ஒருவகையில் அப்பெண்ணின் குடும்பம் பொருளாதார நெருக்கடியிலிருந்து விடுவிக்கப்பட்டதாகக் கருதினர்.

            தொற்றின் காரணமாக வேலையிழப்பு, குடும்ப வருமான இழப்பினால் பெண்களைப் பொருளாதாரச் சுமையாகக் கருதி இளம் வயதில் திருமணம் முடிப்பது இந்தியக் குடும்பங்களில் நிர்பந்திக்கப்படுகிறது. கரோனா தீநுண்மித் தொற்றின் காரணமாக வயதுக்கு வராத இலட்சக் கணக்கான பெண்கள் திருமண வாழ்வில் திணிக்கப்படும் ஆபத்து உலகம் முழுவதும் நடைபெறுவதாக யுனிசெப் அறிக்கை கூறுகிறது. ஐ.நா.வின் புள்ளி விபரப்படி இந்தியாவில் மட்டும் ஒவ்வொரு ஆண்டும் 15 இலட்சம் குழந்தை மணப்பெண்கள் திருமணம் நடைபெறுவதாக மதிப்பிட்டுள்ளது. தொற்று ஆரம்பித்த நாள் முதலாக நான் பல இளம் பெண்களின் சோகக் கதைகளைப் படித்து வருகிறேன். வேலையிழந்த பெற்றோர் அவர்களை வயதானவர்களுக்கு மணம் முடிக்கிறார்கள், அதன் பிறகு ஒரு வாய் வயிறுக்குச் சோறிடும் சுமை குறையுமே என்று.

            இந்திய அரசு அனைவருக்கும் கல்வி என்பதில் உறுதி பூண்டு, அனைத்துக் குழந்தைகளுக்கும் கல்வி வழங்க  கல்வி உரிமை சட்டத்தை நிறைவேற்றியுள்ளது. 15 முதல் 16 வயதுள்ள பெண் குழந்தைகள் பள்ளியை விட்டு இடை நிற்பது 2008ல் 20 சதவீதமாக இருந்தது, 2018ல் 13.5%ஆகக் குறைந்துள்ளதென ஆண்டு கல்விநிலை அறிக்கை கூறுகிறது. பல நேரங்களில் தங்கள் தம்பி தங்கைகளைப் பார்த்துக் கொள்ளவும், வீட்டு வேலைகளில் உதவி செய்யவும் வேண்டி பெண்கள் பள்ளியைவிட்டு இடைநிற்பது துரதிருஷ்டமே. மேலும் கழிவறை வசதி மற்றும் பாதுகாப்பின்மை வேறு சில பிரச்சனைகளாகும்.

            தற்போதைய வில்லன் கோவிட்-19. பெண்களுக்கான பயன்படு நிலையில் பள்ளிகளில் தனிக் கழிவறைகள் எண்ணிக்கை 2010லிருந்து உயர்ந்து 2018ல் 66.4%மாக அதிகரித்துள்ளது; அதேபோலப் பள்ளிகளில் சுற்றுச் சுவர் 13.4%லிருந்து 64.4 சதவீதமாக உயர்ந்துள்ளது. இந்தியாவின் சராசரி கல்வியறிவு விகிதம் 64.8%, அதில் ஆண்கள் 75.3%மாக இருக்க, பெண்கள் 53.7% மட்டுமே; இதில் ஆண் பெண் இடைவெளி21.6%. இந்த இடைவெளி கிராமப்புறத்தில் இன்னும் கூடுதலாக இருக்கும். பெண்கள் அந்தஸ்து நிலைமையில் நிலவும் இத்தொற்று பாதிப்புக்கு முடிவு எதுவும் கண்ணில் தெரியவில்லை.

            பெண்கள் அதிகாரம் பெறுவதற்கான தீர்வு கல்வி மற்றும் பொருளாதாரச் சுதந்திரம் அடைவதில் மட்டுமே உள்ளது. தீநுண்மி கல்விச் சாலைகளை மூட நிர்பந்தித்துள்ளது. மேலும் ஓராண்டு இந்தியப் பெண்கள் பாடு துன்பமயமே. எதிர்வரும் ஜூன் மாதம் பள்ளிகள், கல்லூரிகள், பயிற்சி நிலையங்கள் -- தொற்று கால முன்னேற்பாடுகளான முகக் காப்பு, கையுறை, விலகி நிற்றல் முதலியவற்றை கடைபிடித்து, குறைந்த எண்ணிகையில் வகுப்புகள் ஷிப்ட் முறையில் -- திறக்கப்பட வேண்டும். இந்தியர்கள் புதியன கண்டுபிடிப்பவர்கள், புதிய வழிகளைக் காணுவார்கள். அவர்களுக்கு அனுமதியளிக்கப்பட்டால் பள்ளிகள் மாற்று வழிமுறைகளைக் கண்டு பிடிப்பார்கள். அவ்வாறின்றி, கல்விச் சாலைகள் தொடர்ந்து மூடப்பட்டிருக்கும் என்றால், குழந்தைத் தொழிலாளர், குழந்தைத் திருமணங்கள் மற்றும் பொதுவாகப் பெண்கள் அவமரியாதைக்குள்ளாவது அதிகரிப்பதையே நாம் எதிர்பார்க்க முடியும்.

--நன்றி: தி நியூ இந்தியன் எக்ஸ்பிரஸ் 27-03-2021

Are We Truly Celebrating Our Women?

--தமிழில் : நீலகண்டன்,

என்எப்டிஇ, கடலூர்